Awtor dźensa Jan Hrjehor

Wulka překwapjenka nimale dospołnje wupadnjene sportowe hibanje wokoło hód a Noweho lěta njebě. Ale doma sedźo abo na kolesu do pedalow teptajo sym sej minjene dny hakle tak prawje wuwědomił, kelko sportowych zarjadowanjow je w tym času wupadnyć dyrbjało a hišće wupadnje. Tak na přikład tež dwaj dnjej do patoržicy mjeztym tradicionalny nócny wolejbulowy turněr serbskeje a němskeje młodźiny w Pančicach-Kukowje. Hižo w lěću běchu so zamołwići za turněr młodźinskeho towarstwa Pawk wjednistwo Serbskeho Sokoła prašeli, kak wone nachwatanje 38. sokołskeho wolejbuloweho turněra wo pokal Domowiny planuje, a što rěči přećiwo přewjedźenju. Tón bě mjenujcy za 16. meju w sportowym kalendrje zapisany. Hač do dźensnišeho pak njeje so pandemije dla nachwatać hodźał. Tež wo pokal Pawka njejsu so 22. decembra wubědźować směli.

Sport (30.12.20)

Mittwoch, 30. Dezember 2020 geschrieben von:

Sportowy kwis w interneće

Na internetowych stronach a w socialnych syćach teama Nordschleswig - Æ mustwo a teama Denmark - pjasćobul běži wot 27. do 31. decembra kwis, při kotrymž móže wobdźělnik dobropis w hódnoće 2 000 danskich krónow abo 270 eurow za přebytk w kubłanišću Knivsberg dobyć. Mjez kwisowymi prašenjemi je tež jedne ze serbskim pozadkom. Na kotrym z hrajnych městnow budźe­ so Europeada 2021 wuhrać? A) w Budyšinje (Hornja Łužica, Němska), B) w Tønder (Nordschleswig, Danska), C) w Velikovec (Korutanska, Awstriska).

Kedźbu koparscy sudnicy

Koparske sudnicy a koparscy sudnikojo Zapadołužiskeho koparskeho zwjazka WFV dyrbja hač do dźensa w połnocy druhi domjacy test sezony 2020/2021 wotedać. Na to skedźbnja zamołwići wuběr­ka sudnikow WFV.

Prěni tuk hižo wotběhany

Jubilejne 20. „Wotběhanje hodowneje husycy“ běži lětsa indiwidualnje, a to hišće­ hač do 3. januara. Štóž w času wot 20. decembra do 3. januara 2021 indi­widuelnje pjeć kilometrow kołowokoło Němskopazličanskeho wulkeho hata absol­­wuje, wšojedne na kajke wašnje, dósta­nje w cilu wopismo a kołk.

Liški hnydom zaso na lodźe

Někajkižkuli sport je přeco móžny

Dienstag, 29. Dezember 2020 geschrieben von:

Serbski sportowy reporter hižo někotre lěta pola „Sporta na wuchodźe“

Štóž so za sport w domiznje zajimuje, tón znaje cyle wěsće wusyłanje w telewiziji „Sport na wuchodźe“. Stefan Šmit ze Smjerdźaceje słuša hižo tójšto lět k teamej woblubowaneho sportoweho magacina. Jurij Bjeńš je so z nim wo swojim dźěle rozmołwjał.

Stefano, wot hdy dźěłaće hižo za sportowe wusyłanje MDR „Sport na wuchodźe?

S. Šmit: Započało je so wšitko w lěće 2014, jako je koparske mustwo Budissy Budyšin do regionalneje ligi postupiło. To rěka, zo sym nětko hižo šeste lěto za „Sport na wuchodźe“ po puću. Hłownje za kopańcu, wolejbul abo tež za zymski sport.

Što su Waše nadawki pola sportoweho wusyłanja?

S. Šmit: Spočatnje běch tak mjeno­wa­ny interviewer. To rěka, zo sej z repor­terom, kiž ma přinošk w rukomaj, wu­činiš, z kim po hrě abo sportowym wubědźowanju rozmołwu wjedźeš. Potom je so stopnjowało, zo sym sam rozprawnistwo přewzał a jako reporter a redaktor sportowe přinoški zhotowjał. To so hač do dźensnišeho stajnje wotměnja, to je tež to rjane na tym.

Móžeće skrótka rozkłasć, kak tajki zjimacy přinošk nastanje?

