Tel Aviv (dpa/SN). Po spřisahanju noweho prawicarsko-nabožneho knježerstwa w Israelu pod premierom Benjaminom Netanjahuwom je hižo k prěnim protestam dóšło. Sta demonstrantow blokowachu wčera wječor spěšnodróhu w Tel Avivje. Woni wobstawachu na prawach gmejny LGBTQ w kraju. LGBTQ je jendźelskorěčna skrótšenka za lesbiske, homoseksualne, biseksualne, transgender a queer. Woni boja so wobmjezowanjow po njepřećelskich zwuraznjenjach čłonow koalicije homoseksualnym napřećo.

Dalše brónje za Ukrainu

Brüssel (dpa/SN). Generalny sekretar ­NATO Jens Stoltenberg je Němsku a tamne staty partnerstwa namołwjał, dalše brónje do Ukrainy dodawać. „Njech klinči to paradoksne, ale wojerska podpěra za Ukrainu je najspěšniši puć k měrej“, rjekny Norwega powěsćerni dpa na proze do noweho lěta. Dyrbja ruskeho prezidenta Wladimira Putina přeswědčić, zo jeho cil Ukrainu kontrolować, njedocpěje. Hakle potom je měrniwe rozrisanje z jednanjemi móžne.

Benedikt XVI.: „stabilny staw“

Drježdźany (dpa/SN). Sakski ministerski prezident Michael Kretschmer kritizuje hladajo na skutkowanje amploweje koalicije, zo je w němskej politice „přewjele wopak jězdźacych“. Trěbne su dołho­dobne strategije město krótkodobneho krizoweho managementa. „Kak móžeš sej w tuchwilnym połoženju tež jenož wumyslić atomowe milinarnje zawěrać a dočasny wustup z brunicy pospěšić?“ To inwestorow njewěstych sčini.

Prawe rozsudy knježerstwa pak dyrbjała CDU jako najwjetša opoziciska strona na dobro kraja sobu njesć. „W aktualnej krizy so jako spomóžne wopokaza, zo je Němska federalny kraj. Mamy pak kedźbliwi być. Njetrjebamy politiku, kotraž pomjeńšenje hospodarskeho wukona akceptuje, zo bychmy z tym jako přinošk ke škitej klimy emisije CO2 znižili.“

Podstupim (dpa/SN). Po cyłym Zwjazku jednotne rjadowanje za móžny kónc škitnych naprawow korony dla žada sej braniborski ministerski prezident Dietmar Woidke. „Hdyž to přitrjechi, štož knjez Drosten a mnozy druzy fachowcy praja, zda so zmysłapołne być, zo móžemy so bórze wšitkich naprawow wzdać“, rjekny politikar SPD powěsćerni dpa. „To pak měło po cyłym Zwjazku jednotnje wothłosowane być.“ Woidke skedźbni na to, zo postajenje Braniborskeje hač do 11. januara płaći. Koronowe prawidła Zwjazka su hač do 7. apryla zakonsce zapisane, móža pak so prjedy zběhnyć.

W Bayerskej a Saksko-Anhaltskej je winowatosć nahubnika w busach a ćahach hižo cofnjena.

Moskwa (dpa/SN). Ruske knježerstwo je ukrainske wuměnjenja za měrowe jednanja wotpokazało. „Pod tutymi wumě­njenjemi z nikim njerěčimy“, wuzběhny ­ruski wonkowny minister Sergej Lawrow wčera na homepage ministerstwa, hdźež bu interview wozjewjeny. Ruska nje­budźe ani wobsadźene kónčiny spušćić, ani reparaciske płaćenja wukonjeć abo so před mjezynarodnymi sudnistwami zamołwić. Lawrow měni, zo njeje ukrainske knježerstwo jednanja kmane.

Do toho bě ukrainski prezident Wolodymyr Zelenskyj swoju „měrowu for­mulu“ předstajił, wobstejacu z dźesać dypkow. Najwažniše su dospołne cofnjenje ruskich wojerskich jednotkow ­z ukrainskeho teritorija a reparaciske płaćenja za wot ruskeho wójska načinjene škody w Ukrainje.

Ruska porno tomu wujasni, zo dyrbi Kijew aneksiju čornomórskeje połkupy Krim a regionow Donjeck, Luhansk, Cherson a Zaporižžja připóznać. To su jich wuměnjenja za měrowe zrěčenje. Ukrainske knježerstwo to raznje wotpokazuje a je wuswobodźenje wšitkich mjenowanych kónčin připowědźiło.