Aus der aktuellen Ausgabe vom Dienstag, 21 Januar 2020

Wjedrarjo warnuja znowa před suchim lětom z lokalnymi spadkami

Offenbach (dpa/SN). Špatne powěsće za ratarjow a wobsedźerjow lěsow: Byrnjež so hornja woršta pódy přez bohate spadki w oktobru 2019 wot lońšeje horcoty a z njej zwjazaneje suchoty trochu zhrabała, je połoženje nastupajo włóžnotu we hłubšich worštach pódy z blakami hišće chětro struchłe, kaž Němska wjedrarnja w Offenbachu zdźěla. W cyłkownje njewšědnje suchimaj lětomaj 2018 a 2019 stej předewšěm we wuchodnej Němskej jenož dwě třećinje normalneho dešća padałoj. We wšej pódźe hač do 1,80 metrow hłubokosće je situacija we wulkich dźělach Němskeje přeco hišće dramatiska, fachowcy zwěsćeja.

Na Zelenym tydźenju w Berlinje zetkawa so swět. Mnozy wustajerjo popisuja swoje wudźěłki mjez druhim w swojej maćeršćinje, z čimž zbudźeja wćipnosć wopytowarjow. Tež Serbja su na wikach zastupjeni. Tam přitomni wustajerjo maja flajery a dalše wabjenske srědki w małych formatach sobu, kotrež su zdźěla tež serbskorěčne. Hewak pak někajki serbski napis w hali Sakskeje a Braniborskeje nihdźe njewidźiš. Produkty, kotrež předewzaća z dwurěčneho regiona poskićeja, maja němske pomjenowanja. Po rozmołwje z předewzaćelemi pak zwěsćich, zo maja ideju, to, štož poručeja, tež serbsce popisać, za rozmyslowanjahódnu. A što budźe z wulkimi plakatami na sćěnach halow? W sakskej hali wabja na tajkim z debjerku jejkow w delnjołužiskej drasće. Hač so to­ wšo změnić hodźi? Prašenje to sebjewědomja Serbow a marketinga Sakskeje, Berlinske zelene wiki tež jako serbske jewišćo­ wužiwać! Milenka Rječcyna

Praha (ČŽ/K/SN). Bychu-li w Čěskej nětko parlamentne wólby byli, by dźewjeć stron do njeho zaćahnyło. Tajku konstelaciju na politiskej scenje wuswědča najnowše naprašowanje přez agenturu STEM. Wěsće dobyło by znowa hibanje njespokojnych ANO premiera Andreja Babiša, dokelž by so za nje 33,6 procentow wolerjow wuprajiło, dypk wšak to mjenje hač w nowembru. Z jenakimi 12,5 procentami přihłosowanja slěduja ODS kaž tež Piraća, wobě stronje ze snadnym přidobytkom. Ze 7,1 procenta na 8,2 procentaj zlěze KSČM, z čimž so komunisća na štwórte městno polěpšeja. ČSSD wostawa jako pjata na 6,4 procentach. „Pola małych stron je situacija wahanja a přesłapjenja wolerjow dla njewěsta, tak zo su změny mjenje bóle připadne“, ma agentura STEM za to. Tónkróć su TOP 09, KDÚ/ČSL a STAN móhli barjeru pjeć procentow přeskočić a sej tak zaćah do delnjeje komory zawěsćić. Prěnjej dwě mjenowanej stronje stej na hłosach přibyłoj, STAN pak spadny ze 7,2 na 5,5 procentow. SPD předewzaćela Tomija Okamury zjědźe z 9,1 procenta na 5,6 procentow. Svobodovcy dóstachu 1,8 procentow, Zeleni dyrbja so dale z chuduškim jednym procentom spokojić.

Budyšin (SN/CoR). Hižo 22. raz stej Ludowe nakładnistwo Domowina a Załožba za serbski lud minjeny pjatk wječor pisacy dorost na mytowanje swojeho literarneho wubědźowanja přeprosyłoj, a to w Budyskim „Wjelbiku“. Dohromady 16 młodych awtorkow a awtorow so wobdźěli, a runje telko mytow je jury tež spožčiła, nic pak přeco prěnje.

Dujerjo kapały Horjany su minjenu sobotu na Berlinskim Zelenym tydźenju publikum z wobšěrnym programom zawjeselili. Na jewišću sakskeje hale je moderator a trompetar Uwe Macka wopytowarjow dwurěčnje postrowił a jim łužisku domiznu hudźbnikow předstajił. Trójce 45 mjeńšin podachu so Horjenjo na hudźbnu „swětojězbu“ a zahudźichu čěske a morawske polki a walčiki, serbske pěsnički kaž tež němske a jendźelske title. Samo nowej polce „Mařenka“ a „Haječek“ stej w stajnje wulkej syle młodych a staršich přihladowarjow kołowokoło jewišća wulki aplaws žnjałoj. Foto: Klawdija Hejdušcyna

W Budyšinje móža sej ludźo wulke přeća spjelnić. Při tym pak dźe wo zwoprawdźenje zjawnych přećow. A za to ma sprjewine město wobydlerski fonds 10 000 eurow.

