Aus der aktuellen Ausgabe vom Montag, 20 März 2023

Zhorjelc (AK/SN). Zhorjelski wokrjes ma dale ćeže ze swojim etatom. Etat je so we hłownym wuběrku, financnym wuběrku, z wjesnjanostami a wokrjesnymi radźi­ćelemi kritisce diskutował, rozjasni ­njedawno komornik Thomas Gampe w Zhorjelcu. „Nětko je wažne, jednanja­kmani wostać“, wón měnješe. Sakska krajna direkcija je zwólniwa, w nuznym padźe dalšim pjenjezam přizwolić. Wuměnjenje pak je, zo dyrbi wokrjes paralelnje k tomu swoju lutowansku wolu pokazać. Tak dyrbja zamołwići konkretne naprawy namjetować. W Zhorjelcu su wšelake móžnosće pruwowali a mjez druhim namjetowali, zo hišće hamtske łopjeno w papjerjanej formje njewudawaja. Z nowostrukturowanjom zarjadnistwa chcedźa 20,8 miliony eurow zalutować. Dale móhli bliskowobchadnu syć wo 20 pro­centow redukować. Busy maja jenož tam jězdźić, hdźež su woprawdźe trěbne. Z tym móhli dalše 6,6 miliony eurow zalutować. Hladajo na transport šulerjow móhł so swójski podźěl staršich zwyšić.

Brüssel (dpa/SN). Wonkowni a zakitowanscy ministrojo čłonskich krajow ­Europskeje unije su dźensa wo dalšej podpěrje na dobro Ukrainy we wójnje přećiwo Ruskej wuradźowali. Při zetkanju w Brüsselu dźěše wosebje wo dalše dodawanje nuznje trěbneje municije. ­Pozadk je strach, zo móhli Ukrainje přichodny čas wažne družiny municije pobrachować. Při tym dźe w prěnim rjedźe wo granaty za artileriju.

Komisija EU z jeje społnomócnjenym za wonkowne naležnosće Josepom Borrellom bě njedawno plan předpołožiła, kak móhli dodawanje municije pospěšić. Při tym dźe wo to, Ukrainje municiju ze swójskich składow čłonskich krajow přewostajić a na druhim boku municiju ze srědkami EU zhromadnje nakupować. EU chcyła za to dwě miliardźe eurow ­přewostajić, w Brüsselu zdźělichu.

Mjeztym je ruski prezident Wladimir Putin wot ruskeje armeje wobsadźeny ukrainski teritorij wopytał. 70lětny jědźeše sobotu ze swojimi přewodnikami po zničenym Mariupolu.

Kritizuja plany Zelenych za dočasne skónčenje zmilinjenja brunicy

Drježdźany (dpa/SN). Generalny sekretar sakskeje CDU Alexander Dierks je plany frakcije Zelenych w zwjazkowym sejmje nastupajo zažniši termin skónčenja ­zmilinjenja brunicy raznje kritizował. Přestorčenje termina na lěto 2030 by ­wujednany, tak mjenowany wuhlowy kompromis tež za wuchodnu Němsku wupowědźiło, rjekny Dierks sobotu w Drježdźanach. „To je wosom lět prjedy, hač termin, na kotryž běchu so wšitcy wobdźěleni dojednali.“ Tak wohrožuje so po jeho słowach wěstota planowanja za wuhlowe kónčiny a za wuspěšnu změnu strukturow. Nimo toho zniča tole dowěru ludźi do demokratiskich rozsudow.

Zjawnosći spřistupnjeny wutk z rozprawy prawniskeho wuběrka Zwjazkoweho předsydstwa Domowiny nastupajo tematiku zastojnstwo a mandat za načolnych zastupjerjow serbskeho třěšneho zwjazka je plista wšěm tym, kotrymž je nahladnosć Domowiny wažna. So jeničce na Zakładny zakoń powołać, rěka, zo ma so čłonstwo w přichodźe tež z tym wotnamakać, hdyž Domowinu reprezentowaca wosoba za AfD mandat nastupi abo so samo w scenje reichsbürgerow na wusahowacym městnje angažuje. Běchu čłonojo prawniskeho wuběrka snano přežadani, zo njejsu linije móžnych konfliktow jasnje pomjenowali? Abo njejsu to chcyli? Naležnosć měsac do hłowneje zhromadźizny Domowiny ze swěta njeje. A to bě dobra přičina, ju tohodla minjeny pjatk zboka kóždeježkuli zjawnosće rozjimać. Nadźija na moralku je snadnuška. Hdyž dźe jenož hišće wo taktiku, moralka podrjadowanu rólu hraje. Abo budźe dospołnje na bok stłóčena. Axel Arlt

Njedawno přebywaše kruh wědomostnych a fachowych sobudźěłaćerjow Serbskeho muzeja na swójsku iniciatiwu we Waršawje. Zaměr wuprawy bě, sej na městnje we wospjet wuznamjenjenym muzeju POLIN, kotryž wěnuje so europskim stawiznam pólskich Židow, nowe impulsy a nazhonjenja za koncipowanje noweje trajneje wustajeńcy spřistupnić.

