Aus der aktuellen Ausgabe vom Dienstag, 01 Dezember 2020
Nowy centrum budźe dróši
Rozmysluja wo powjetšenju Koprčanskeje wodočisćernje
Bukecy (CS/SN). Ze změnjenym naćiskom za nowotwar kulturneho a zetkawanskeho centruma w Rodecach (Rodewitz) su so čłonojo Bukečanskeje gmejnskeje rady na swojim zašłym posedźenju zaběrali. Wotpowědne podłožki je jim Budyski planowar Falko Hinz rozłožił, po tym zo běchu radźićeljo wjacore změny namjetowali. Nimo toho běchu so porno prěnim planam twarske płaćizny změnili. Kaž Falko Hinz rjekny, móže wón tuchwilu kóšty jenož trochować, dokładne wobličenje ma klětu kónc januara předležeć. Hižo nětko pak je jasne, zo spočatnje planowane 1,4 miliony eurow dawno njedosahaja. Tuchwilu liča z něhdźe 2,1 milionom eurow. Dalše změny su hižo nětko wotwidźeć, dokelž so tež koronowa pandemija na twarske płaćizny wuskutkuje.
Poradźuje při telefonje
Pančicy-Kukow. Přiwótřenych koronowych postajenjow dla so w zarjadniskim zwjazku Při Klóšterskej wodźe tuchwilu žane wosobinske rěčne hodźiny změrca njewotměja. Za to pak poskićuje Eduard Luhmann telefoniske rěčne hodźiny, a to pod telefonowym čisłom 035796/ 946 117. W decembru su slědowace terminy stajne wot 16 do 18 hodź. předwidźane: wutoru 8. a 15. decembra kaž tež štwórtk, 10. a 17. decembra.
Wšědnje woknješko wočinić
Budyšin. Wot dźensnišeho je adwentny online-kalender literarneho konopeja přistupny, a to jako žortna grafika Štefana Hanuša. Lětsa njechowaja so za woknješkami jenož literarne teksty, ale tež natočenja a wideja z wubranymi chłóšćenkami serbskeje literatury, hudźby a samo reje. Słyšeć su mjez druhim Gabriela Marija Šmajdźina, Měrana Cušcyna na Jurji Koch. Kalender namakaće pod http://www.literarny-konopej.de/kalender/2020. Přidata je dale informacija, hdźe je kniha abo CD w poskitku.
Spožčeja kniham druhe žiwjenje
Kamjenc (SN/MWj). Što činiš poprawom ze starymi a hižo njenahladnymi knihami? Najjednoriše je, hdyž je do stareje papjery daš, přetož najwjetši dźěl knihow njejsu někajke luksusowe twory, ale móžeš je jenož krótki čas wužiwać. Po wšěm swěće kóžde 30 sekundow jednu publikaciju ćišća. W Němskej wuchadźa kóžde lěto něhdźe 80 000 titlow. Wulki dźěl z nich móžeš sej w bibliotekach wupožčić. Ale jónu dyrbja je zaso raz wuběrać. Přetož nadawk zjawnych bibliotekow njeje, knihi zběrać, ale aktualne medije poskićeć.
Chróšćanka z najwjace rekordami na čole lisćiny
Lochkoatletiske rekordy minjenych 47 lět na SRWŠ Budyšin a SGB
| sportowa disciplina | holcy | hólcy |
| 50 m běh | Marie-Luise Matješkec 7,0 sek(2016) Tereza Pöpelec 7,0 sek(2017) | Richard Hawš 6,2 sek(2013) Feliks Cyž 6,2 sek(2017) Paul Säuberlich 6,2 sek (2020) |
| 75 m běh | Tereza Pöpelec 9,8 sek (2017) | Johannes Wjacławk 8,9 sek (2017) |
| 100 m běh | Tereza Pöpelec 12,7 sek (2015) | Sebastian Reiche 11,3 sek (1992) |
| dalokoskok | Marie-Monique Tempel 4,94 m(2012) | Tomaš Faska 6,36 m (1978) |
| wysokoskok | Marie-Monique Tempel 1,54 m(2011) | Tomaš Šołta 1,90 m (1996) |
| kulostork | Elena Cuškec 11,10 m (1999) | Hubert Mička 6,25 kg 13,61 m (1976) Fridtjof Schade 5,0 kg 13,15 m (2019) |
| 1 000 m běh | Wórša Čornakec 3:23,0 min (2000) | Tomaš Kietsch 2:45,0 min (1986) |
| lochkoatletiski třibój | Tereza Pöpelec 445 dypkow (2015) | Tomaš Faska 317 dypkow (1978) Fridtjof Schade 317 dypkow (2019) |
Hdyž startuje na spočatku šulskeho lěta lochkoatletiska sezona na Serbskim gymnaziju Budyšin (SGB) so šulerjo husto za rekordami w jednotliwych sportowych družinach prašeja.