Budyšin (SN). Snano pobrachuje w bydlenskej štwórći ławka, na kotrejž móhli wobydlerjo sedźo bjesadować. Abo woni njejsu hišće ženje w bydlenskej štwórći swjećili. Nětko je składnosć, to změnić. Próstwa měšćanskemu zarjadnistwu hač do 29. februara wo pjenježnu podpěru so wudani. Budyske měšćanske zarjadnistwo přewostaja ze swojeho etata, kotryž bu před třomi lětami zarjadowany, tež lětsa 10 000 eurow. Pjenjezy su myslene za naležnosće, kotrež su na dobro wobydlerjow.

Gmejnska rada wotpowědnej zrěčeni z LEAG wobzamknyła

Trjebin (AK/SN). Přesydlenje woby­dlerjow, kotrež su wot wuhloweje jamy Wochozy (Nochten) potrjechene, je w dalokej měrje wotzamknjene. Su to přede­wšěm wobydlerjo we wobłuku Trjebina-Za Goru (Trebendorf-Hinterberg). To potwjerdźi wjesnjanosta Waldemar­ Locke­ (CDU) na posedźenju gmejnskeje rady spočatk januara. Z jeničkim napřećiwnym hłosom wobzamkny wona zrěčenje wo wotkryću Trjebina za 1. wotrězk Wochožanskeje jamy a tak mjenowanu wuměnu ležownosćow mjez koncernom LEAG a gmejnu Trjebin. Wotkrywanske dojednanje w detailu rjaduje,­ kotre płoniny, dróhi, chódniki a dalše wobłuki ma LEAG gmejnje přepodać. Wone twori wažny zakład doł­hodobneje prawniskeje wěstoty za wobaj bokaj. Z postupowanjom sćěhuje gmejnska rada poručenje wuběrkow.

Kamjenc. Serbski ludowy ansambl přeproša wšitke dźěći a dalšich zajimcow na swoje premjerne předstajenje „Zabyty ptači kwas“. Prěnjej razaj pokazaja jón jutře, srjedu, 22. januara, we 8.30 a w 10.30 hodź. na žurli Kamjenskeho hotela „Město­ Drježdźany“. Dalše předstajenje budźe pjatk, 24. januara, w 10 hodź. w Lubijskej wikowej hali.

Wo stawiznach hwězdnow

Budyšin. Štó je hwězdno Wulki wóz pomjenował? Wotmołwy na tajke a dalše prašenja wokoło hwězdow a njebja dóstanu młodźi hobbyjowi astronomojo jutře, srjedu, w Budyskej šulskej hwězdarni. Wot 19 hodź. wěnuja so tam wosebitosćam a stawiznam hwězdnow, kotrež su tuchwilu na zymskim njebju widźeć. Zastup płaći na wosobu tři eura, potuńšene dwaj euraj. Zajimcy njech so prošu pod tel. čo. 03591/ 7 60 71 26 abo z mejlku pod přizjewja. Dalše informacije pod www.sternwarte-bautzen.de

Z policistom so rozmołwjeć

W Nowej Wjesce hižo dlěši čas rěčnišćo Klóšterskeje wody wobnowjeja, a to ze zaměrom, zo móže woda bórze zaso bjez haćenjow přez wjes ćec. Twarske dźěła maja hač do 31. januara skónčene być. Termin chcedźa dźěłaćerjo na kóždy pad dodźeržeć. Lětuša njewšědnje miła zyma jim tuž zmóžnja bjez přetorhnjenja dale twarić. Wutwar hrjebje płaći dohromady 1,7 milionow eurow. Worklečanska gmejna je so dołho prócował rěčnišćo wobnowić, a naprawu tuž jara wita – tež tohodla, dokelž za twarske dźěła ničo ze swójskeje kasy płaćić njetrjeba. Kóšty přewozmje Sakski krajny zarjad za rěčne zawěry. Foto: Damian Dyrlich

Pančicy-Kukow (SN). Klóšterski a swójbny swjedźeń Budyskeho wokrjesa njeje mjeztym jeničce tradicija, ale zetkanišćo syłow ludźi z cyłeje Sakskeje. Lětsa wotměje so wjeršk z nadregionalnym připóznaćom w klóštrje Marijinej hwězdźe w Pančicach-Kukowje 21. junija. Abatisa Gabriela Hesse a Budyski krajny rada Michael Harig (CDU) přewozmjetaj wospjet patronat. Hač do 29. februara móža so zajimcy za podawk na internetnej stronje Křesćansko-socialneho kubłanskeho skutka Sakska z.t. Miłoćicy pod www.csb-miltitz.de přizjewić.

Kmótaj kaž tež zarjadowarjo, ke kotrymž słušeja gmejna Pančicy-Kukow, CSB a Sakski krajny kuratorij wjesny rum z.t. so hižo nětko na wulku ličbu wustajerjow a hosći wjesela. Namołwjene su tuž towarstwa, kulturne skupiny a wikowarjo, so za swjedźeń požadać a tak k bohatemu kulturnemu, kulinariskemu a informatiwnemu dnjej přinošować.