Aus der aktuellen Ausgabe vom Donnerstag, 17 Januar 2019

Chětro drohu pytansku akciju je mučny matroza před pobrjohom Awstralskeje zawinił. Na rybjacym kuteru bě so wón w schowanym kućiku spać lehnył. Dokelž tamni na to tukachu, zo je do morja padnył, zahajichu za nim poł dnja trajacu pytansku akciju, na kotrejž so wosom helikopterow a wjacore łódźe wobdźělichu. Hakle potom rybarjo swojeho kolegu pod powjazami ležaceho namakachu. Lochkomyslnosć móhła za namórnika drohe sćěhi měć: Jeničce słužba helikopterow płaćeše 157 000 eurow.

Pjany a bjez jězbneje dowolnosće je šofer awta w Berlinje do parkowaceho awta zrazył a na městnje njezboža dale pił. 39lětny bě w měšćanskim dźělu Rudow chětro dźiwnje jěł a tak zražku zawinił. Jako­ policija dojědźe, sedźeše muž na chódniku, piješe piwo a měješe w awće hišće dalše bleše chmjeloweje brěčki.

Berlin (dpa/SN). Zwjazkowy minister za strowotnistwo Jens Spahn chce hladajo na spochi přiběrace kóšty hladanja zasadnu debatu wo přichodnym financowanju nastorčić. „Dyrbimy dokładnje pruwować, što móža swójby same zdokonjeć a hdźe trjebaja pomoc“, rjekny politikar CDU nowinarjam. Přepytowanje Bertelsmannoweje załožby bě wunjesło, zo přinošk k hladanskemu zawěsćenju dale přiběraceje ličby potrěbnych dla wot nětko­ 3,05 na 4,25 procentow rozrosće. Zastupowacy frakciski předsyda SPD Karl Lauterbach je w tym zwisku swoje ža­danje za „wobydlerskim zawěsćenjom“ wospjetował. Tam dyrbjeli tež zastojnicy a priwatnje zawěsćeni přinošować.

Podstupim (SN/MkWj). Rada za serbske naležnosće Braniborskeje je na swojim wutornym posedźenju w Podstupimje bližace so nowowólby rady Załožby za serbski lud rozjimała. W tym zwisku běchu dotalnych čłonow prosyli, rozprawu wo swojej dźěławosći zapodać, kaž předsyda serbskeje rady Torsten Mak na naprašowanje našeho wječornika zdźěli. Rozprawy chcedźa wužiwać, zo bychu cyłkownje dwanaće kandidatkow/kandidatow za nowu załožbowu radu informowali, kotre nadawki na nich čakaja.

Pobrachowacych fachowcow dla maturantow za wukubłanje zdobyć

Drježdźany/Kamjenica (dpa/SN). Po wjele lět trajacej dobrej nutřkokrajnej konjunkturje z rekordnej ličbu dźěławych a dobrej konsumowej naladu liča sakscy rjemjeslnicy z dobrym lětom 2019. „Branše přesahujo su skazanske knihi w najwjace zawodach derje pjelnjene“, praji rěčnik Zwjazka sakskich rjemjeslnikow Frank Wetzel w Drježdźanach. „Ze zawodami na polu twarstwa a wutwara jako lokomotiwa konjunktury zdawaja so dobre wobroty tež w přichodnych měsacach zaručene.“ Předběh nadawkow w rjemjesle wučinja mjeztym po cyłym swobodnym staće přerěznje jědnaće tydźenjow. „Priwatni přetrjebarjo su wočiwidnje zwólniwi swoje pjenjezy za hódne rjemjeslniske wudźěłki wudać, město toho zo je bjez danje na lutowanske konto donjesu“, Frank Wetzel wuswětla. Sakske rjemjesło je w dobrym połoženju.

Kelko wjeselo wobradźa dźěćom, młodostnym a dorosćenym, na instrumentach hudźić, to nazhonjamy na mnohich zarjadowanjach po wšej Łužicy. Na tamnym boku je to zwjazane z tójšto prócu. Přetož prjedy, hač wustojnje hudźiš, maš zwučować. A wjeselo na instrumenće hrać wuknyć dyrbi tuž na prěnim městnje stać. Prašam so tuž, čehodla wjace staršich, kotřiž­ njemóža swojim dźěćom wopyt hudźbneje šule płaćić, za to srědki njewužiwa, kotrež jim stat přewostaja? To su mjez druhim srědki z kubłanskeho paketa abo přidatne pjenjezy za bjezdźěłnych resp. přijimarjow Hartza IV. Tak swojim dźěćom nažel znjemóžnjeja wotkryć sej swět fantazije, zwjazany ze swětom wuknjenja. Přetož tež to zaběra z hudźbu zaruča, njekubłać so jenož na hudźbnym polu. Wučerjo w šulerjach tak zdobom socialne kompetency wuwiwaja. A to wšak trjebaja runje te dźěći, kotrychž starši telko pjenjez nimaja. Milenka Rječcyna

Grünhainichen (dpa/SN). Sakska chce małe a srěnje předewzaća pohonjeć, zo so na mjezynarodne wiki zwaža. Za to planuje hospodarske ministerstwo lětsa wjace hač 150 aktiwitow we wjace hač 40 krajach, kaž wčera zdźěli. Mjez druhim steja informaciske a poradźowanske dny, jězby předewzaćelow a wobdźělenja na wikach na programje. W srjedźišću steja susodne kraje Pólska, Čěska, Awstriska a Šwicarska. Wone so wosebje derje za prěnje kročele eksporta na wukrajnych wikach hodźa. Hospodarski minister Martin Dulig (SPD) planuje jězby do Nižozemskeje, Danskeje a Estiskeje.

