Drježdźany (dpa/SN). Najebać přiběracu ličbu korona-padow planuje Sakska wolóženja. Tak měli so lětsa w swobodnym staće zaso adwentne wiki a dalše wjetše dohodowne zarjadowanja wotměć. Na to dojednachu so předwčerawšim w sakskim kabineće. Socialna ministerka Petra Köpping (SPD) je tam wobzamknjenja rozłožiła. Jeli ličba infekcijow a wućeženje w chorownjach dowolitej, móhli so w Sakskej wěstych wobmjezowanjow wzdać. Nowe postajenja měli wot 21. oktobra hač do 17. nowembra płaćić. Na słyšenju přichodnu wutoru chcedźa změny korona-postajenjow potom doskónčnje wobzamknyć.
Wućeženje chorownjow respektiwnje łožow w nowych postajenjach wulku rólu hraje. Hdyž je kritiska hódnota docpěta, zaso krućiše naprawy płaća. Tak chce sakske knježerstwo na přiběrace infekcije spěšnišo reagować. Na tak mjenowanym předwarnowanskim schodźenku měło 650 łožow na normalnych stacijach a 180 łožow na intensiwnych stacijach po cyłej Sakskej wobsadźene być. Je-li kritiska hódnota docpěta, su potajkim zaso wobmjezowanja trěbne.
Oslo (dpa/SN). Z kłokom a prokom je wčera wječor 37lětny Dana ludźi w norwegskim měsće Kongsberg na wjacorych městnach nadpadnył. Pjeć wosobow při tym zemrě, dwě dalšej stej zranjenej. Skućićel bu wčera hišće zajaty.
Kaž policija informuje, je atentatnik k rozmołwam zwólniwy, dotal pak njeje k jeho motiwej ničo wozjewjene. Teroristiski nadpad njeje wuzamknjeny. Statna rěčnica je medijam mjeztym wobkrućiła, zo muž nadpad přiznawa. Policiji wšak je 37lětny znaty, dokelž měješe hižo wjacore razy zwisk k norwegskemu strowotniskemu wobłukej.
Wobydlerjo Norwegskeje su šokowani. Tež nowy ministerski prezident Jonas Gahr Støre, kotrehož chcychu dźensa spřisahać, je njeskutk wulce poraženy komentował.
Budyšin (mwe/SN). „Změnimy našu polisu“, „Změna wužiwanskich wuměnjenjow“ abo „Wažne wozjewjenje“ – to su jenož někotre nadpisma mejlkow, kotrež pječa Ludowa banka tele dny wužiwarjam swojich posłužbow sćele. Su pak to dospołnje njeseriozne mejlki, kotrež njeměli adresaća božedla z wotpowědnym klikom na přikazane městno wočinić. Wobšudnicy z tak mjenowanymi phishingowymi e-mailkami łakaja, zo bychu ludźom pjenjezy z kapsy ćahali.
Při tym so wopačny digitalny serwis Ludoweje banki dosć rjenje a serioznje čita. „Noweje EU-reformy dla dyrbimy wužiwarjow našich posłužbow wo nowe přizwolenje prosyć“, w tajkej mejlce mjez druhim rěka. A z „Přijomny dźeń a najlěpše postrowy – waš serwis Ludoweje banki“ so informacija kónči. Wšitko pak wěrno njeje, a kóždy, kiž na to skoči, sebi samomu škodźi.
Waršawa (JBR/SN). Kapitan narodneje koparskeje wubranki Pólskeje Robert Lewandowski, kiž sej swój wšědny chlěb z FC Bayern Mnichowom zasłuža, je nětko we Waršawje hosćenc „Nine’s“ wotewrěł. Po štyrjoch poschodach bywšeje Waršawskeje piwarnje wězo wšudźe sportowa nalada „knježi“. Na sćěnach wisaja plakaty a znamješka wuznamjenjenych pólskich olympiadnikow, najwjace pak wot Lewandowskeho samoho. Fanojo móža sej tam na wulkich wobrazowkach koparske hry wobhladać.
Jědźnu kartu, kotraž wupada kaž bulwarna nowina, „wobknježa“ ameriske jědźe – a runje tak płaćizny –, kaž (ham)burgery, pomfritki a solotwje, wšitke z jendźelskimi mjenami. Najtuńši burger „Nine’s classic“ dóstanješ za wosom eurow, glazěrowane swinjace rjebleška płaća 15 eurow. W historiskej pincy maja předawanišćo z bayerskimi braclemi, kotrež su kaž cyfra „9“ sformowane. Tale ličba dźě je čisło zboža na trikoće koparja Roberta Lewandowskeho. Pjekarski mišter braclowe „dźewjatki“ na městnje pječe. Čisło dźewjeć je tež w firmowym logu a dekoracijach po cyłym domje zapřijate.
Rakecy (JK/SN). Za klětuše wólby wjesnjanosty gmejny Rakecy je tamniša gmejnska rada na swojim wčerawšim posedźenju prěnje zakłady wobzamknyła. Termin postajichu na 20. měrca. Móžne druhe wólbne koło budźe 10. apryla. Jednohłósnje wuzwolichu radźićeljo na namjet wjesnjanosty Swena Nowotneho (CDU) nawodnicu financneho zarjada gmejny Francisku Pfeiffer za předsydku wólbneje komisije. Přisydnikow wólbneje komisije a jich zastupjerjow su frakcije gmejnskeje rady sami nominowali. Z tym je wažny krok za komunalny wjeršk přichodneho lěta sčinjeny. Mjena kandidatow, kotřiž so nimo tuchwilneho wjesnjanosty wo zastojnstwo požadaja, njejsu hišće znate.
Pančicy-Kukow (SN/MWj). Po sydom lětach skónči so 31. julija 2022 hamtska doba předsydy zarjadniskeho zwjazka Při Klóšterskej wodźe Měrka Domaški. Tale tema drje njesteješe na dnjowym porjedźe wčerawšeho posedźenja zhromadźizny zaměroweho zwjazka, kotraž so prěni raz w ponowjenych rumnosćach běrowoweho twarjenja w Pančicach-Kukowje wotmě. Přiwšěm zastupjerjo pjeć sobustawskich gmejnow wo tym porěčachu. Na pokiw Tomaša Bjeńša (Ralbicy-Róžant) mjenujcy měli wo tym tak zahe kaž móžno rěčeć, zo bychu dosć wulku ličbu zajimcow docpěli, kotřiž móhli so za tule „wurjadnu a derje płaćenu funkciju“ přizjewić, Bjeńš wuzběhny.
Trjebin (AK/SN). W lěće 2021 je Trjebinska gmejna dotal solidnje a dokładnje hospodariła. Wo tym informowaše komornica Dana Piehl gmejnskich radźićelow na jich zašłym posedźenju. W zarjadniskim wobłuku maja tuchwilu nadbytk něhdźe 70 000 eurow, w zamóženskim samo něhdźe 100 000 eurow. Wo dochodowym a wobrotowym dawku kaž tež wo klučowych připokazankach komornica porno tomu žane informacije podać njemóžeše.
Zhorjelski wokrjes je lětuši hospodarski plan gmejny schwalił. Financne połoženje je stabilne, Daniela Piehl wuzběhny. Kak so wone přichodnje wuwije, pak hodźi so ćežko rjec. Likwidne srědki tuchwilu hišće maja. „Ručež zrěčenje gmejny z energijowym koncernom LEAG wuběži, hodźa so móžne rizika lědma posudźować“, komornica rozłoži. Prawniski dohladowanski zarjad je tohodla wospjet dobrowólne zjednoćenje gmejnow Trjebin a Slepo poručił.