Aus der aktuellen Ausgabe vom Dienstag, 25 Juni 2019

Waren (dpa/SN). Wjesnjanosća kónčiny w mecklenburgskej jězorinje, hdźež je so wčera njezbožo z dwěmaj jetomaj Zwjazkoweje wobory stało, sej žadaja, zo njeměli wojerske mašiny tak nisko nad dowolowym regionom lětać. Turisća ni­maja žane zrozumjenje, čehodla lětadła runje nad jězorinu zwučuja. Hladajo na wčerawši pad je wulke zbožo, zo njeje so nichtó z nich abo wobydlerjow zranił. W kónčinje přebywaja kóžde lěto staty­sacy turistow. Tak ma so wujasnić, hač su tajke zwučowanske lěty nad kónčinu woprawdźe­ trěbne a zmysłapołne. Jedyn dźeń­ po njezbožu přepytuje wo­jerske lětarstwo jeho přičiny. Cyłkownje 300 přisłušnikow Zwjazkoweje wobory pyta za dźělemi znjezboženeju jetow a zawěsća městnosć zražki. Nanajnuznišo maja nětko zapisowak nańć, zo móhli zražku dokładnje přepytować.

Při zwučowanju stej wčera wojerskej jetaj nad mecklenburgskej jězorinu do so zrazyłoj. Jedyn pilot móžeše so wuchować. Jeho dowjezechu do chorownje. Tamny njeje njezbožo přežiwił.

Zastupjerjo mjeńšin wo kulturnym namrěwstwje rěčeli

Zhorjelc (SN/bn). We wobłuku wotewrjenja wosebiteje wustajeńcy Šleskeho muzeja Zhorjelc pod hesłom „Narod a mjeńšina w Europje 19. a 20. lětstotka“ je towarstwo Centruma za kulturu a stawizny minjeny štwórtk diskusijny forum „Mjeńšiny Europu wobohaćeja“ wuhotowało. Přeprošeni běchu zastupjerjej w Němskej připóznatych ludow resp. ludowych skupin kaž tež reprezentanća Němcow w Madźarskej resp. Pólskej. Nadrjadowana tema, kotruž přitomni rozjimachu, bě prašenje, hač, a jeli, kak hodźało so kulturne herbstwo narodnych mjeńšin dale dawać a tak rólu mostytwarca sylnišo zabrać.

Lońšu periodu horcoty mam hišće derje w pomjatku. Składy dnowneje wody njejsu dawno hišće znowa pjelnjene, da wěšća meteorologojo za jutře snano dotal najhorcyši dźeń lěta. A wědomostnicy Lipšćanskeho Helmholtz-centruma w monitorje suchoty sewjerej a wuchodej kraja wobkrućeja, zo tam woda w pódźe pobrachuje. Tež Łužica je wot toho potrjechena. Je prašenje, hdy Čorny Halštrow blisko Złeho Komorowa wusaknje. Wobraz Łobja w Drježdźanach niłkeje wody dla runje tak znjeměrnja. Wopokaza so nadźija, běštej lońšej horcota a suchota woprawdźite wuwzaće, jako njespjelnjene přeće? Rěč je wo tym, zo móhła jutřiša srjeda junijsku rekordnu temperaturu w Němskej – 38,2 stopnjej celsija z lěta 1947 w Frankfurće nad Mohanom, a to wězo w chłódku – pře­trjechić. Škody, dokelž njeje wody dosć, móža so na ratarstwo, na lěsy, wosebje na lisćowe, ale tež na nakładne łódźnistwo bolostnje wuskutkować. Horcoty dla stonać pak ničo njepomha. Axel Arlt

Karpacz (JBR/SN). Štóž chce raz westernsku naladu kaž w ameriskich filmach wo dźiwim zapadźe dožiwić, njetrjeba ekstra do USA lećeć. W pólskim Karpaczu, pod horu Sněžka maja hižo něšto lět městačko Western city. Přez cyłe lěto pokazuja tam cowboyjow na konjach, dwuboje rewolwerowcow, nadpad na banku, ale tež indianske reje. W saloonje poskićeja turistam napoje a słódne jědźe. Samo indianski lód móžeš sej zesłodźeć dać. Nawuknyć móžeš nože mjetać a na „ćělcu“ jěchać. W lětnich měsacach wabja z rodejowej pokazku. Na konjacych wubědźowanjach wobdźěleja so tež rady „cowboyje“ z Čěskeje a Awstriskeje.

Tajku westernsku naladu dožiwić smědźeše njedawno skupina Budyskeho Towarstwa partnerskich městow, kotraž bě na wopyće partnerskeje Jelenjeje Góry. Budyšenjo zetkachu so tohorunja z přećelemi čěskeho Jabloneca nad Nisou.

Na lětušim lětnim programje westernskeho městačka steji tež „europske wubědźowanje cowboyjow“, a to we wšelakich disciplinach. Nimo toho móža tam zajimcy swoje brunače, čornaki a šumjele wšěch móžnych rasow předstajić.

Wostrowc (dpa/SN). Sportowy swjedźeń, prominentna podpěra a piwowa iniciatiwa: Wostrowc je minjeny kónc tydźenja jasny signal přećiwo prawicarskemu zarjadowanju „Festiwal tarč a mječ“ wuprudźił. Na nje bě jasnje mjenje ludźi přišło hač wočakowane. „Mój zaćišć je, zo suma protestow ciwilneje towaršnosće skut­kuje. Neonacije widźa, zo njejsu tule witane“, zwurazni předsyda nawodnistwa załožby Mjezynarodneho zetkawanskeho centruma (IBZ) Marijiny doł Michael Schlitt.

