Za wjace lěsow z certifikatom
Von der Leyen znowa w Kijewje
Kijew (dpa/SN). Prezidentka komisije EU Ursula von der Leyen a 15 druhich čłonow komisije su so k rozmołwam z ukrainskim knježerstwom do Kijewa podali. Dźensa rano su stolicu Ukrainy docpěli. „Smy tu, zo bychmy pokazali, zo je EU z krajom wusko zwjazana“, pisaše von der Leyen na socialnej syći Twitter. Temy wuradźowanjow z ukrainskim knježerstwom je dalša podpěra a perspektiwa za přistup Ukrainy do EU.
Von der Leyen je wot spočatka wójny loni w februaru hižo štwórty raz w Ukrainje. Prěni raz pak ju wjacori komisarojo přewodźeja. Wjeršk jězby je jutře předwidźany. Tak chcedźa wosebity wjeršk přewjesć, na kotrymž chce so tež prezident Rady EU Charles Michel wobdźělić. Šefojo knježerstwow cyłkownje 27 čłonskich krajow EU pak njebudu pódla.
Sakska ma kulturny kraj wostać
Knježerstwo chce so na pjate financne zrěčenje ze Serbami dorozumić
Drježdźany (dpa/SN). Sakska chce masterski plan za turizm zhotowić. „Ćežišća su při tym wobłuki zwičnjenje, cyłolětny turizm, naslědnosć, fachowcy, digitalizacija, mobilita a financowanje“, wuswětli sakska ministerka za kulturu a turizm Barbara Klepsch (CDU) wčera na posedźenju krajneho sejma w Drježdźanach. Hladajo na tuchwilu wšelake wužadanja ma so „wulki cyłk“ wobkedźbować. „Turistiski wobłuk je w Sakskej derje nastajeny. Přiwšěm pak dyrbi so wobstejacy zakład skrućić. Nimo toho dyrbjeli dorěčeć, što ma so wobchować a kotre nowe temowe wobłuki móhli sej wotkryć. Politika a branša měłoj so dorozumić, kak a dokal chcetej turizm w Sakskej wuwić“.
W kulturje ma so w přichodnymaj lětomaj předewšěm na dwěmaj wobłukomaj dźěłać. To stej muzeje a biblioteki. W zwisku z muzejemi dźe wo to, na přikład digitalizaciju zapřijeć. Biblioteki měli so předewšěm w kónčinach na wsach podpěrać.
Hladajo na Serbow chce so Sakska sčasom ze Zwjazkom a knježerstwom w Braniborskej na pjate financne zrěčenje dorozumić.
Wo dwurěčnosći zhonili
Tydźenja wopytachu čłonojo předsydstwa frakcije CDU Sakskeho krajneho sejma, mjez druhim Georg-Ludwig von Breitenbuch (1. wotlěwa), Holger Gasse a předsyda Christian Hartmann (wotprawa), wólbny wokrjes zapósłanca krajneho sejma Alojsa Mikławška (2. wotlěwa). Při tutej składnosći šulerki a šulerjo wyšeje šule na trěbne saněrowanje twara skedźbnichu. Po zdźělence zapósłanca Mikławška běše tema wopyta wuhotowanje dwurěčneje wučby kaž tež praksy bliske zasadźenje šulskich asistentow při posrědkowanju serbskeje rěče.
Foto: wobydlerski běrow Alojsa Mikławška
To a tamne (02.02.23)
Wjace piwa předali
Frankfurt nad Mohanom (dpa/SN). Piwarnje w Němskej su loni zaso wjace piwa předali. Cyłkownje bě to 8,8 miliardow litrow, štož su 2,7 procentow wjace hač lěto do toho, zdźěli dźensa zwjazkowy statistiski zarjad. Přiwšěm njeje to hišće telko kaž do pandemije. Swětowe mišterstwo kopańcy w Katarje njeje wobrot wulce wobwliwował. Němski zwjazk piwarnjow je nimo toho hižo připowědźił, zo budźe piwo dale a dróše.
Bamž wopyta Afriku
Kinshasa (dpa/SN). Na swojim wopyće w afriskim kraju Kongo swjećeše bamž Franciskus dźensa z milion wěriwymi zjawnu Božu mšu. To je jedyn z wjerškow jeho putniskeje jězby, kotruž je pontifeks wčera zahajił. Hižo wčera, jako je wón na lětanišću w stolicy Kinshasa přizemił, jemu statysacy wěriwych kiwachu. W swojej narěči namołwješe bamž wobydlerjow w Kongo, zo njeměłoj hida a namóc w towaršnosći městna měć. W kraju dóńdźe stajnje zaso ke konfliktam.
