Mjenje alkohola?
To a tamne (10.05.22)
Traktorowy zapřah ze 108 žiwymi swinjemi je so na dróze pola Ralingena w Porynsko-Pfalcy zwróćił. Při tym bu napřećo jěduce wosobowe awto we wokrjesu Trier-Saarburg sylnje wobškodźene, šofer so snadnje zrani. 48lětny traktorist wosta njezranjeny. Swinje běhachu na puću a na skłoninje. Wohnjowi wobornicy móžachu je popadnyć. Jedne ze zwěrjatow dyrbjachu z narkotikumom morić. Prawdźepodobnje bě šofer traktora na nahłej a křiwicatej čarje přespěšnje po puću był.
Wulku škodu zawostajiła je 64lětna w vogtlandskim Rodewischu při pospyće, swoje awto natankować. Z dotal njeznateje přičiny zrazy wona do tankowanskeho stołpa a jón powali. Na to zajědźe wona z wotmachom do kasoweje budki. Při tym so nichtó njezrani. Z wobškodźeneho tankoweho stołpa njeje po informacijach policije žadyn bencin wuběžał.
Bamž žada sej móžnosć wućeka
Vatikan (B/SN). „Česću sej žurnalistow, kotřiž so wosobinsce za nowinarsku swobodu wopruja,“ praji bamž Franciskus na njedźelnym modlenju na Pětrowym naměsće. Wón pokaza na mjezynarodny dźeń nowinarskeje swobody 3. meje, na kotruž na swěće hižo 20 lět spominaja. Minjene lěto bu 47 žurnalistow morjenych a stotki buchu, swoje dźěło wukonjejo, zajeći. Za wobydlerjow Mariupola, kotřiž su sej wójnskeho stracha dla do wocloweho zawoda wućekli, žada sej bamž móžnosć wućeka z města. „Ćerpju a płakam, hdyž na ukrainski lud, wosebje na dźěći a słabych, myslu. Smy swědkojo makaberneho wospjetowanja surowosće čłowjestwa. Njedajmy so wot spirale brónjenja sobu storhnyć“, bamž na kóncu paćerjow apelowaše.
Wosebje ludnosć ćerpi
DGB ma wotnětka předsydku
Berlin (dpa/SN). Němski dźěłarniski zwjazk DGB je zapósłanču SPD w zwjazkowym sejmje Yasmin Fahimi za swoju nowu předsydku wuzwolił. 54lětna dósta na zwjazkowym kongresu w Berlinje dźensa 93,2 procentaj wšěch wotedatych hłosow delegatow. Prěni króć w stawiznach DGB steji nětko žona na čole dźěłarniskeho zwjazka. Wona naslěduje Reinera Hoffmanna, kotryž njebě po dwěmaj dobomaj zastojnstwa ze starobnych přičin wjace nastupił.
Rektorojo zeńdu so w Lipsku
Lipsk (dpa/SN). Z wuskutkami wójny w Ukrainje na uniwersity zaběraja so wot dźensnišeho na konferency rektorow wysokich šulow w Lipsku. Na kóždolětnej hłownej zhromadźiznje ma pak tež wo połoženje wuwučowanja a studija před pozadkom pandemije kaž tež wo wysokošulskej politice zwjazkoweho knježerstwa hić. Za to wočakowachu narěč zwjazkoweje ministerki za kubłanje Bettiny Stark-Watzinger (FDP).
Ministerka před wotstupom
Putin: Jenički prawy rozsud
Moskwa (dpa/SN). Ruski prezident Wladimir Putin je na wulkej wojerskej paradźe w Moskwje nadpad na Ukrainu z rozšěrjenjom NATO na wuchod wopodstatnił. „Ruska je agresiju NATO prewentiwnje wotwobarała, to bě jenički prawy rozsud“, rjekny Putin dźensa na Čerwjenym naměsće na paradźe k 77. róčnicy dobyća Sowjetskeho zwjazka nad nacistiskej Němskej w Druhej swětowej wójnje. Wón zapadej wospjet wumjetowaše, zo je „neonacijow“ w Ukrainje wobrónił. Moskwa je stajnje zaso spytała, zrěčenje wo mjezynarodnym wěstotnym rozrisanju wotzamknyć, wón rjekny. NATO pak je argumenty Ruskeje ignorowała a započała, teritorij Ukrainy wojersce wužiwać.
