Aus der aktuellen Ausgabe vom Mittwoch, 01 April 2020

Małe swjedźenje rozpušćili

Budyšin. W nocy na wutoru su policisća w Budyskim a Zhorjelskim wokrjesu dodźerženje płaćiwych postajenjow koronowirusa dla kontrolowali. Při tym wobdźěłachu 52 chłostanskich přizjewjenjow přeńdźenja přećiwo zakonjej wo infekciskim škiće dla a kazachu 20 ludźom, zo měli domoj hić. W Budyšinje na přikład słyšachu haru z bydlenja na Hasy Ricardy Huch. Nimo dweju wobydlerjow bě­štaj tam hosćej, a wšitcy štyrjo zhromadnje swjećachu. Podobny pad dožiwichu na Löfflerowej we Wojerecach. 28lětny wobydler bě sej sydom ludźi přeprosył. Woni a dalši w Zhorjelcu, Lubiju a Ottendorfje maja nětko z pokutu ličić.

Serbske Nowiny namołwjeja swojich čitarjow pod nadpismom „Wostanjemy doma!“ dopisować, što za čas koronakrizy doma abo w zahrodce tak činiće. Kak kreatiwni sće a što wam k přeprěčenju tohole ćežkeho časa do mysli přińdźe, z čim móhli so zaběrać? Pisajće nam na . K tomu podajće prošu hesło „Wostanjemy doma!“ Čakamy na waše dopisy, wobrazy a rysowanki a wuprajamy hižo nětko wutrobny dźak. Dr. Christiana Piniekowa z Choćebuza piše:

Tež w času koronawirusa a z nim zwja­zanych wobmjezowanjow w Dźěłanišću za serbske kubłanske wuwiwanje (ABC) w Choćebuzu dale skutkuja. Wjetši dźěl aktualnje jědnaće přistajenych dźěła wot doma na nastawacych wučbnych materialijach na přikład na zestajenju notoweho zešiwka a cejdejce za „Lutk 1“, na nowych stikerach z powěsćowymi postawami, na dalewuwiwanju „Lutka 2“, štož je wšitko za zakładnošulski schodźenk předwidźane. Tež hry a material „Pó droze 2“, „Serbska rěc – dobra wěc 2“ za sekundarny schodźenk a za bilingualnu wučbu w předmjeće stawizny dale wuwiwaja, při čimž maja mjez sobu telefoniski abo internetny zwisk.

Šmrěki a chójny rozmnoženja škódnikow a klimoweje změny dla wosebje wohrožene

Lěs w Hornjej Łužicy steji před wužadanjemi, kotrež njehodźa so hišće wotwidźeć. Škódniki, kaž na přikład skórnik, so dale a bóle wupřestrěwaja. „Hižo měsacy njemóžemy přećiwo nim ničo skutkowne činić. Cyła kulturna krajina hrozy so razantnje změnić“, wopisuje nawoda lěsniskeho wobwoda Hornja Łužica zawoda Sakske lěsnistwo Holm Karraß tuchwilne přewšo chutne połoženje. Wo přičinach, sćěhach a konsekwencach kaž tež wo namołwje wobsedźerjam lěsow je so Andreas Kirschke z Karraßom rozmołwjał.

Kak so hornjołužiskemu lěsej dźe?

H. Karraß: Jeho strowotny staw za­traša. Wosebje potrjechene su šmrěki a chójny, kotrež kulturnu krajinu w Hornjej Łužicy přewažnje tworja. Na wjele blakach, hdźež su jenož šmrěki, hrozy so system sypnyć. Tak zhubja so kompleksne lěsne funkcije, kotrež njewuskutkuja so jenož na wobstatk a předźěłanje drjewa. Samsny zjaw wobkedźbujemy nimo toho na městnach, hdźež předewšěm chójny rostu. Tam je wuwiće trochu słabše, ale zakładnje jenak.

W Kulowje bě za jěcharki a jěcharjow po jutrach start do zeleneje sezony planowany. Z toho pak ničo­ njebudźe. Tež dalše za meju a za junij předwidźane jěchanske turněry su wotprajene respektiwnje přestorčene. Ze serbskim doro­stowym jěcharjom Jakubom Bobku z Worklec je so Kilian Hrjehor rozmołwjał.

Witaj, Jakubje, trjechi to, zo dyrbja tež mnohostronscy jěcharjo treningowu přestawku koronapandemije dla zapołožić?

J. Bobka: Ně, to njetrjechi. Jěcharjo smědźa dale trenować. Wšako dyrbja konje tež zastarane być, a za to dyrbiš swoju ležownosć wopušćić. A nimo toho dyrbja jěchane być. Němske jěcharske zjednoćenstwo spyta z wliwom na politiku zmóžnić, zo smě so kóždy dale wo swo­jeho konja starać.

Trenujeće potajkim dale. Kak tajki trening wotběži, a je někajkich rozdźělow porno časej bjez koronawirusa?