Łužiske liški Běła Woda

– Drježdźanske lodowe lawy 3:2 (0:2, 2:0, 1:0)

Dwaj dnjej do patoržicy witachu hrajerjo z Běłeje Wody Drježdźanske lodowe lawy k derbyjej w liščej jamje. W prěnich mjeńšinach njewupadaše wulce za horcym derbyjom. Fanojo wězo znowa pobrachowachu, tola tež na lodźe so runjewon njepaleše. Raz tu jedyn pospyt, raz tam, ničo strašneho pak pódla njebě.

Po dźesać mjeńšinach pak darichu do­mja­­cy hosćom jedyn konter (třo přećiwo jednomu), kiž wrotar Mac Carruth najprjedy sensacionelnje wotwobara, w druhim pospyće pak bě bjezmócny. Jeničku wulku składnosć za liški měješe Rylan Schwartz, wón pak wokomik předołho přemyslowaše. Runje, jako so Łužičenjo trochu do hry namakachu, klinkaše k dru­hemu razej w swójskej klětce. Špatnu přihrawku wotpopadny Drježdźanski topscorer Jordan Knackstedt. W druhim pospyće wón na 2:0 zwyši. Hnydom na to mějachu hrajerjo ze sakskeje stolicy samo hišće wulku składnosć k třećim wrotam, tola Carruth steješe prawje a puk wotblokowa. Hornjołužičenjo w prěnich 20 mjeńšinach chětro přesłapichu.

Dary za dorost

Dienstag, 29. Dezember 2020 geschrieben von:
Dokelž so lětsa tež w rjadach Sporto­weho towarstwa Marijina hwězda žane hodownički přewjesć směli njejsu, staj dorostowej trenarjej Kai Frencel (srjedźa) a Manuel Rychtar kaž tež Dawid Matik (naprawo), zamołwity za koparski dorost, dźěćom koparskeho cyłka młodźiny D mały darik pola kóždeho jednotliwca doma přepodali. Foto: Borbora Frenclowa

Awtorka dźensa Tereza Wićazowa

Hrajna abo powšitkownje tež sportowa doba 2019/2020, ale tež 2020/ 2021 budźe zawěsće mnohim sportowčam a sportowcam w pomjatku wostać. Dotal sym so w tutej kolumnje wědomje temy „korona“ pasła. Tola nětko pospytam z wubranymi přikładami na hinaše wašnje sportowe lěto 2020 zjimać. W nalěću kaž tež nětko w nazymje je so amaterski sport wusadźił. Tola někotrym sportowčam a sportowcam bě to pohon, so na kreatiwne a swójske wašnje pohibować resp. přiwšěm planowane projekty zwoprawdźić.

W aprylu startowaštaj Serbski Sokoł z.t. a Spěchowanske towarstwo Serbskeje wyšeje šule „Michał Hórnik“ Worklecy z.t. zhromadnje sportowu akciju třěš­neho zwjazka serbskich sportowčow a sportowcow. Planowany běh sponsorow za přetwar šule bě wupadnył. Socialny projekt měješe předwidźane, zo so za pře­twar šule pjenjezy hromadźa, zo móže so šulerka z genetiskim defektom na wučbje wobdźělić. Tak namakachu zamołwići alternatiwu: wirtuelne sportowanje, při kotrymž móžeše so kóždy wobdźělić a tak šulerku a přetwar podpěrać.

Sport (23.12.20)

Mittwoch, 23. Dezember 2020 geschrieben von:

Megapochod wobornikow

Wot 27. do 28. měrca 2021 zarjaduja a wuhotuja Harald Skopi (Dobrowólna wohnjowa wobora Narć), Robert Novy (Narćanski wjesny předstejićer) a Diana Franke-Skopi tak mjenowany darowanski pochod, a to we łužiskim rewěrje. Jedna so tu wo ćah wuchowanskich mocow, kotrež zběraja pjenjezy za towarstwo Paulinchen z.t. a feuerkrebs.de. Wšitke informacije za 112 kilometrow dołhi pochod, kotryž je bjez wubědźowanskeho charaktera, steja na www.feuerwehrspendenmarsch.de. Přizjewjenja za jednotliwcow a skupiny pod www.baer-service.de

Połny program za Liški

Po tym zo su Běłowodźanscy lodohokejisća wčera wječor doma w liščej jamje přećiwo Lodowym lawam z Drježdźan 3:2 dobyli, woni sobotu, kaž tež přichodnu póndźelu a srjedu hižo zaso hraja.