Podłu wokrjesneje dróhi mjez Brěžkami a Mučowom je nowa kolesowanska šćežka hotowa. Po dźesać měsacach twarskeho časa su ju minjeny pjatk zjawnosći přepodali. Město Kulow inwestowaše cyłkownje 1,3 miliony eurow. Dźakowano spěchowanju Zwjazka a Sakskeje dyrbjachu jenož dźesać procentow z měšćanskeje kasy zapłaćić. Foto: Gernot Menzel

Pančicy-Kukow (FB/SN). Wjacore dźěle třěšneje lijawy, stare wobruče, zerzawy sud z njeznatej kapalinu a dwaceći měchow połne cigaretowych kónčkow, plastiki a druhich smjećow – to bě wuslědk sobotneje rumowanskeje akcije w Pančicach-Kukowje, na kotrejž bě so někak sto małych a wulkich pomocnikow wobdźěliło. W kooperaciji ze sportowym towarstwom Marijina hwězda běchu jeho ­čłonow a dalšich wjesnjanow po lońšej premjerje na druhi dźeń hromadźenja wotpadkow centrale za přirodu Budy­skeho wokrjesa přeprosyli. Wothłós bě wjetši hač wočakowany. Wosebje dźěći mějachu wjeselo na nimale detektiwne wašnje zjawne městna, pućiki, přirowy, lěski a kerčiny za wotpadkami přepytać.

Wulka hromada smjećow, kiž běchu po třoch hodźinach nazběrali, a wosebje, što běchu wšitko namakali, wubudźi w mnohich rozmyslowanje, kak ludźo poprawom ze swojej přirodu wobchadźeja. Zo pak njejsu na zjawnych městnach hustodosć kmane smjećniki, je dalše ­dopóznaće tuteje akcije. Kak móhło so to změnić, je tema, wo kotrejž měło so w gmejnje a we wobłuku zarjadniskeho zwjazka Při Klóšterskej wodźe rěčeć.

Łazowska gmejna wuradźuje wo koncepće dźěćacych přebywanišćow

Łaz (AK/SN). Wšitke štyri pěstowarnje Łazowskeje gmejny su nuznje ponowjenja trěbne. Dźěćace přebywanišćo „Kraj bajkow“ we Łazu měł so znowa natwarić. Hladajo na předewzaća přichoda dyrbjała gmejna twarske rozšěrjenje tamnišeho horta hač do lěta 2026 kruće zaplanować. Nimo toho měła wona dalše planowanja nastorčić, zo by financnu potrjebu konkretizowała a móžnosće spěchowanja wužiwać móhła. Tole zwěsći Andreas Worbst, sobudźěłaćer Drježdźanskeje ­towaršnosće za wuwiće městow STEG, na njedawnym posedźenju Łazowskeje gmejnskeje rady při předstajenju wot­powědneho přepytowanja móžnosćow. Zaměr je dołhodobnje zawěsćenje wšitkich štyrjoch dźěćacych přebywanišćow Łazowskeje gmejny. STEG bě přepyto­wanje fachowje neutralnje a objektiwnje, w nadawku gmejny, zdźěłała.

Kolesowar ćeknyć chcył

Smječkecy. Z drogowym deliktom dyrbješe so policija minjeny pjatk w Smječkecach zaběrać. Tam chcychu zastojnicy něhdźe w 17 hodź. kolesowarja kontrolować. Młody muž pak so zastojnikam wuwiny a mócnje do pedalow stupaše. Při swojim ćěkanju wón pakćik marihuany preč ćisny. Bórze na to policisća 23lětneho dosahnychu. Na njeho čaka nětko chłostanske jednanje.

Twarski wóz zapalił

Chrjebja. Blisko lěsa wotstajeny twarski wóz su sobotu pola Chrjebje zapalili. Wóz so dospołnje wupali. Płomjenja přeskočichu tohorunja na lěs. Wobornicy pak wšitko zhašachu. Přiwšěm nasta 10 000 eurow škody. Policija 14lětneho jako skućićela wuslědźi.

Rowno (JoS/SN). Na serbske burske blido su minjenu sobotu na Rownjanski Nje­pilic statok přeprosyli. Kóždolětne zarjadowanje bě spěchowanske towarstwo Njepilic statoka něhdy jako jedne z prěnich krutych terminow do zarjadowanskeje protyki zapřijało. Zaměr bě, zo starši Rownjenjo a wobydlerjo z wokolnych wsow wo swojich dopomnjenkach na zašłe časy rozprawjeja. Te su napisali a w archiwje składowali. Rudi Krawc je wšitko filmował a fotografował. Na te wašnje nastaty fundus je w běhu lět na wulki pokład narostł, z kotrehož w Rownom hišće dźensa čerpaja. Ći pak, kotřiž su hišće před lětami swoju wědu dale spo­srědkowali, dźensa hižo mjez žiwymi njejsu. Tež Rudi Krawc nic.