Posedźenja Budyskeje měšćanskeje rady su často napjelnjene z wobšěrnymi diskusijemi. Tak su wčera chětro wjele wo wyšim centralnym měšćanskim zwjazku Budyšin-Wojerecy-Zhorjelc rěčeli a što sprjewine město z njeho ma. Hišće dlěje diskutowachu radźićeljo wo tym, hač móhli prózdnu pěstowarnju w měsće jako zetkanišćo za ukrainskich wójnskich ćěkancow wužiwać, što přećiwo tomu rěči a kotre argumenty za to. Wo rozprawje dźěłoweho kruha za serbske naležnosće města so porno tomu žana diskusija wuwiła njeje, žane prašenje, žadyn rěčny přinošk, ničo. Jenož wyši měšćanosta Alexander Ahrens (SPD) so Benjaminej Wirthej skrótka za dobre dźěło kruha dźakowaše. Njewumjetuju žanomu radźićelej, zo jeho ryzy serbske temy snano njezajimuja. Bych pak sej přał, zo parlament tež raz wo tym wobšěrnje diskutuje, kak móhli docpěć, zo je serbšćina w měsće bóle prezentna. Wčera znajmjeńša mějach zaćišć, zo to trochu pod blido padnje. Marian Wjeńka

Bonn (dpa/SN). Bjez spěšneho jednanja drje tak mjenowane zastepowanje přichodne lěta w mnohich kónčinach zemje raznje přiběra a płódne kónčiny do pusćiny přeměnja. To je wuslědk najnowšeho přepytowanja pusćinoweho sekretariata UNO, kotrež su wčera w Bonnje předstajili. „Jeli ze swojimi resursami tak wobchadźamy kaž dotal, móhło to hač do lěta 2050 k přidatnemu zapusćenju kónčiny we wulkosći Južneje Ameriki wjesć“, rjekny rěčnica sekretariata Miriam Medel powěsćerni dpa. Zapusćenje je ničenje něhdy płódnych a na družinach bohatych kónčin. Na wulkich płoninach plahowane monokultury, industrijne plahowanje skotu a z tym zwisowace zničenje lěsow zawinuja 29 procentow wšěch za wobswět škódnych płunow. Wot zapusćenja wohrožene su přede­wšěm kónčiny Južneje Ameriki, Aziskeje a Afriki ale tež europske kraje kaž Španiska. Zastepowanje mjez druhim nastanje, hdyž ludźo štomy, kerki a trawu zniča abo wotpala. Te pak su trěbne, zo móhła póda wodu składować. Bjez rostlinow móže wětřik hornje woršty pódy wotnjesć. Potom nastanje stepa abo pusćina.

Flensburg (SN/JaW). Wo dramatiskich powěsćach z Ukrainy rozprawja tele dny Federalistiska unija europskich narodnych skupin FUEN. Zjednoćenstwo europskich narodnych mjeńšin je próstwa wo pomoc čłonskeje skupiny Medžlic krimtatarskeho naroda w Ukrainje dosćahnyła. „Widźimy, kelko swójbow tule humanitarnu pomoc trjebaja, dokelž wšak njejsu jenož dźěło, ale tež swoje doma a přiwuznych wójny dla zhubili. Starosćimy so wo nich“, wozjewi FUEN na swojej internetnej stronje.

Apel pochadźa direktnje z koordinaciskeho centruma Medžlica w Kijewje. „Tam koncentrujemy so nětko přede­wšěm na zastarowanje a podpěru bjezdomnych ze žiwidłami, hygienowymi artiklemi a medikamentami“, rěka w lisće narodneje mjeńšiny FUEN. Zdobom namołwjeja čłonojo Medžlica „wšěch wobydlerjow Ukrainy a wšitkich na teritoriju kraja bydlace narodnosće ke kóždužkuli pomocy“. Kaž FUEN dale rozprawja staraja so tež w Lwiwje wo Ukrainjanow a Krimskich Tatarow, kotrež buchu z wuchodneje Ukrainy wuhnate.

Hołb je w Berlinje na konjacym wubědźowanišću Mariendorf do wubědźowanja zasahnył a konja porazył. Kaž zamołwići zdźěleja, bě so wustróžany hołb „kaž worjoł do konja dał“ a jeho w mjezwoču nadběhował. Kóń Royenne, kiž měješe kołsać, zhubi rytmus a bu diskwalifikowany. Mjez sydom wobdźělnikami wubědźowanja bě Royenne absolutny faworit. Dobyćerjej kiwaše 10 000 eurow.

Cyłu hodźinu 25 metrow wysoko wutrać dyrbješe 24 wopytowarjow ludo­weho swjedźenja w Aachenje, po tym zo bě so rjećazowy karusel wjerćeć přestał a horjeka stejo wostał. Wohnjowa wobora hosći, mjez nimi štyri dźěći, z wjerćatymi rěblemi wuswobodźi. Po tym jich do přikrywow zawalichu, dokelž běchu chětro přemjerznjeni. Nichtó pak so njezrani. Přičina hawarije bě drje techniski defekt, zarjadowar zdźěli.