Wotstronja wšitke naprawy
Dawkowe lěpšiny wotstronić
Berlin (dpa/SN). Politikarka Zelenych Paula Piechotta je financneho ministra Christiana Lindnera (FDP) namołwjała, wosebite prawidła w zwisku z dawkom za jězdźidła wotstronić. Ministerstwo njeje to dlěje hač dźesać lět činiło, Piechotta wčera powěsćerni dpa rozprawja. „To je na lěto něhdźe miliarda eurow. Hladajo na napjate etatowe połoženje njeje hižo zrozumliwe, čehodla so ministerstwo dawkowych dochodow wzda.“ Němska njemóže sej hladajo na krizy dowolić, lětdźesatki stare wuwzaća a wosebite prawidła dale zmóžnić. Pruwowanski wuběrk zwjazkoweho sejma je financne ministerstwo namołwjało, kóždu dawkowu lěpšinu přepruwować. Hač do kónca lěta 2023 ma wotpowědna rozprawa wuběrkej předležeć.
Měnjene su mjez druhim rjadowanja, na přikład dawkowe lěpšiny za ratarski a lěsniski wobłuk, kotrež měli so wotstronić a trajne spěchowanja skónčić.
Přistajenych njezhubić
Lula: Njedóstanu žanu municiju
Kijew/Brasília/Paris (dpa/SN). Nowy prezident Brazilskeje Luiz Inūo Lula da Silva je so na wopyće zwjazkoweho kanclera Olafa Scholza (SPD) minjene dny za měrowe jednanja mjez Ruskej a Ukrainu zasadźał. Wot Němskeje žadanu municiju za pancery, kotrež su w Ukrainje zasadźene, je Lula wotpokazał. „Brazilska je kraj měra. A tohodla nochcemy so direktnje abo indirektnje na wójnje wobdźělić“, brazilski prezident podšmórny.
Z Parisa a Washingtona su mjeztym rozdźělne signale, hač wojerske lětadła Ukrainje k dispoziciji staja. Prezident USA Joe Biden je tole wuraznje wotpokazał. Francoski prezident Emmanuel Macron njeje to cyle wuzamknył. „Principielnje njeje ničo zakazane“, wón měni. Najprjedy pak ma ukrainske knježerstwo wotpowědnu próstwu francoskemu knježerstwu sposrědkować. Zdobom maja so hladajo na zasadźenje wěste wuměnjenja spjelnić. Tak njesmědźa Ukrainjenjo brónje na ruskim teritoriju zasadźić. Brónje dyrbja wojacy jenož za wotwobaranje wužiwać.
Žony dale mjenje zasłuža
Berlin/Podstupim (dpa/SN). Žony su loni w Berlinje a Braniborskej přerěznje šěsć do dźesać procentow mjenje na hodźinu zasłužili hač mužojo. Rozdźěl njeje tak wulki kaž w cyłozwjazkowym přerězku, hdźež registrowachu statistikarjo w Berlinje diferencu wot něhdźe 18 procentow. Po informacijach statistiskeho zarjada zasłužichu žony loni přerěznje 22,54 eurow brutto na hodźinu, mužojo dóstachu 25,02 eurow. W Braniborskej je mzdowy rozdźěl mjeńši. Žony dóstachu zasłužbu 18,58 eurow na hodźinu, štož je něhdźe šěsć procentow mjenje hač jich kolegojo (19,71 eurow). Najwjetše mzdowe rozdźěle su fachowcy w starobnej skupinje 45 do 49lětnych dźěławych zwěsćili. Žony w Berlinje dóstachu 17 procentow mjenje mzdy hač mužojo. W Braniborskej su to 15 procentow mjenje.
Po Zwjazkowym statistiskim zarjedźe so rozdźěl mjez splahomaj hižo někotre lěta pomjeńša. W lěće 2006 zwěsćichu statistikarjo hišće diferencu 23 procentow. Dale woni informuja, zo su rozdźěle předewšěm pola dźělnych přistajenjow a powołanjach, kotrež zwjetša žony wukonjeja.