W swojej narěči Putin před nowej swětowej wójnu warnowaše. Njeńdźe jenož wo to, čestne wopominanje zachować, ale wšitko za to činić, zo njeby so hrózba tajkeje wójny nihdy wospjetowała.
Z prawej temu
Melnyk: Mało konkretneho
Macron a Scholz wuradźujetaj
Berlin (dpa/SN). Francoskeho prezidenta Emmanuela Macrona wočakuja dźensa wječor w Berlinje. Je to prěnja jězba Macrona do Berlina, po tym zo běchu jeho znowa za prezidenta wuzwolili. W zwjazkowej stolicy chce Macron ze zwjazkowym kanclerom Olafom Scholzom (SPD) mjez druhim wo wójnje Ruskeje přećiwo Ukrainje a wo suwereniće Europy rěčeć. Při tym maja aspekty zakitowanja a zastaranja kontinenta z energiju w srjedźišću stać.
Scholz a Macron chcetaj pak tež mjezynarodne temy wobjednawać: połoženje w afriskim Sahelowym pasmje, poćahi k balkanskim krajam a styki Europskeje unije k Chinje. Na dnjowym porjedźe steja pak tež změna klimy, zawěsćenje zastaranja ludźi ze žiwidłami a dalše slědźenje w swětnišću.
Za Macrona je jězba do Berlina prěnja wizita we wukraju po znowawuzwolenju před tydźenjomaj a ma wažnosć němsko-francoskich poćahow potwjerdźić.
CDU na sewjeru jasnje dobyła
SSW z 5,7 procentami lisćinowych hłosow dotal najlěpši wuslědk docpěła
Kiel (dpa/SN/at). Wulki wuspěch za CDU, hórka poražka za SPD: Wólby krajneho sejma w Schleswigsko-Holsteinskej je CDU ministerskeho prezidenta Daniela Günthera z wulkim wotstawkom dobyła. SPD je na historiski niski staw pod 20 procentow spadnyła. Nimo toho je wona wotnětka za Zelenymi jenož hišće trěća najsylniša politiska móc w kraju. Po nachwilnym wuslědku ma CDU 43,4 procenty (2017: 32,0), Zeleni su sej 18,3 procenty wubědźili (12,9), FDP 6,4 (11,5). SPD je runje hišće 16,0 procentow nažnjała (27,3. AfD je ze 4,4 procentami (5,9) na pjećprocentowej mjezy zwrěšćiła a z krajneho sejma zlećała. Lěwica docpě z 1,7 procentami hišće špatniši wuslědk.
Južnoschleswigski wolerski zwjazk (SSW) je nimo CDU a Zelenych třeća dobyćerka wčerawšich wólbow. Po dotalnym rezultaće docpě wuběrnych 5,7 procentow (2017: 3,3). 5,5 procentow měješe w lěće 1950. 15 000 bywšich wolerjow SPD rozsudźi so wčera za stronu danskeje mjeńšiny.
Wobrot přiběra
Düsseldorf (dpa/SN). Wójny w Ukrainje dla liči brónidłowy koncern Rheinmetall lětsa z jasnje přiběracym wobchodnistwom. W prěnim kwartalu lěta pak njeje wobrot přiběrał. Dobytk zniži so minimalnje a wostanje z wobjimom něhdźe 1,3 miliardy eurow na lońšim niwowje, zawod minjeny pjatk wozjewi. Předewzaće je po swojich słowach profitabelnišo hospodariło. Operatiwny dobytk móžeše wone wo wosom milinow eurow na cyłkownje 92 milionow eurow zwyšić. Hladajo na netto-wuslědk su to tři miliony wjace, potajkim 61 milionow eurow.
Nimo toho dósta Rheinmetall wjace nadawkow. Pola sparty artilerije a municije je pjeć króć telko skazankow dóšło hač hewak. Předewšěm wobšěrny nadawk z Madźarskeje so tu wotbłyšćuje. Za cyłkowne lěto wočakuje předsyda nawodnistwa Rheinmetall Armin Papperger zwyšenje wobrota wo 15 do 20 procentow. Zakład wobličenjow pak je, zo Němska připowědźene inwesticije něhdźe 100 miliardow eurow zwoprawdźi.