Hišće njedźelu je policija pozitiwnu bilancu wozjewiła. Tak su zhromadźizny a zarjadowanja měrnje wotběželi. Cyłkow­nje registrowachu 32 njeskutkow. Něhdźe 500 do 600 wobdźělnikow je na festiwal přišło. Poprawom ličachu z něhdźe 2 000 neonacijemi. Policija bě z něhdźe 1 400 zastojnikami ze Sakskeje, Durinskeje, Berlina a Saksko-Anhaltskeje zasadźena.

W nalěću nastajene baćonjace hnězdo w Miłoćicach stej nowej wobydlerjej derje přiwzałoj a matej mjeztym tři młodźata. Te su nětko wulke dosć, zo móžachu jim minjeny pjatk rynku na nohu tyknyć. Stefan Siegel z Njeswačanskeje ptačernje z pomocu Miłočanskej­e Misalic firmy, kotraž je z techniku darmotnje pomhała, młodym baćonam rynki přitykny. Młodźata w Ralbicach, Sernjanach a Nuknicy su wčera z wotpowědnymi rynkami „wupyšili“, we Worklecach a w Njebjelčicach je to přichodny tydźeń planowane. Nětko so nadźijeja, zo so lětuše młodźata zaso do Łužicy wróća a wobstatk baćona tu zaručeja. Foto: Hubertus Šwejda

Dobrošicy (aha/SN). Hnydom po přewróće 1990 wutworichu w Dobrošicach kapałkowu radu z Hubertom Žurom na čole, zo móhli sej na městnje baraki porjadnu kapałku natwarić. Hižo 1991 su ju Janej Křćenikej poswjećili. Wot toho časa tam stajnje 24. junija swjedźeń přewjeduja. Wčerawši zahajichu po zwučenym wašnju z Božej mšu, kotruž swjećeštaj fararjej Měrćin Deleńk a Gerat Wornar. Posledni mjenowany mjeztym dźesać lět kóždu srjedu w Dobrošicach kemše swjeći, za čož so jemu Chróšćanski wosadny farar wosebje dźakowaše. W prědowanju dopominaše Měrćin Deleńk na stawizny prěnjeje drjewjaneje kapałki w Dobrošicach.

Po třoch lětach zaso rězbarski sympozij we Wojerecach

Wojerecy (AK/SN). Pod hesłom „Duša – čłowjek – zwěrjo“ wotměwa so wot minjeneho štwórtka dwanaty rězbarski sympozij we Wojerowskim zwěrjencu. Hač do 2. julija skutkuje tam pjeć wobdźělnikow z Němskeje, Awstriskeje, Ruskeje a Armenskeje. Zarjadowanje organizuje Wojerowska kulturna a zwěrjencowa towaršnosć zhromadnje z wuměłskim ateljejom „Wera“ Martiny Rohr­moser-Müller z Wulkich Ždźarow. Za­łožba Łužiska jězorina projekt z 5 000 eurami­ podpěruje.

Hamor (AK/SN). Do bywšeho Klětnjanskeho gmejnskeho zarjadnistwa ma bórze nowe žiwjenje zaćahnyć. Tam nastanu přichodnje nowe słužbne rumnosće za biosferowy rezerwat Hornjołužiska hola a haty kaž tež za lěsnistwowy wobwod Hornja Łužica. Na swojim zašłym posedźenju Hamorscy gmejnscy radźićeljo wobzamknychu, nimale tysac kwadratnych metrow wulku ležownosć z bywšim gmejnskim zarjadnistwom za 89 000 eurow­ předać. Nowy wobsedźer je statny zawod centralny płoninowy management Sakska (ZFM).

W mjeztym prózdnym twarjenju bě­štej hač k rozpušćenju zarjadniskeho zwjazka Holanske wsy Klětnjanske gmejnske zarjadnistwo a pozdźišo běrow wjesneje rady zaměstnjenej. Hižo wja­core razy běchu objekt wupisali. Dóšłe poskitki pak běchu tak snadne, zo dyrbjachu je wotpokazać a wupisanje wo­spjetować. Po zašłym dóńdźeštej dwaj poskitkaj. Mandźelskaj z Delnjeho Wujězda poskićištaj 89 000 eurow a chcyštaj w twarjenju dowolowe bydlenja a w přizemju běrowy zarjadować. Kónc meje pak wonaj swój poskitk cofnyštaj, kaž komornik Hamorskeje gmejny Ulrich Bänsch rozłoži.

Kulow (GM/SN). Z małym swjedźenjom zakónčichu minjeny pjatk w Kulowskej měšćanskej piwarni wulkoinwesticiju, kotruž běchu před lětomaj z ponowjenjom přijimarnje surowiznow zahajili. Najnowša akcija bě, zo zatwarichu do kotołnje dospołnje nowu techniku. Dohromady su w minjenymaj lětomaj 1,2 milionaj eurow nałožili.

Spočatk apryla běchu tři nowe kotoły a k tomu najwšelakoriše roły a dalšu techniku z Bamberga do Kulowa přiwje­zli. Wot toho časa je tam stajnje hač do 15 rjemjeslnikow wšitko instalowało. Wšón čas wšak so nichtó Kulowskeho piwa wzdać njetrjebaše, dokelž běchu do toho dosć „chmjeloweje brěčki“ nawarili.

Kotołnja je takrjec wutroba piwarnje, hdźež zakłady piwa tworja. Nětko maja w njej tři mjeńše kotoły město jednoho. Lěpšina je, zo móža w druhim kotole hižo nowe piwo warić započeć, byrnjež wone w prěnim hišće hotowe njebyło. Tak móža družiny spěšnišo měnjeć a su na te wašnje fleksibelniši, kaž jednaćel ­Stefan Glaab rozłoži.