Aus der aktuellen Ausgabe vom Mittwoch, 10 August 2022

Pjenjezy z kasy wzał

Słona Boršć. Kriminelne delikty na awtodróhowym wotpočnišću Hornja Łužica pola Słoneje Boršće měrja so zwjetša na to, zo spytaja tam bjez zapłaćenja tankować abo zo něšto z nakładnych awtow kradnu. Předwčerawšim pak je dotal njeznaty muž pjenjezy spakosćił. Jako bě jedna z kasow krótki wokomik njewobkedźbowana, sej wón z njeje wjace hač tysac eurow wza. To samsne pospyta wón tež při tamnych kasach, njeměješe pak při tym žadyn wuspěch. Policija pad nětko přepytuje.

Budyšin. Budyski Serbski muzej ma w prózdninach wjacore poskitki za šulerjow a šulerki přihotowane. Jutře, štwórtk, zaběraja so dźěći wot wosom lět wot 10 do 12 hodź. z woznamom kwětkow a mustrow. Wobhladaja sej wušiwanki narodnych drastow, pomolowane meble, keramiku a druhe eksponaty z typiskimi debjenkami. Tež někotre serbske pěsnje a basnje wo kwětkach rěča. Zhromadnje sej zmysł a pozadk kwětkow a ornamentow wuwědo­mja a do knižki zběraja. Přinošk płaći 5,50 eurow. Zajimcy njech přizjewja so pod telefonowym čisłom 03591/2708700 abo e-mejlnje pod adresu .

PoŠtyrjoch spěwaja w barje

Budyšin. Rjany hudźbny wječor dožiwić a sej k tomu słódnu kapku zesłodźeć dać móža zajimcy zajutřišim, 12. awgusta, w Budyskej barje „Sundowner“. Wot 20 hodź. zaspěwa tam spěwna skupina PoŠtyrjoch wuběr swojich znatych acapella-titlow. Jako hosći přeprosyli su sej dujersku skupinu „Tutn und blasn“. Wšitcy su wutrobnje witani.

Wosebita wustajeńca wo wudobywanju brunicy wotewrjena

Grodk (JoS/SN). W Delnjołužiskim holanskim muzeju w Grodkowskim hrodźe su předwčerawšim nowu wosebitu wustajeńcu „Žohnowanje a pokleće – Čorne złoto Łužicy“ wotewrěli. Nawodnica muzeja Annemarie Ziegler witaše něhdźe 75 hosći, mjez nimi krajneho radu wokrjesa Sprjewja-Nysa Haralda Altekrügera (CDU). Ziegler skedźbni na wobsahowu mnohotnosć pjeć naslědnych přehladkow. „Jenož tak móžemy hórnistwo ze wšitkimi swojimi sćěhami za Łužicu wobšěrnje wobswětlić“, nawodnica muzeja rjekny.

Nowa wustajeńca dawa dohlad do dalšich přehladkow, kotrež přichodne měsacy slěduja. Hižo při tym so wotbłyšćuje, kak brunica ludźi w regionje zwjazuje. Na tym so hač do dźensnišeho ničo změniło njeje. Přikładnu mjenowaše Annemarie Ziegler tuž podpěru, kotruž bě wona w přihotach přehladki nazhoniła, za čož je wona přewšo dźakowna.

11.8.–17.8.2022 Budyski filmowy ­palast: Minions – Auf der Suche nach dem Mini-Boss: wšědnje 15:00 a 17:15 | wu a srj 10:15 | nj, wu a srj 12:45 | štw, so, pó a srj 20:00 DC League of Super Pets: wšědnje 14:50 (nimo nj) a 17:20 (nimo nj) | nj 14:20 a 17:00 Nope: wšědnje 14:20, 17:10 a 19:30 | pj a so 22:20 Alfons Zitterbacke – Endlich Klassenfahrt: wšědnje 14:30 Thor: Love and Thunder: wšědnje 19:30 (nimo pó) | pj a so 22:15 Biene Maja – Das geheime Königreich: nj 12:30 | wu a srj 10:30 a 12:30 Mia and Me – Das Geheimnis von Centopia: wu 10:15 | nj, wu a srj 12:30 Der junge Häuptling Winnetou: wšědnje 15:00 a 17:30 Guglhupfgeschwader: wšědnje 14:30, 17:00 a 20:00 | pj a so 22:30 Jurassic World: Ein neues Zeitalter: wšědnje 19:30 (nimo pj a wu) | pj a so 22:00 Top Gun Maverick: wšědnje 19:20 (nimo pó) | pj a so 22:10 Rabiye Kurnaz gegen George W. Bush: pj 17:00 | pó 20:00 Bibi & Tina – Einfach anders: wšědnje 14:30 a 17:00 (nimo pj a nj) Bullet Train: wšědnje 16:50 a 19:40 | pj a so 22:20 Monsieur Claude und sein großes Fest: wšědnje 14:20, 16:50 a 19:50 (nimo srj) | pj a so 22.

Kak hodźa so dźěle serbskeje narodneje drasty do dźensnišeho moderneho časa přenjesć, bě hłowne prašenje wčerawšeho prózdninskeho poskitka Budyskeho Serbskeho muzeja. Při tym nawjazachu na aktualnu wustajeńcu „Party w 21. lětstotku“. Pod nawodom Moniki Ošikoweje (srjedźa) zhotowi horstka wobdźělnikow toški za šmóratko, rjećazki wokoło ruki abo šije kaž tež nawušnicy. Samsny poskitk ­wospjetuja 23. awgusta wot 10 hodź. Foto: SN/Hanka Šěnec