Budyšin (SN/MkWj). Njewšědnje wjele ludźi je wčera wječor na mjeztym 26. politisku popjelnu srjedu sakskeje CDU do hale na Budyskim Třělnišću přišło, na kotruž serbski zapósłanc CDU w Sakskim krajnym sejmje Marko Šiman kóždolětnje přeproša. Samo přihladowarske trawersy běchu pjelnjene kaž najskerje hišće nihdy: Prawdźepodobnje běchu ludźo wćipni na noweho sakskeho ministerskeho prezidenta Michaela Kretschmera (CDU). Wón bě jako hłowny swjedźenski rěčnik připowědźeny a scyła dołho njetrjebaše, sej sympatije přihladowarjow zdobyć. Najpozdźišo, jako připowědźi, zo so jako Zhorjelčan w Budyšinje „kaž doma čuje“, žněješe 42lětny prěni přiklesk.
Dźesatki pizzow wšědnje je Dortmundski prawiznik přez dlěši čas dóstawał, bjez toho zo bě je scyła skazał. Štó je na tym wina, policija nětko přepytuje. Tukaja na „pizza-stalking“, šikanu z pomocu skazankow w mjenje druheho. Akcija je nimo, za skućićelom pak dale pytaja. Pizzy zapłaćić prawiznik njetrjeba. Škodu zaruna dodawar pokładźeneho pječwa.
Při mosće wisajo wostało je nakładne awto w Kamjenicy. Prawdźepodobnje bě 62lětny šofer Lkw-ja wysokosć mosta wopak posudźował. Pod mostom bě jenož 3,50 metrow wysoko městno. Na připowěšaku nakładowane twory pak přesahowachu wjace hač štyri metry. Na nakładnym awće a na mosće nastatu škodu trochuje policija na něhdźe 8 500 eurow. Wona wšak tež přepytuje, kak móžeše šofer dale jěć, byrnjež wysokosć mosta wupokazana była.
Staw medaljow po 31 ze 102 rozsudow
złoto slěbro bronza
1. Němska 8 2 3
2. Nižozemska 5 4 2
3. USA 4 1 2
4. Norwegska 1 4 3
5. Kanada 3 4 3
6. Francoska 2 1 2
7. Awstriska 2 1 1
Aljona Zawčenko a Bruno Massot staj z wulkotnym wukonom we wólnym krasnosmykanju porow na Olympiskich zymskich hrach w Pyeongchangu złoto zdobyłoj. Po tym zo bě so jimaj krótkoprogram ze štwórtym městnom nimokulił, staj wonaj dźensa rano z grandioznym předstajenjom zastatk nachwatałoj a před chinskim a kanadiskim porom dobyłoj.
Němske narodne mustwo steji tak dale na prěnim městnje medaljoweje lisćiny. Hižo nětko su cyłkowny wuslědk ze Sočija nimale docpěli. Najwuspěšniši kraj na olympiadźe 2014 bě Norwegska z cyłkownje jědnaće złotymi medaljemi.
Zo ratarjo Róžeńčanskeje agrarneje AG Sorabia při dźěle tež na wobswětoškitne zajimy kedźbuja, maja woni nětko čorne na běłym. Wčera dóstachu požadane wopismo, kotrež jim to wobkruća.
Róžant (SN/MWj). Wuznamjenjenje we wobłuku škitneho projekta „Čerwjeny milan – kraj k žiwjenju“ su wčera Róžeńčanskej agrarnej AG přepodali. Požadane wopismo přepoda Stefan Siegel ze spěchowanskeho towarstwa Njeswačanskeje ptakoškitneje stacije jednaćelej Sorabije Matejej Korjeńkej. Runja dalšim ratarskim předewzaćam w Delnjej Sakskej, Schleswigsko-Holsteinskej, Sewjerorynsko-Westfalskej, Durinskej a Sakskej su Róžeńčanske za jeho angažement za rubježneho ptaka počesćili.
