Ći jedni wyskaja, dokelž je so industri­jowe stejnišćo w Zhorjelcu zachowało, tamni pak wotkiwnu. Hižo wjacore lěta dyrbjachu sobudźěłaćerjo twornje njewěstosć a njeznjesliwu ćahańcu znjesć. Stejnišći Zhorjelca a tež Budyšina wo­spjet na hračkach steještej. Z tarifowym zrěčenjom přichoda spytachu zamołwići naposledk twornje Alstom na wuchodźe Němskeje wuchować. Jedna z přičinow za wukonliwe industrijne stejnišća je bjezdwěla dobra infrastruktura. Po­darmo wojowachu zastupjerjo hospodarstwa a politiki wo elektrifikaciju ­železniskeje čary mjez Drježdźanami a Zhorjelcom, štož je wažne wuměnjenje za zasydlenje industrije w Hornjej Łužicy. Prawdźepodobnje drje tole za brónjenski koncern KNDS wažnu rolu njehraje. Za producenta ćahow pak ćim bóle. A tohodla njezadźiwa, zo so koncern twornje w Zhorjelcu wzda. Nadźijomnje zawodej w Budyšinje podobny wusud njekiwa. Bianka Šeferowa

Januar 2025 bě po klimowej rozprawje najćopliši, kotryž su hdy naměrili. Globalna temperatura wučinješe 13,23 stopnjow a tak 1,75 stopnjow nad niwowom doindustrijneho časa, zdźěla słužba za klimowu změnu programa EU Copernicus w britiskim Readingu. „Januar bě dalši překwapjacy měsac a z rekordnymi temperaturami pokročuje, kotrež minjene lěta wobkedźbujemy“, zdźěli rěčnica centruma. Daty zběrali běchu satelity, łódźe, lětadła a wjedrarnje po wšěm swěće.

Ličba wobchadnych haćenjow na awtodróhach Němskeje je znowa přiběrała. W swojej bilancy za lěto 2024 naliči ADAC cyłkownje 516 000 haćenjow, 12 000 wjace hač lěto do toho. Haćenja trajachu cyłkownje 448 000 hodźin a so na 859 000 kilometrach rozpřestrěwachu. To je puć hač na měsačk a zaso wróćo. Hłowna přičina je přiběraca ličba awtow.

Smochćicy (CS/SN). Nowe lěto je so w Smochčanskim kubłanišću swjateho Bena nawodnistwo změniło. Tola nic jenož to. Kubłanišćo so znowa orientuje, štož so tež w funkciji nawodnistwa wotbłyšćuje. Hač do 31. decembra je Sebastian Kieslich jako rektor skutkował. W přichodźe tam žanoho rektora wjace nimaja. Nowa šefina mjenuje so „jednaćelka za hotelowy management“. Sybille Richards, kotraž je we Wulkim Wjelkowje wotrostła, nadawk přewza. Wčera ju biskop Drježdźansko-Mišnjanskeho biskopstwa Heinrich Timmerevers witaše. Wón skedźbni na wužadanja, kotrež ma Sybile Richards zmištrować. Přetož kaž wšudźe ma tež katolska cyrkej z wyšimi kóštami wojować.

Marl (dpa/SN). Zwjazkowy kancler Olaf Scholz (SPD) tež po wjele diskutowanych naćiskach unije k migraciskej politice w zwjazkowym sejmje zhromadne dźěło z CDU a CSU po wólbach 23. februara njewuzamkuje. Jeho zasadne stejišćo stajnje bě: „Žane zhromadne dźěło z AfD“, rjekny Scholz na zarjadowanju wólbneho boja w Poruhrskej. Wšitko druhe je móžne, byrnjež tež druhdy ćežke a komplikowane było, tak Scholz. Wo tym rozsudźić pak chcedźa po wólbach.

Wjace nadpadow na strony

Berlin (dpa/SN). Wot nadpadow na čłonow a běrowy politiskich stron běchu Zeleni loni najbóle potrjecheni. Tole wuchadźa z wotmołwy zwjazkoweho nutřkowneho ministerstwa na naprašowanje frakcije AfD w zwjazkowym sejmje. Cyłkownje su nadpady 2024 po dotalnym ­ličenju najwyši staw minjenych šěsć lět docpěli. Zličili su loni 635 padow, na přikład wobškodźenja stronskich twarjenjow. 3 964 zastupnikow stron bě wot namocy a ranjenjow potrjechenych.

Prěni jeći do Guantánamo