26.12. 14:00 EC Kassel Huskies –

  Łužiske liški

28.12. 19:30 Łužiske liški –

  EV Landshut

30.12. 19:20 Łužiske liški –

  Bietigheim Steelers

Prěni tuk hižo wotběhany

Tabulka (22.12.20)

Dienstag, 22. Dezember 2020 geschrieben von:

Aktualna lodohokejowa tabulka DEL2

1. Ravensburg Towerstars 13 28 53:32 

2. EC Kassel Huskies 12 25 43:26

3. EHC Freiburg 12 25 53:37 

4. EC Bad Nauheim 13 22 43:45

5. Bietigheim Steelers 12 21 43:35

6. Tölzske lawy8 18 38:23

7. EV Landshut12 18 47:47

8. Lawy Frankfurt 13 18 37:47

9. LP Crimmitschau 13 17 41:41

10. Łužiske liški10 14 26:35

11. ESV Kaufbeuren 10 10 41:45

12. Drježdźanske LL12 9 25:46

13. Tigry Bayreuth 12 7 31:49

14. Sokoły Heilbronn 6 5 17:30

Faworit z rutinu dobył

Dienstag, 22. Dezember 2020 geschrieben von:

Łužiske liški Běła Woda – Ravensburg Towerstars 1:3 (0:1, 1:1, 0:1)

Po słabej, ale wuspěšnej hrě minjeny pjatk witachu Łužiske lodohokejowe liški njedźelu načolnika tabulki z Ravensburga, je rutinowany team z tójšto nazhonitymi a robustnymi hrajerjemi. Liški su skerje hišće zelene za wušomaj, wšako su najmłódši cyłk ligi. Toho­dla dźěchu hosćo tež jako faworit do hry.

Prěnja třećina bě hišće poměrnje wuru­nana, ale hóstne mustwo měješe wjacore lěpše móžnosće. Mac Carruth we wrotach Běłeje Wody pak měješe ­znowa wulkotny dźeń a wšitke spočatne nadběhi přećiwnika wotwobara. To spožči jeho kolegam na lodźe mocy dosć, a tak so woni chětro wobarachu a poněčim respekt­ před Ravensburgčanami spušćichu. Jich nawjedowanje padny tak lo­gisce po wurjadnej akciji jednotliwca. Andreas­ Driendl wuhra cyły škit inkluziwnje ­wrotarja a suny puk do čorneho. Dalše tři dobre móžnosće hosćićelski goalie wotwobara, tak zo dźěchu Běło­wodźenjo ze snadnym zastatkom 0:1 do prěnjeje pře­stawki.

Sakski mišter pytany, wubědźowanje krajneho zwjazka

Dienstag, 22. Dezember 2020 geschrieben von:

Nowe lěto započina so hnydom ze sportowym wjerškom. Sakski koparski zwjazk wuhotuje prěni raz swójsku tak mjenowanu eFootball trophy, elektroniske koparske wubědźowanje wo krajny pokal za Fifa 21 hrajerjow. Mišter kwa­lifikuje so za tak mjenowany ePokal Němskeho koparskeho zwjazka (DFB), a wězo syda wjele mytow. Přizjewić móžeće so hišće hač do jutřišeho 23. decembra 2020.

Wuhrata budźe trophy na PS 4 kaž tež na XBOX One. Hrać budu w k.o.-modusu 1 přećiwo 1. Wuměnjenja su za kóždeho hrajerja samsne. Za kóždy konsolowy turněr pytaja 128 wobdźělnikow. Koło přewjedu wot 6. do 31. januara 2021. A wšitcy zajimcy smědźa so wobdźělić.

Přizjewić móžeš so online pod https://www.sfv-online.de/news/details/sfv-landesverbands-trophy-sachsenmeister-gesucht/. Dyrbiš pak znajmjeńša 16 lět być. Potom dóstanješ mejlku z infor­macijemi a wopodstatnjenjom, zo sy přizjewjeny. Te dyrbiš wot swójskeho sportoweho towarstwa wupjelnić a wob­krućić dać. Za towarstwo móža so tež wjacori hra­jerjo přizjewić.

słowo lěta 2020

Anzeige