Partije wokrjesneho pokala

Donnerstag, 06. August 2015 geschrieben von:

Sobotu a njedźelu, 22. a 23. awgusta, wuhraje­ so prěnje koło wokrjesneho koparskeho pokala. Prěnje mustwa su z wjetšeho dźěla hižo koło dale, za to dyrbja­ najprjedy raz rezerwy jednotliwych sportowych towarstwow nastupić. Sćěhowace duele ze serbskim­ wobdźělenjom su wulosowane:

SJ Chrósćicy II – TSV Wachau II

Zeleno/Běli Sepicy II – Ralbicy/Hórki II

Łužica Wojerecy II – Marijina hwězda II

SV Seeligstadt – SJ Njebjelčicy IISN

W Čěskej a Pólskej wo dypki hraja

Donnerstag, 06. August 2015 geschrieben von:

Mjeztym zo budźe pola nas w prěnjej zwjazkowej lize start do noweje sezony jutře za tydźeń, koparjo w Čěskej a Pólskej hižo wo dypki hraja. W Čěskej bě Slovan Varnsdorf postupnik, ale přemałeho stadiona dla dyrbješe so wzdać. Tak stej nowačkaj FC Fastav Zlín a Sigma Olomouc. Zlín postara so z dwěmaj dobyćomaj w prěnimaj kołomaj wo překwapjenje. Mišter Viktoria Plzeň dyrbješe sej po dobyću na spočatku pola Dukle w Praze poražku 0:1 lubić dać. Pokalny dobyćer Slovan Liberec, loni jenož dwanaty tabulki, měješe spokojacy start a steji na druhim městnje. Tole je tuchwilny staw na čole tabulki:

1. Fastav Zlín 6 dypkow

2. Slovan Liberec 4 dypki

3. FK Teplice 4 dypki

4. Sparta Praha  4 dypki

5. Fk Jablonec 4 dypki

Nowačkaj w Pólskej stej Zagłębie Lubin a scyła prěni raz LKS Nieciercze. Mišter Lech Poznań a pokalny dobyćer Legia Waršawa stej derje startowałoj, nowačkaj matej so porno tomu ćežko. Na čole tabulki je tuchwilu tónle staw:

1. Legia Waršawa 9 dypkow

2. Cracovia Krakow 7 dypkow

3. Korona Kielce 6 dypkow

4. Górnik Leczna 6 dypkow

5. Piast Gliwice 6 dypkow

Žane wrota so njeradźili

Mittwoch, 05. August 2015 geschrieben von:

Sokoł Ralbicy/Hórki

– Budissa Budyšin II 0:3 (0:1)

Za domjacych zasadźeni: Gloxyn – Matka, Nuk, Bjeńš, Domaška, Lulak, Čórlich, Korjeńk, von Köding, B. Bejma, T. Bejma, Wałda, Šołta

Tak jasny kaž wuslědk hra scyła njebě. Prěnje štwórć hodźiny postajowaše ju koparska­ rezerwa Budissy, kotraž bě hač na Gärtnera kompletna. Sokoljo pak derje stejachu a spytachu přez kontery k šansam dóńć. Tajke so poněčim tež skićachu. Najprjedy natřěli Domaška po róžku jenož wrotarja. Po tym sej wón wulkotnje bul wuwojowa a wuhra poslednjeho muža, ale wospjet na nim zwrěšći. Wrotar pak skoči Domašce tak hrubje do nohow, zo móhł sudnik poprawom jědnatku postajić. Dalši kop Tomaša Bejmy wrota snadnje misny. Po poł hodźince padnychu nadobo z ničeho wrota za hosća. Becker wuhra Lulaka­ a smokny­ bul z 20 metrow do dołheho kuta. Ze zbožom by jón wrotar Gloxyn snano wotwobarał. Nětko měješe Budissa znowa lěpše hrajne podźěle, dalše šansy pak njewuskočichu.

