Lipsk (dpa/SN). Z warnowanskim stawkom pozemskeho personala je dźěłarnistwo ver.di dźensa powětrowy wobchad na sakskimaj lětanišćomaj zlemiło. Po­trjechene běchu na lětanišću Lipsk/Halle štyri lěty do a z Mnichowa, w Drježdźanach jednaše so wo stajnje štyri lěty do a z Frankfurta a Mnichowa, rěčnik srjedźoněmskeje lětanišćoweje akciskeje towaršnosće zdźěli.

Po wšej Němskej je tysac lětow wupadnyło, potrjechenych bě 134 000 pasažěrow. Dźěłarnistwo ver.di bě něhdźe 20 000 pozemskich sobudźěłaćerjow namołwjało, dźěło złožić, zo bychu ćišć na Lufthansu w běžnych tarifowych jednanjach zwyšili.

Lufthansa a ver.di stej hakle dwójce wo přichodnych mzdach a dźěłowych wuměnjenjach rěčałoj. Třeći termin planuja 3. a 4. awgusta w Frankfurće nad Mohanom. Prěni poskitk bě ver.di jako přeniski wotpokazało. Dźěłarnistwo žada sej 9,5 procentow wjace mzdy, znajmjeńša pak 350 eurow. Lufthansa ma tute žadanje dotal za njepřiměrjene.

Moskwa (dpa/SN). Bywši zwjazkowy kancler Gerhard Schröder (SPD) je po informacijach Krjemla do ruskeje stolicy Moskwy dojěł. Rěčnik Krjemla Dmitrij Pjeskow njewuzamkuje, zo so Schröder tam tež z ruskim prezidentom Wladimirom Putinom zetka, powěsćernja Interfax rozprawja. Wobaj politikarjej staj spřećelenaj. „Dalokož je nam znate, je wón woprawdźe w Moskwje“, Pjeskow rjekny. Sćelakej RTL Schröder rjekny, zo je w Moskwje na dowolu, dokelž je Moskwa rjane město. Schröder a Putin běštaj lěta 2005 zhromadnje projekt płunowoda Nord Stream 1 w Baltiskim morju nastorčiłoj. Ruska je mnóstwo dodawaneho płuna přez tutón płunowód minjeny čas spochi znižiła. Putinej wumjetuja, zo wužiwa płunowód jako geopolitisku bróń. Schröder porno tomu je jón stajnje jako ryzy hospodarski projekt zakitował. Swojeho přećelstwa z Putinom dla Schrödera tež w rjadach SPD přiběrajcy kritizuja. Po měnjenju stronskich towaršow njeje so wón po zahajenju wójny Ruskeje přećiwo Ukrainje dosć raznje wot Ruskeje distancował. Prěni tydźeń awgusta chcedźa rozsudźić, hač jeho z SPD njewuzamknu.

Garažu susoda z piłu rozrězał je muž w Bayerskej, dokelž je wona jemu pječa wid na Starnbergski jězor brała. 52lětny je do toho hišće spytał, awtomatisku kameru manipulować, štož pak je so nimo kuliło. Tuž je kamera njeskutk filmowała. Škoda wučinja wjacore sta eurow. Garaža bu minjene lěta wospjet wobškodźena. Tehdy nasta škoda 10 000 eurow. Nětko pruwuja, hač je muž tež za to zamołwity.

Pozdatne ćěło je policiju w Sewjerorynsko-Westfalskej zaběrało. Swědk bě zastojnikow informował, zo leži na skłoninje při dróze njedaloko Ascheberga ćěło žony bjez hłowy. Jako zastojnicy městno namakanki docpěchu, dyrbjachu zwěsćić, zo jedna so wo wulku gumijowu klanku. Čehodla je něchtó nahu klanku do kerkow ćisnył, „drje nihdy njezhonimy“, policija piše. Sobudźěłaćerjo twarskeho zawoda gmejny su klanku zrumowali.

Franciskus w Kanadźe wopory nanuzowaneje asimilacije wopytał

Maskwacis (dpa/SN). Bamž Franciskus je prawobydlerjow Kanady wo wodaće za wot zastupnikow cyrkwje skućene njeskutki přećiwo indigenym dźěćom prosył. Čłonojo katolskeje cyrkwje a rjadniskich zjednoćenstwow su so na „projektach kulturneho zničenja a nanuzowanja asimilacije“ prawobydlerjow wob­dźělili, rjekny hłowa katolskeje cyrkwje wčera. To je swój wjeršk „w systemje internatnych šulow“ namakało, rjekny wón w małym městačku Maskwacis njedaloko Edmontona a prowincy Alberta. Tam je so bamž ze zastupnikami pra­wobydlerjow kmjenow Inuitow a Metisow zetkał.

Wot lěta 1880 su w Kanadźe lětdźesatki dołho něhdźe 150 000 indigenych dźěći swojim swójbam wutorhnyli a do wot cyrkwje nawjedowanych internatow tyknyli. W tutych šulach dožiwichu dźěći namóc, splažne znjewužiwanje, hłód a chorosće. Sta dźěći zemrěchu. Poslednje internaty zawrěchu lěta 1996. Wot stata nastorčeny a wot cyrkwje zwoprawdźeny program měješe dźěći indigenych ludow na zapadne křesćanske žiwjenske wašnje zwučić.