Tuchwilu so wosom procentow zawodow swobodneho stata we wukrajnym wikowanju angažuje, cyłoněmski přerězk wučinja jědnaće procentow. „Eksport wotkrywa přidatne wične potenciale a móže so za małe a srěnje firmy z motorom rozrosta stać“, rjekny Dulig wčera zastupnikam Wonkohospodarskeje iniciatiwy Sakskeje. Tak su lěta 2016 załoženu „ofensiwu internacionalizowanja“ hač do lěta 2020 podlěšili. Z njej móža zawody, kotrež njeběchu dotal we wukraju aktiwne, pjenježnje podpěrać.

Berlin (dpa/SN). Fachowcy z tym liča, zo bórze nowa žołma gripy w Němskej wudyri. Druhi tydźeń januara su dotal 1 260 wobkrućenych padow gripy Institutej Roberta Kocha zdźělili. To je najwjetša ličba sezony, kotraž bě so w oktobru zahajiła­ a w decembru přiwótřiła. Dotal je jědnaće ludźi na gripu zemrěło.

Ruce do klina złožić njeje Gretel, kaž ju ludźo mjenowachu, zamóhła. Nětko je Margarethe Johanna Nowak z koła aktiwistow na prawdu Božu wotešła: w starobje 92 lět je Budyšanka zemrěła.

Zeznach ju po lěće 1990, jako so tež w sprjewinym měsće Budyšinje skupinka Černobylskeje iniciatiwy za to zasadźowaše, wot atomoweje hawarije strowotnje škodźenym dźěćom přebytk we łužiskej přirodźe zmóžnić. Wot toho časa je kóžde lěto skupina běłoruskich dźěći tež nam do Stróže na zahrodowy swjedźeń přijěła, a přeco bě Gretel Nowakowa jedna z prěnich a přeco zaso słyšach jeje prašenje: Móžu wam pomhać?

Měrna atmosfera po cyłym domje zmóžnja wuknjenje a kreatiwitu

Zastupju do předrumnosće noweho horta­ w Pančicach-Kukowje. Tam strowi mje hodowny štom, rjenje z hwězdami a swěčkami pyšeny. Hnydom za nim na sćěnje wisa drjewjany křiž. Napřećo pak je informaciska tafla. Tam namakam mjena a fota wšitkich w dźěćacym dnjowym přebywanišću skutkowacych kubłarkow. Hišće wisa tam tež informa­ciske łopjeno wo wšitkich zarjadowanjach, kotrež su dźěći loni derje na „swjedźeń Chrystusoweho naroda“ přihotowali. Namakam pokiw na dźeń wote­wrjenych duri 11. januara 2019, njecyły měsac po wotewrjenju noweho horta. Štož je so z marodneho betonoweho twarjenja stało, je widźenjahódne. Gmejna je tójšto pjenjez nałožiła a z pomocu spěchowanskich pjenjez rjane přebywanišćo za šulerjow a jich kubłarjow natwariła. Nošer horta je Miłočanski Křesćansko-socialny kubłanski skutk.

Fachowa wuměna

Přewjedu wolejbulowy turněr

Wólnočasni wolejbulisća Žołto-módrych Kulow zarjaduja póndźelu, 4. februara, w Kulowskej spor­towni wólnočasny wolejbulowy turněr z mjenom „Ptačokwasny turněr“ za šěsć prošenych mustwow. W 19 hodź. halu wotewru, hrać započnu poł hodźiny pozdźišo.

Hraja koparski tenis

Sportowy zwjazk wokrjesa Budyšin chce dwě sportowej družinje kombinować a turněr w koparskim tenisu přewjesć. Dwanaće přizjewjenych cyłkow budźe so na štyrjoch hrajnišćach wu­bědźować. To zdźěli zamołwity turněra Tomaš Henčl. Prěni raz přewjedu tajki koparski tenis w sportowej hali a nic na hrajnišću pod hołym njebjom. W sportowni na Budyskim Třělnišću nastupja tuž 15. februara wot 19 hodź. stajnje třo hrajerjo dźesać mjeńšin přećiwo sebi.

Započnu zaso kehelować

Kehelerjo Sokoła Ralbicy/Hórki přihotuja so na zbywace winowatostne dypkowe hry sezony 2018/2019. Srjedź februara nastupja we Wulkej Dubrawje, w měrcu dwójce na domjacych čarach w Rakecach a srjedź apryla w Běłym Chołmcu.