To a tamne (27.07.16)
Na wšě šěsnaće hodźin je muž w kontejneru stareje drasty na swoje wuswobodźenje čakać dyrbjał. 44lětny bě w Gorknitzu pola Drježdźan kontejner přeslědźił a so při tym do njeho sunył, zdźěli policija. Wusłyšawši wołanje a klepanje muža w železnym sudobju, poinformowa wobydler susodneho domu wohnjowu woboru. Policija nětko pospytaneho „padustwa mjenje hódnych wěcow“ dla přećiwo njemu přepytuje.
Před třomi tydźenjemi z rězarnje ćeknjena kruwa w Kaiserslauternje policiju přeco hišće za nós wodźi. Šoferojo běchu skoćo wčera w měsće wuhladali, na čož policiju wołachu. Jako zastojnicy pijědźechu, skoćo do lěsa ćekny. Tam bjez wuspěcha za nim pytachu. Před třomi tydźenjemi běchu samo helikopter podarmo zasadźili. Dokelž kruwa tež po kolijach běhaše, dyrbjachu nachwilnje čaru zaraćić.
Za jednotnu Europu
Mnichow (B/SN). Bamž Franciskus a ekumeniski patriarch Bartholomaios I. staj křesćanow namołwjałoj, zasadźić so za jednotnu Europu. Franciskus rjekny: „Je načasu so zwjazać, zo bychmy w europskim duchu rozrisali problematiku našeho časa.“ Bartoholomaios wuzběhny: „Swět steji před wužadanjemi, kotrež nas nuzuja k jednoće, k zhromadnosći a k mjezsobnej podpěrje.“
Dóstanu noweho biskopa
Limburg (B/SN). Generalny wikar z Triera Georg Bätzing budźe nowy biskop diecezy Limburg. Bätzing dźakuje so za dowěru a praji: „Sym stajnje w teamje skutkował a njemóžu sej to hinak předstajić, zo maja so cyrkwinske nadawki w zhromadnosći wukonjeć.“
Caritas w Ruskej podpěrać
Vechta (B/SN). Nazběrane 6 000 eurow na rozžohnowanju swjećaceho biskopa Heinricha Timmereversa 19. junija we Vechta wužiwaja za karitatiwne a cyrkwinske skutki w Ruskej. Podpěrać ma so dźěło katolskeho biskopa w Saratowje Clemensa Pickela, kiž pochadźa ze sakskeho Colditza. 27. awgusta budźe Timmerevers jako nowy biskop Drježdźansko-Mišnjanskeje dźecezy zapokazany.
Namołwja k wujednanju
Jastwo na čas žiwjenja
Podstupim (dpa/SN). Mordarja małeju Eliasa a Mohameda, Silvija S., su dźensa k najwyšemu chłostanju zasudźili. Podstupimske krajne sudnistwo wukaza jastwo na čas žiwjenja. Zdobom zwěsći wone wosebitu ćežu winy. Tak je ćešo, 33lětneho skućićela pušćić. Sudnik rěčeše wo „njezrozumliwymaj njeskutkomaj“. Silvio S. bě šěsćlětneho Eliasa w juliju 2015 před bydlenjom staršeju w Podstupimje zawlekł. Štyrilětneho Mohameda zawleče wón w oktobru 2015 w Berlinje. Wobeju hólcow je splažnje znjewužiwał a skónčnje morił.
Moskwa za direktne jednanja
Vientiane (dpa/SN). Do zetkanja USA, Ruskeje a UNO krizy w Syriskej dla namołwja Moskwa k měrowym jednanjam. Za politiske rozrisanje konflikta dyrbjałoj syriske knježerstwo a opozicija direktne rozmołwy zahajić, rjekny ruski wonkowny minister Sergej Lawrow po zetkanju ze swojim ameriskim kolegu Johnom Kerryjom dźensa w Laosu. Zetkanje planuja wodźacy zastupnicy USA, Ruskeje a UNO pozdźišo w Genfje planowane.
„Skutk“ připowědźił
Na dobro čisteje Sprjewje do Berlina po puću je tuchwilu ...
„Na sprawnosć dźiwać“
Nowa debata wo rentach a dźěłowym času w Němskej
Berlin (dpa/SN/MkWj). Debata wo rentach w Němskej so nimale wšědnje z nowymi namjetami wožiwja. Najnowši nastork přińdźe ze stron Kölnskeho Instituta němskeho hospodarstwa. Tón je wčera namjetował, rentowu starobu hač do lěta 2030 na 69 lět a hač do lěta 2041 samo na 73 lět zwyšić. Přiběrace renty njehodźeli so dołhodobnje hinak wurunać, zdźěli jednaćel instituta Hubertus Bardt nowinarjam. Wón w tym zwisku na to skedźbni, zo doba, w kotrejž ludźo rentu dóstawaja, tak dołho traje kaž hišće nihdy. Loni bě wona pola žonow wo 22,8 a pola muži na nimale 19 lět přiběrała. Strony kaž tež dźěłarnistwa namjet Bardta jako njesocialny wotpokazuja.
Ministerka za dźěło a socialne Andrea Nahles (SPD) bě hižo minjeny tydźeń nowu diskusiju wo rentach nastorčiła. Wona připowědźi, zo chcyła renty na wuchodźe a zapadźe přichodne lěta přibližić. Kaž so wotbłyšćuje, dyrbja so přichodne generacije z nišimi rentami wotnamakać, zo njeby so rentowy system sypnył. Tež to bě razne diskusije zbudźiło.