Dwójny test přećiwo delanskim koparjam

Mittwoch, 05. August 2015 geschrieben von:

SJ Njebjelčicy

– Sokoł Ralbicy/Hórki 0:6 (0:2)

Hižo minjeny pjatk wječor powita koparska trenarska dwójka Njebjelčanskeje SJ Panic/Krawčik sylneho kontrahenta Sokoł Ralbicy/Hórki. Wšitkim bě wězo zwoprědka­ jasne, zo budźe to jara ćežke pruwowanje.

Sylne a spěšne nadběhi móžachu Njebjelčenjo jenož w spočatnych 20 mjeńšinach wotwobarać. Z wysokej třělwu poradźi so Stefanej Bjenšej nawjedowanje. Dale dyrbješe so domjacy cyłk na zakitowanje wusměrić, dokelž ćišć Sokoła dale wosta. Njebjelčanam poradźi so lědma konstruktiwny nadběh, dokelž dyrbjachu so tež srjedźnopólni akterojo přeco zaso w­róćo sćahnyć. Krótko do přestawki hos­ćo na 0:2 zwyšichu. Foulowu jědnatku bě Bosćij Bejma wěsće přetworił. Přez dwójny dyr w 56. a 57. min. zwyšištaj Tomaš Bejma a Gabriel Kurjat na 0:4. Wo kónčne­ 0:6 postaraštaj so potom hišće bratraj Gabriel a Měrćin Kurjat w 72. a 82. min. Sokoljo přez cyłu partiju jasnje pokazowachu, zo hraja klasu wyše. Wuslědk 6:0 je tuž w porjadku.

SJ Njebjelčicy II

– Sokoł Ralbicy/Hórki II 2:3 (1:2)

Poslednje testy do zazběha sezony

Mittwoch, 05. August 2015 geschrieben von:
Kopar Sokoła Ralbicy Hórki Bosćij Bejma (srjedźa) bě we wčerawšej přećelskej hrě přećiwo mustwu U 23 Budissy Budyšin jedyn z najagilnišich delanskeho cyłka. Tule přesadźi so wón hnydom přećiwo wjacorym Budyskim hrajerjam. Kak je poslednja testowa partija Sokołow wčera wječor w Ralbičanskim Stadionje přećelstwa wušła, zhoniće na 3. stronje dźensnišeho wudaća SN. Foto: Jurij Bjeńš

Satkula w Róžeńće pozastała

Dienstag, 04. August 2015 geschrieben von:
Wčera wječor je Radijo Satkula ze swojej lětušej beachvolleyballowej turu w Róžeńće zastało. Najrjeńše słónčne wjedro, pražene kołbaski a steaki, chłódne napoje, spodobna hudźba a wulkotna kulisa hnydom pódla hnadowneje cyrkwje – to běchu přičiny, zo přichwata dohromady dwanaće mustwow. Wčera wopokaza so team Dwójna Smjerdźaca jako najlěpši, dobywši finale přećiwo Pěskowčikam. Přichodnu póndźelu budźe hišće beachvolleyball w Kulowcu, prjedy hač wotměje so 17. awgusta finalny turněr w Bobkec jěchanskej hali w Miłoćicach. Foto: Beno Šołta

U 23 Budissy z nowym trenarjom

Dienstag, 04. August 2015 geschrieben von:

Wot tuteje sezony steji za rezerwu regionalneho koparskeho ligista Budissy Budyšin nowy trenar při wonkownej

liniji. Je to 36lětny Čech Jiří Krohmer. W krótkej rozmołwje z Hanspeterom Benadom přeradźa wón mjez druhim přičiny změny a mjenuje zaměry mustwa, w kotrymž tež serbskaj młodostnaj Denny Gloxyn a Paul Zimmermann za bulom honitaj.

Knježe Krohmero, minjenu sezonu sće hišće A-młodźinu Pósta Germanije Budyšin trenował. Čehodla sće nětko k rezerwje Budissy šoł?

J. Krohmer: Dožiwich z A-młodostnymi wulkotnu sezonu. Smy so z wokrjesnym mištrom stali, njejsmy pak postupili. Tohodla pytach za nowym wužadanjom. Tomaš Henčl poskići mi městno pola U 23, a tak njejsym dołho přemyslowł a spěšnje připrajich.

