Z alkoholom a bjez dowolnosće
Wojerecy. Prawy čuch mějachu policisća, jako sobotu wječor 21lětneho šofera Opela we Wojerecach zadźeržachu a kontrolowachu. Pola njeho zwěsćichu mjenujcy 0,52 promilow alkohola w kreji. Drogowy test bě tohorunja pozitiwny. Skónčnje so tež hišće wukopa, zo młody muž scyła žanu płaćiwu jězbnu dowolnosć njeměješe.
Bičwolejbulnišćo we Worklecach je mjez druhim w serbskej młodźinje chětro znate městno. Hakle zašłe lěto je młodźinske wusyłanje Radijo Satkula na swojej kóždolětnej bičwolejbulowej turje we Worklecach pozastało.
Hrajnišćo bu w lěće 2006 natwarjene. Lětsa srjedź oktobra započachu z wutwarom wobstejaceho bičwolejbulnišća na dwupólne hrajnišćo. Wotzamknjenje projekta je za kónc meje přichodneho lěta planowane. Naprawu z pomocu dawkowych srědkow na zakładźe wobzamknjenja etata Sakskeho krajneho sejma sobu financuja.
Youssoufa Moukoko, tute mjeno sće w minjenych tydźenjach zawěsće słyšeli abo čitali. W hrě přećiwo Hertha BSC Berlinej bu kopar Borussije Dortmund (BVB) jenož dźeń po swojich 16. narodninach do partije zaměnjeny. Z tym je wón w stawiznach zwjazkoweje koparskeje ligi najmłódši zasadźeny akter scyła. Diskusije běchu wulke, hač njeje za njeho hišće přezahe pola profijow sobu hrać. Tam wšak knježi wosebje wulki ćišć z medialneje kaž tež fanoweje strony. Moje měnjenje: Fyzisce kaž tež psychisce so młode talenty hižo wot zažneje staroby w koparskich internatach na čas jako profijowy kopar přihotuja a dóstanu při tym wulku podpěru wot najlěpšich nazwučowarjow a samo tež sportowych psychologow. Sym jara wćipny na karjeru młodostneho.
Drježdźany (B/SN). Drježdźansko-Mišnjanske biskopstwo je najstarše na wuchodźe Němskeje. Jeho dieceza přihotuje dostojny jubilej pod motom „100 dobrych přičinow“. Předwčerawšim, na předwječoru prěnjeho adwenta, je biskop Heinrich Timmerevers z liturgiskim nyšporom w Lipšćanskej propstowskej cyrkwi swj. Trojicy jubilej swjatočnje zahajił. Symbolisce chcedźa jubilejne lěto přewodźeć z łódźu, kotraž často cyrkej symbolizuje. „Wona wjedźe swojich wěriwych přez najwjetše wichory časa a bjerje nam strach“, je biskop Timmerevers přeswědčeny. Wosebity dźeń biskopstwa budźe klětu 20. junija při Łobju w Drježdźanach.
Wita wuprajenja bamža
Erfurt (B/SN). Erfurtski moralteologa Josef Römelt wita wuprajenja bamža Franciskusa k homoseksualnym žiwjenskim zhromadnosćam. „Bamž tłóči w katolskej cyrkwi na nowe zrozumjenje, kotrež tež runosplažnosć lubosće w swojej hłubokej čłowjeskosći respektuje a do towaršnosće integruje. Při tym wabi wón zdobom za diferencowane zrozumjenje žiwjenskich formow.“
Přećiwo znjewužiwanju