Wotnětka test za lětadło trěbny
Warnuje před zwadu
Naprawy korony dla dale płaćiwe
Drježdźany (dpa/SN). Naprawy koronawirusa dla w Sakskej dale płaća a so zdźěla hišće přiwótřa. To je socialna minister Petra Köpping (SPD) dźensa w Drježdźanach připowědźiła. Zasady kaž prawidła kontaktow a hygieny maja so dale dodźeržeć. Nimo toho namołwjeja, so njetrjebawšich jězbow wzdać.
Zetkanja dweju domjacnosćow z najwjace pjeć wosobami su dale móžne. Dźěći pod 15 lětami njejsu sobu ličene. W Drježdźanach pak smědźa so domjacnosće jeno z jednej wosobu zetkać.
Hladajo na wólnočasne aktiwity a wotewrjenja wobchodow smědźa wokrjesy njewotwisnje wot incidency same rozsudźić. To pak jenož płaći, hdyž njeje wućeženje łožow na koronu schorjenych pacientow ličbu 1 300 překročiło. Trěbny pak je negatiwny test. W zawodach měli přistajenym tydźenski test poskićeć.
Šule a pěstowarnje maja w Sakskej dale wotewrjene wostać. Wučerjow, přistajenych a šulerjow chcedźa dwójce wob tydźeń testować. Přichodnje maja w šulach nahubniki tež we wučbje wužiwać.
Přeco zaso brunica
To a tamne (30.03.21)
Po puću na pruwowanje za jězbnu dowolnosć je so 22lětna z Uetersena pola Hamburga na awtodróhu A 23 zaběžała. Policisća ju po pokiwach wjacorych šoferow zadźeržachu. Wona jim rjekny, zo je po puću na pruwowanje a zo je so na nawigaciski system swojeho mobilneho telefona spušćiła, kiž bě ju prawdźepodobnje na awtodróhu wjedł. Policisća młodu žonu skónčnje na pruwowanje dowjezechu. Hač je je wobstała, njeje znate.
Wjace hač 600 000 eurow wuzbytkował je dotal njeznaty skućićel z předawanjom awtow, kotrež scyła njewobsedźeše. Dotal je so 19 škodowanych z wjacorych europskich krajow a USA přizjewiło. Ludźo běchu pjenjezy na konta muža pola Ingolstadtskich bankow přepokazali. Wón bě jězdźidła internetnje poskićał a zajimcam falšowane dokumenty słał. Awta njejsu kupcy nihdy dóstali.
Choćebuz so „na něšto zwaži“
Modelowy projekt za zběhnjenje wobmjezowanjow koronawirusa dla
Choćebuz (dpa/SN). Runje tak kaž krajna stolica Podstupim chce so tež Choćebuz z modelowej komunu stać, zo móhli lockdown skónčić. „Smy so rozsudźili, so z wulkej zamołwitosću na něšto zwažić“, měni wyši měšćanosta Holger Kelch (CDU). Swoje přeće, so na projekće wobdźělić, su krajnemu knježerstwu hižo posrědkowali. Wone měło móžnosće postajić, po kotrychž móža komuny wobmjezowanja koronawirusa dla zběhnyć.
Druhe najwjetše město na juhu Braniborskeje planuje wědomostny přewod přez Braniborsku technisku uniwersitu Choćebuz-Zły Komorow a chce eksterneho poradźowarja za hygienu zasadźić. Nimo toho zasadźeja app k wotkryću kontaktow, kaž město kónc tydźenja zdźěli.
Za modelowy projekt chce město strategiju testowanja wutwarić. W tym zwisku planuje tež decentralne testowanišća, na přikład na nakupowanskich dróhach abo při dźiwadłowej kasy. Tež prawidłowny monitoring chcedźa přewjesć. Při tym pak budu dale na poćežowanje strowotniskeho systema dźiwać. Hotowy koncept přiwšěm hišće nimaja.
Kardinal so zastojnstwa wzdał
Vatikan (B/SN). Bamž Franciskus přetworjenje romskeje kurije dale pospěša. Próstwu kardinala Roberta Saryh wo wotstup je wón přiwzał. Konserwatiwny Sarah je 75 lět a tak w starobje, w kotrejž ma bamža pisomnje prosyć, chce-li so zastojnstwa wzdać. Z Gineje pochadźacy bě kardinalny prefekt kongregacije za Bože mšě a porjad sakramentow. Přeco zaso je sej jako nawoda zarjadnistwa reformy liturgije žadał. Na konferency 2016 w Londonje na přikład wón měšnikow namołwješe zaso z chribjetom k wěriwym Božu mšu kaž do II. Vatikanskeho koncila swjećić. Wjackróć je tež reformowy kurs bamža Franciskusa zjawnje kritizował.
Katolikojo w sakskej diasporje
Caren Lay direktna kandidatka
Kumwałd (SN/at). Caren Lay nastupi štwórty raz za Lěwicu jako direktna kandidatka za wólby zwjazkoweho sejma we wólbnym wokrjesu 156 (Budyšin 1). Tuchwilnu městopředsydku frakcije Lěwicy w parlamenće Němskeje su wobdźělnicy wokrjesneje wólbneje zhromadźizny wokrjesneho zwjazka Budyšin strony předwčerawšim w Kumwałdźe z 98 procentami, 52 z 53, płaćiwych hłosow wuzwolili.
„Wjeselu so nad jara dobrym wuslědkom. Je mi dale naležnosć wutroby, zajimy Łužicy w Berlinje zastupować. Za nje chcu so dale zasadźeć, za lěpšu infrastrukturu a sprawnišu towaršnosć“, rjekny nazhonita politikarka. Konkretnje mjenowaše wona elektrifikaciju železniskeje čary Drježdźany–Budyšin–Zhorjelc, zdobom pak tež, zo ma železnica po łužiskej jězorinje jako stajny zwisk z Drježdźan do Wojerec jězdźić. Lay podšmórny, zo dyrbja spěchowanske srědki ze strukturneho fondsa za dobu po kóncu zmilinjenja a wudobywanja brunicy tež w hórnistwowych kónčinach za nowe dźěłowe městna wužiwać a nic zwonka nich.
Łódź zdźěla swobodna
Kairo (dpa/SN). Po nimale tydźeń trajacej blokadźe Suezskeho kanala su minjenu nóc kontejnerowu łódź „Ever Given“ zdźěla wuswobodźić móhli. 400 metrow dołha łódź bě minjenu wutoru na přibrjóh kanala zajěła a tčacy wostała. Wot toho časa bě kanal blokowany. Pječa su zadni dźěl łódźe wuswobodźili, prědni pak hišće nic. Mjeztym čaka 350 łódźow na kóždym boku na dalejězbu.
Wobmjezowanja zběhnyli
London (dpa/SN). W Jendźelskej su wot dźensnišeho wšelake wobmjezowanja swobody koronawirusa dla zběhnjene. Dwě domjacnosći abo hač do šěsć wosobow smě so zaso w zjawnych parkach zetkawać. Zakaz, dom wopušćić, je zběhnjeny. Přiwšěm knježerstwo ludźi prosy, so njetrjebawšich jězbow wzdać. Sportnišća pod hołym njebjom a kupjele su tež zaso wotewrjene. Premierminister Boris Johnson dźěći a młodostnych namołwja, po měsacy trajacym lockdownje a kontaktnych wobmjezowanjach nětko zaso prawidłownje sportować.
Proces přećiwo policistej
