Aus der aktuellen Ausgabe vom Dienstag, 31 März 2020

Rom (dpa/SN). W Italskej maja łahodnu nadźiju, zo so pandemija koronawirusa dla poněčim wosłabja. Rozrost ličby pozitiwnje testowanych wosobow je tak snadny kaž do zahajenja cyłokrajneho zakaza, dom wopušćić. Najebać to chce knježerstwo wobmjezowanja wosobinskeje swobody wobydlerjow hač k jutram, 12. apryla, podlěšić, kaž tamniše strowotniske ministerstwo zdźěla. To wotpowěduje tež poručenjam komisije fachowcow.

Ličba z wirusom natyknjenych je wčera wo 1 648 na 75 528 přiběrała, tak mało kaž po 10. měrcu nic. Ličba zemrětych wostawa přiwšěm wulka: Wčera je 812 ludźi zemrěło, dohromady je jich dotal 11 591. Wot 10. měrca njesmědźa so ludźo w Italskej hižo swobodnje hibać. Šule su zawrjene, tójšto fabrikow tohorunja. Wukazy płaćachu poprawom hač do 3. apryla. „Dźemy do praweho směra. Njesměmy pak swoju strategiju ani kuska změnić“, rjekny prezident narodneje strowotniskeje rady Franco Locatelli. Nětko chcedźa hač k jutram čakać a potom wo móžnych dalšich kročelach rozsudźić.

Peter Čačko rozprawja z Bratislavy za Serbske Nowiny

Zo změje so z konserwatiwnej stronu Obyčajní ľudia a nezávislé osobnosti (OL’aNO) přichodnje ličić, bě dźiwajo na jeje spochi rosćace připóznaće w dowólbnych woprašowanjach wočakować. Při­wšěm bě překwapjace, zo OL’aNO parlamentny wotum kónc februara tak jasnje dobudźe. Zdobom wone stronu SMER-Socialna demokratija, kotraž bě tři wólbne periody knježiła, čućiwje porazy. OL’aNO faworizowaše zwoprědka koaliciju ze stronomaj Sme rodina a Sloboda a Solidarita (SaS) kaž tež ze stronu Za l’udi, załoženej wot něhdyšeho prezidenta Andreja Kiski hakle loni w septembru. Šef OL’aNO Igor Matovič zamó w běhu dweju tydźenjow nowe knježerstwo zestajeć. Te móže so w narodnej radźe na wustawowu wjetšinu zepěrać, ma dźě štworokoalicija 95 z cyłkownje 150 sy­dłow w zakonje wobzamkowacym organje. Šěsć stron a hibanjow je w nim zastupjenych.

Knježerstwa spytaja tuchwilu z wosebitymi programami nuzowe połoženje wjetšich a małych předewzaćelow wolóžić. Sakska – hinak hač tamne zwjazkowe kraje – tajki swójski podpěrowanski program hišće nima. Ćim wažnišo je, zo po­trjecheni sami namjety přidźěłuja, kaž činja to nětko sakscy hudźbnicy. Woni najlěpje wědźa, što trjebaja. W padźe swobodnych hudźbnikow – to płaći tež za wjetšinu tamnych wuměłcow – hišće k tomu přińdźe, zo móža zwjetša tež pod normalnymi wuměnjenjemi lědma wot toho žiwi być, štož jim kreatiwne skutkowanje wunjese – hačrunjež hudźba k žiwjenju runje tak słuša kaž wšědny chlěb pjekarja. Berlinski spěwytwórc Paul „Geigerzähler“ Nagel je nětko – nimo livestream-koncerta – zajutřišim swój bandcamp-account rozšěrił, zo móhli ludźo tam jeho spěwy kupić, wšako „je to runje ćežko z gažemi a fyziskimi zynkonošakami“, kaž Nagel sam praji. Cordula Ratajczakowa

CHORHOJ susodneje Čěskeje swjeći tele dny stoćiny. Wčera, 30. měrca, bě tomu 100 lět, zo parlament po Prěnjej swětowej wójnje załoženeho stata wobzamkny, dać sej jako statny symbol chorhoj z wodorunej běłej a čerwjenej smuhu a módrym klinom w nimaj. Podobu chorhoje toho razu běchu wuměłcy Jaroslav Kursa, Antonín Valšík a František Kysela kolektiwnje namjetowali.

