Aus der aktuellen Ausgabe vom Donnerstag, 15 Februar 2018

Póstnisku wutoru předstajichu Serbskopazličanscy karnewalisća zaso wjerški swo­jeho programa w Smječkečanskich Janskich kupjelach. Za akterow je to stajnje posledni wustup po dołhim kóncu tydźenja póstnic. A w Domje swjateho Jana běše to mjeztym­ 25. raz, zo je towarstwo WCV swoju póstnisku sezonu tam zakónčiło a wobydlerjow a přistajenych zawjeseliło. Tež chowancow hladarnje su karnewalisća ­aktiwnje do swojeho programa zapřijeli, za čož běchu jim woni a sobudźěłaćerjo ­jara dźakowni. Hižo nětko so wšitcy na klětu wjesela. Foto: Tadej Šiman

Jedne dźiwje swinjo mjenje

Běły Chołmc. Tójšto wěcneje škody nasta wčera rano, jako na statnej dróze S 108 mjez Běłym Chołmcom a Łazom dźiwje swinjo do wosoboweho awta zaběža. Něhdźe w 5.30 hodź. bě tam muž ze swojej Škodu po puću. Na kóncu praweje křiwicy jemu kundroz direktnje před jězdźidło skoči, štož so za dźiwje swinjo smjertnje skónči. Na awće nasta něhdźe 10 000 eurow škody. Wustróžany šofer staraše so wo wotwlečenske předewzaće, kotrež jeho awto sobu wza.

Do policista kopał

Budyšin. Nic z póstniskim wjeselom, ale z wulkim rozestajenjom mjez mužomaj a žonu skónči so w nocy na popjelnu srjedu kar­newalowy čas w jednym bydlenju na Budyskej Ebertowej w Strowotnej studni. Dokelž wšitcy třo tam wótře na sebje rjejachu, wołachu wobydlerjo policiju. Jako zastojnicy k městnu harowanja přijě­dźechu, so jedyn z dweju muži do nich da. 42lětny pluwaše jim mjezwoči, do nich kopaše a nadawaše jim wudma. Zastojnicy wšak mějachu jeho spěšnje pod kontrolu. Zranił so na zbožo tež nichtó njeje.

Bursowe towarstwo němskeho knižneho wikowarstwa je wospjet na šulach po cyłej Němskej předčitanske wubědźowanje „Čitanske lawy“ wuhotowało. Mjez lětušimi wobdźělnikami bě tež dźesaćlětna Bettina Weise z Lipoweje šule Wojerecy. Silke Richter je so z njej rozmołwjała.

Sobušulerjo su Će jako najlěpšu předčitarku 4. lětnika wuzwolili. Kak je k tomu dóšło?

B. Weise: Čitam rady a wjele. Jako prěnje je knjeni Syguschowa, mějićelka domu knihow a hudźby, z našeho 4. lětnika najlěpšich předčitarjow wuzwoliła. Tam bě tež tójšto mudrych hólcow pódla, a ja. Smy po tym wšitcy něšto předčitać dyrbjeli, a sobušulerjo wothłosowachu, štó je najlěpje čitał. Dóstach 20 hłosow, a tak sym dobyła. Tuž smědźach Lipowu šulu na wubědźowanju „Čitanske lawy“ zastupować.

Jako so termin wubědźowanja bližeše, sy zawěsće rozpjeršena była?

B. Weise: Ow haj, samo jara! Mějach wulke brjušebolenje. A poslednju nóc sym lědma spać móhła, tak rozbudźena běch. Nastajnosći sym wotućiła a sej zaso wusnyła, ale mějach rjany són.

Wo sonje rěčimoj na kóncu. Kak sy so na wubědźowanje přihotowała?

Ansamblowcy tež z dźěćacym ptačokwasnym programom přeswědčili

Lětuši dźěćacy ptačokwasny program Serbskeho ludoweho ansambla je po wšej Łužicy přewšo dobry wothłós žnjał. Wobsteji woprawnjena nadźija, zo namaka inscenacija přichodnje tež za mjezami Łužicy swojich fanow. Wulke připóznaće zasłuži sej bjezdwěla spodobne libreto z pjera Jěwy-Marje Čornakec. Při tym złožowaše so dramaturgowka SLA a serbska awtorka na swój bohaty pokład powědančkow za dźěći.

Kehelowanje

wokrjesna liga, stafla 1

1. KSV 47 Wojerecy   8   10:6

2. KSV 69 Łuty II   8   10:6

3. KSV Medingen II   8   8:8

4. SZ Kamjenc II   8   8:8

5. Sokoł Ralbicy/Hórki   8   6:10

6. ST Porchow II   8   6:10

wokrjesna liga, stafla 2

1.  TSG Wóspork/Hrodźišćo II  9   14:4

2.  ST 1996 Wulka Dubrawa II  8   12:4

3. MSV Krakecy II   9   12:6

4. ST Zemicy-Tumicy   9   10:8

Kehelerjo Sokoła Ral­bic­y/Hórki su w dypkowej hrě pola KSV Łutow II znowa přesłapili. Tež domjacy žane štomy nje­zwu­tor­hachu, na kóncu pak partiju z 2 394 : 2 281 kehelemi za sebje rozsudźichu. Jako prěnjej dźěštaj Gisbert Šiman a Hans-Joachim Schöne na čarje. Z 390 respekt­iwnje 427 drjewami pokazaštaj wobaj spokojacy wuslědk. Sokołaj běštaj wo štyri drjewa lěpšej hač jeju přećiw­nikaj. Tola přichodnaj starteraj, Herman Woko a Achim Kral, njemóžeštaj so z čaromaj spřećelić. Woko z 334 a Kral z 320 kehelemi přesłapištaj na cyłej liniji. Tak běchu serbscy kehelerjo w zastatku 91 drjewow. Roberto Wjenk z 394 a Jurij ­Ši­man­ ze 416 drjewami docpěštaj zaso normalnu formu, ale njemóžeštaj poražce hižo zadźěwać.

Byrnjež z Handrijom Hejdušku a Tobiasom Mikławškom stajnaj kehelerjej wupadnyłoj, njeje njetrjebawša poražka žane zamołwjenje. Franc Nowak

Lětuši volleyballowy turněr wohnjowych woborow gmejny Ralbicy-Róžant wo pućowanski pokal wjesnjanosty budźe sobotu wot 15 hodź. w Ralbičanskej ćěło­zwučowarni. Zarjadowar je Sernjanska wohnjowa wobora. Wšitcy su wutrobnje přeprošeni. SN

Sportowcow, kotřiž so wot dźěćatstwa hač do rentnarskeje staroby w jednym a tym samsnym towarstwje angažuja, lědma namakaš. Jan Bjeńš ze Šunowa je jedyn z nich. Za njesprócniwe dźěło je jeho Sakski sportowy zwjazk z čestnej jehłu w bronzy wuznamjenił.

Hižo jako dźěćo bě so Jan Bjeńš za sport zahorjał. Kaž nimale kóždy hólc honješe wón za bulom. Wo prawych sportnišćach móžachu tehdy w Delanach jeno sonić. Tola hač bě to na pućach a w zymje na łukach, „móžnosće so přeco namakachu“, so dźensa 73lětny dopomina. Wo kwaliće bulow radšo njepowěda, dokelž to by dźensa lědma štó wěrił.