Slepo (AK/SN). Pohrjebnišća w Slepom, Rownom a Mułkecach chce Slepjanska gmejna porjeńšić a jim nowy wonkowny wobraz spožčić. Tomu je so tamniša gmejnska rada na swojim zašłym posedźenju wuznała a za to dwě twarskej naprawje jednohłósnje schwaliła. „W Slepom dźe wo to, wobhrodźenje ponowić“, rjekny nawodnica hłowneho zarjada Marion Mudrina. „Stary groćany płót ma so zhubić, žiwy płót zwutorhać a cyły teren z wjetšimi swobodnymi městnami wuhotować.“ To ma dohromady něhdźe 100 000 eurow płaćić. Za projekt prócuje so gmejna wo 80procentowske spěchowanje z programa ILE we łužiskej jězorinje. Ze swójskeje kasy ma něhdźe 20 000 eurow přidać. Twarsku naprawu pak da jenož potom přewjesć, dóstanje-li za nju spěchowanske pjenjezy. Tak steji to w rozšěrjenym naćisku k wobzamknjenju.
Wojerecy. Wot spočatka lěta płaći we Wojerecach směrnica wo witanskim pjenjezu za nowonarodźene dźěći. Po njej wupłaća kóždemu dźěsću, kotrež je so po 1. juliju 2017 narodźiło, 250 eurow. Wuměnjenje je, zo bydli dźěćo w domjacnosći staršeju resp. zastaraćelow, kotřiž su znajmjeńša tři měsacy do poroda dźěsća we Wojerecach přizjewjeni, a zo su so přepytowanja U1 hač do U6 dospołnje a sčasom přewjedli. Trěbne formulary za to dóstanu starši we wobydlerskim běrowje na Dillingenskej abo na internetnej stronje Wojerec, rěka w zdźělence měšćanskeho zarjadnistwa.
Na słowjansku nóc
Lipsk. Słowjanska zymska nócna party wotměje so sobotu, 17. februara, wot 18.30 hodź. w Lipšćanskej kulturnej kofejowni „Knicklicht“ na Drježdźanskej dróze 79. Chór Slavia předstaji ruske, pólske a ukrainske ludowe pěsnje, kapała Kupazukow hraje serbsku rejwansku hudźbu, jej poboku je dalša pólska kapała. Wšitcy zajimcy su wutrobnje přeprošeni sobu rejwać, spěwać a so po słowjanskim wašnju zabawjeć. Organizatorojo wjesela so na bohate wobdźělenje.
Łaz (CK/SN). Hdźež so w Roholnju (Riegel) šulerski bus zawróća, chce Łazowska gmejna lětsa jězdnju ponowić. To je jedne z dohromady 20 předewzaćow na lisćinje, kotruž je gmejnska rada na swojim wutornym posedźenju jednohłósnje wobzamknyła. Po spěchowanskej směrnicy sakskeho hospodarskeho ministerstwa dóstanu komuny kóžde lěto přiražku za wudźeržowanje dróhow, jeli swoje předewzaća hač do 15. měrca swobodnemu statej přizjewja. Ministerstwo samo poruča přiwzać do lisćiny takrjec rezerwowe naprawy, dokelž komuny pozdźišo žane přidatne projekty přizjewić njemóža.
15.2.2018 – 21.02.2018 Budyski filmowy palast: Black Panther w 3 D: wšědnje 14:30, 17:15 a 20:00 | pj a so 22:45 Disney Prinzessinen Wunschkino: nj 15:00 Wendy 2 – Freundschaft für immer: nj 16:30 Ferdinand – Geht STIERisch ab!: wu a srj 10:00 | nj, wu a srj 11:45 Fifty Shades of Grey – Befreite Lust: wšědnje 14:15 (nimo nj), 17:00 a 19:45 | pj a so 22:30 Die kleine Hexe: wšědnje 14:30 (nimo nj) a 16:00 | wu a srj 9:30 | nj, wu a srj 12:15 | nj 14:15 Hilfe, ich hab meine Eltern geschrumpft: wšědnje 14:00 | wu a srj 9:30 Paddington 2: wu a srj 9:30 Dieses bescheuerte Herz: pj, so, pó a srj 18:15 Coco – Lebendiger als das Leben: nj, wu a srj 11:45 Insidious – The Last Key: pj a so 23:00 Hot Dog: štw, nj a wu 18:15 | pj a so 22:30 Wunder: wšědnje 20:30 Star Wars: Die letzten Jedi: nj 11:30 Jumanji – Willkommen im Dschungel: wu a srj 12:00 Maze Runner: wšědnje 16:30 (nimo nj a pó) a 19:30 (nimo pó)
Kino-ekstra: Lieber leben: pó 17:15 a 20:15 | nj 18:15