Drježdźany (dpa/SN). Sakske mjeńšinowe knježerstwo chce po schwalenju dwójneho etata ambicioněrowane koaliciske zrěčenje zwoprawdźić, rjekny šef sakskeje SPD Henning Homann w Drježdźanach. Prěni a najwažniši nadawk je nětko realizowanje tak mjenowaneho sakskeho fondsa, kotryž ma pjenjezy z wosebiteho zamóženja Zwjazka w Sakskej rozdźělować. Pjenjezy chce knježerstwo za wjacore projekty wužiwać.

Trump pušći guwernerku Fed

Washington (dpa/SN). Prezident USA Donald Trump je připowědźił, zo guwernerku notoweje banki Fed Lisu Cook pušći. To zdźěli wón na swojej platformje Truth Social. Jako přičinu mjenowaše wón w swojim lisće na Cook dosć dopokazow za to, zo je wona w zrěčenjach wo hypotekach wopačnosće podała. Personelny rozsud Trumpa je dźěl jeho kampanje přećiwo Fed, wšako chce wón wodźacu dań znižić.

Parlament so wotpalił

Přewšo wulki wichor z tójšto prochom je wčera, póndźelu, žiwjenje w US-ameriskej metropoli Phoenix haćił. Tajke wulke ­wichory w regionje často nimaja, mjeńše pak su tam zwučeni. Wosebite prudźenje wětřika jě přičina za wulke mnóstwo procha we wichorje. Foto: pa/AP/Ross D. Franklin

Drježdźany (dpa/SN). Sakski kultusowy minister Conrad Clemens (CDU) chce tomu zadźěwać, zo wupadnje na šulach w swobodnym staće wučba. Za to je łónco naprawow nadźěłał (SN wospjet rozprawjachu). „Wuńdu z toho, zo budźe zastaranje z wučbu hižo w tutym šulskim lěće wo wjele lěpše“, rjekny wón nowinje Freie Presse. Za to njedeleguja jenož wučerjow druhich šulskich družinow na wyše šule. Tež za přidatne hodźiny nětko wjace pjenjez zaplanuja. „Při wuradźowanjach spočatk šulskeho lěta smy zwěsćili, zo dyrbimy při wučbje z přidatnym dźěłom, tak mjenowanych MAU-hodźinach, něštožkuli polěpšić. Tohodla planujemy wot spočatka septembra jasne wyše přiražki“, Clemens připowědźi. Šulam chcedźa wot 1. septembra nimale dwójce telko pjenjez za MAU-hodźiny k dispoziciji stajić, hač dotal planowane. W etaće za lěto 2025 su něhdźe 11,2 miliardźe eurow zaplanowali. Dźěłarnistwo za kubłanje a wědomosć (GEW) w Sakskej wita při­powědźenu „korekturu kursa“ kultusoweho ministra. „Tutón krok bě nuznje trěbny“, rjekny Burkhard Naumann, předsyda sakskeje GEW.

Hamburg (dpa/SN). Po tym, zo bě wčera, póndźelu, popołdnju wulki woheń w Hamburgskim přistawje wudyrił, su wohnjowi wobornicy hač do redak­ciskeho kónca přeco hišće hašeli. Woheń je palace so awto w składźe zawiniło. Dokelž pak stejachu w hali z awtom tež wjacore tanki z płunom, móžachu wohnjowi wobornicy z wěstotnych přičin hakle po wjacorych hodźinach woheń hašeć. Tanki z płunom přeco zaso rozbuchachu, a tak lećachu palace so powostanki zdźěla wjacore stotki metrow po terenje při­sta­wa. Tute dźěle zawinichu wjacore dalše wohenje. „Eksplozije a intensita wohenja běštaj tak wulkej, zo so nawoda wo­hnjoweje wobory po prěnjotnej ewa­kuaciji a wuchowanju čłowječich žiwjenjow za cofnjenje rozsudźi“, zdźěli wohnjowa wobora. Palace so dźěle su tež jězdźi­dła wohnjoweje wobory wobškodźili, rjekny rěčnik wobory Lorenz Hartmann póndźelu. Wjacore stow metrow dyrbjachu so wobornicy cofnyć, zo bychu so před jara strašnym wohenjom škitali.