Město Choćebuz tuchwilu wjacore kolesowanske šćežki ponowja. Najwoblubowaniša podłu Sprjewje ma k jutram dotwarjena być, tuchwilu pak je wjacorych twarnišćow dla hišće zawrjena. Naprawy zmóžnili su přizwolene spěchowanske srědki 650 000 eurow z krajneho programa Braniborskeje k zesylnjenju regionalneje hospodarskeje struktury. Po informacijach Choćebuskeho měšćanskeho zarjadnistwa přewjeduja twarske dźěła po cyłkownje 12,7 kilometrach na Kórkowym, Sprjewinym a Wjercha Pücklerowym kolesowanskim pućiku. Twarske dźěła su loni nazymu zahajili, zo bychu šćežki k zahajenju noweje sezony hotowe byli. Foto: Michael Helbig

Kamjenska biblioteka je zawrjena, poskića pak digitalnu rumnosć za čitanje a zaběru. W swojej Onleihe ma wjace hač 20 000 ­e-bookow a awdijow a na nowinskim portalu Genios přinoški z wjace hač 1 200 nowin a časopisow. Wuknjacy móža so na Munzingsku datowu banku ze šulerskim Dudenom a na Brockhaus-leksikon z poskitkami w předmjetach němčina, jendźelšćina, francošćina, łaćonšćina a matematika złožować. Foto: Kamjenska měšćanska biblioteka G. E. Lessinga

Šule w Sakskej su mjeztym hižo druhi tydźeń koronawirusa dla zawrjene. Přiwšěm maja kubłanišća tak mjenowane nuzowe zastaranje zaručić. Tak je tomu tež na Wóslinčanskej Křesćanskej zakładnej šuli.

Wóslink (DJ/SN/MiR). Wšitcy wučerjo su do nuzoweho zastaranja šulerjow zapřijeći. Woni zawěsćeja zastaranje dźěći w horće, a to wšědnje wot 6 do 15 hodź. Wučerka Daniela Jawinski wuwučuje poprawom šulerjow wot jědnaće lět na Ewangelskej srjedźnej šuli Wóslink. Z wulkim wačokom hrajkow pak poda so wona zańdźeny štwórtk na słužbu w zakładnej šuli. Z nazhonitej kubłarku staraštej so wonej wo pjeć šulerjow. Mjez druhim su zhromadnje za jutry paslili, so dołho wuchodźowali a sej w gmejnskim centrumje hrajkali.

Hódnoćić staw serbskeje narodneje drasty wostanje zaměr kulturneho towarstwa

Wojerecy (SN/MiR). Zaměr Towarstwa za hajenje regionalneje kultury srjedźneje Łužicy we Wojerecach, přewjesć pohó­dnoćenje na temu serbska narodna drasta dale wobsteji, tež hdyž tuchwilna koronapandemija dźěławosć haći. Ewaluaciju chcedźa nimo wšitkich zadźěwkow zahajić. Tole zdźěli projektna wjednica projekta Jadwiga Pjacec. „Mamy-li dosć informacijow, chcemy je spočatk lěta 2021 wozjewić. Financowanje projekta zmóžnjeja nam spěchowanske srědki sakskeho ministerstwa za wobswět a hospodarstwo.“

Łaz/Wulke Ždźary (AK/SN). Łazowska gmejna chce we Wulkich Ždźarach wopłóčkowu syć dotwarić. Za to budźe trjeba dlěje zapřimnyć do přejězda wsy po B 96. „Nadźijamy so spěšneje realizacije bjez wulkich haćenjow za wobydlerjow a mějićelow předewzaćow přemysła. Časowy plan pak hišće wěsty njeje“, rozłoži tele dny wjesnjanosta Thomas Leberecht (CDU).

Steffen Mühl (Swobodni wolerjo Łaz) je so při dojednanju gmejnskeje rady nastupajo přejězd po B 96 we Wulkich Ždźarach hłosa wzdał. Wotpowědne zrěčenje podpisali su gmejna Łaz, wokrjes Budyšin a Ewag Kamjenc. „Wo dróhotwar stara so Budyski wokrjes, Kamjenska Ewag wo připrawu za pitnu wodu a Łazowska gmejna wo centralne wotwodźenje wopłóčkow, kaž je do předležaceho dokumenta zapisane“, Thomas Leberecht wuswětli.

Wčera w 21.15 hodź. dyrbješe wohnjowa wobora do Brětnje/Michałkow jěć. Wottam bě telefonat dóstała, zo so tam hródź pali. Jako na městnosć dojědźechu, zwěsćichu wobornicy płomjenja na štyristronskim statoku a započachu hnydom hašeć. Tak su jich dalšemu rozpřestrěću zadźěwali. Přez woheń kaž tež při hašenju njeje so nichtó zranił. Njecyłu hodźinu po přijězdźe móžachu kameradojo ze swojej techniku zaso wotjěć. Policija nětko přičinu wohenja přepytuje. Foto: LausitzNews/Toni Lehder