Kotre cile maće ze swojim nowym koparskim cyłkom?

J. Krohmer: Je to stajnje jara młode mustwo z mnohimi A-młodostnymi. Mój primarny cil je, so wo dalewuwiće jednotliwcow starać. Wězo chcemy tež rjanu a wuspěšnu kopańcu hrać.

Kotre městno měło tuž w tabulce wuskočić?

J. Krohmer: Myslu sej, zo je prěnje do pjate městno realistiske.

Konjecy-Šunow dale načolnik

Dienstag, 04. August 2015 geschrieben von:

Minjeny pjatk su so čłonojo dohromady 19 wohnjowych woborow w Róžeńće

w hašenju wubědźowali.

Započało je pjeć woborow z kameradami, staršimi hač 40 lět. Tam wopokaza so Mučow jako najlěpši cyłk z časom 35:50 sekundow. Druhe městno wobsadźichu Salowčenjo, třeće Brěžčenjo. Domjacy Róžeńčenjo dyrbjachu swój běh prjedy skónčić, dokelž mějachu problemy při rozdźělaku.

Po wubědźowanju staršeje gardy stej dwě młodźinskej woborje z gmejny Ralbicy-Róžant a Wotrowa/Pančic-Kukowa mocy měriłoj. Delanscy młodostni drje mějachu špatniši čas, diskwalifikacije jeničkeho konkurenta dla pak dźěše prěnje městno na nich.

Jednota Kamjenc dobry wuslědk docpěła

Montag, 03. August 2015 geschrieben von:
Krajny koparski ligist Jednota Kamjenc testowaše sobotu doma přećiwo postupnikej do wyšeje ligi, Biskopičanskemu FV 08, a docpě dobre 2:2. Po hižo 20 mjeńšinach hosćo přez Ralfa Marracka nawjedowachu. Roman Brückner (25.) a nowopřichad Stefan Höer (75.), z kotrymž so sobuhrajerjo na wobrazu wjesela, pak wuslědk zwjertny­štaj, doniž wyši ligist dwě mjeńšinje do kónca tola hišće přez Petra Novotneho njewuruna­. Přichodnu sobotu zahaji Jednota sezonu pola SV Taucha 99. Zawěsće stejitaj potom tež Patrick Woko a Feliks Hrjehor kaž hižo sobotu zaso na kopanišću. Foto: Jörg Stephan

3. běh dumperowych mišterstwow přewjedli

Montag, 03. August 2015 geschrieben von:

Kral najspěšniši – Domš a Grutka ze špatnym dnjom

Mjeztym hižo štwórty raz wotmě so w Baćonju dumperowe wubědźowanje wo němske mišterstwa (DDM). Na móhłrjec serbskim grandprixju je wčera a sobotu 33 wodźerjow a wodźerkow z dźewjeć teamow wo najlěpši čas wojowało. Mjez nimi bě tež tójšto Serbow, kotřiž zwjetša za Lejnjanski dumperowy team jězdźa.

W kwalifikaciji za hłowny běh bě Křesćan Grutka z Chrósćic najspěšniši a startowaše na to jako posledni we hłownym wubědźowanju. Prěnje koło je drje hišće suwerenje přejěł, w druhim pak so jeho dumper w křiwicy powróći, z čimž bě dobry čas fuk a zdobom šansa na podestne městno. Dalši serbski wodźer, kiž měješe wčera njezbožo, bě Frank Domš. We hłownym kole zhubi wón po puću nahłownik, na čož jeho wubědźowanski komitej­ zdiskwalifikowa. Lěpje dźěše so znowa amtěrowacemu mištrej a dobyćerjej wčerawšeho wubědźowanja Filipej Kralej. Dwě kole na Baćońskej čarje absolwowaše wón na dumperje pod dwěmaj mjeńšinomaj (1:59 min.). Druzy trjebachu za samsnu čaru nimale tři štwórć mjeńšiny dlěje!

Anzeige

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.