Šesty „Happy monday ­Bautzen – wjesoła póndźela Budyšin“ je wčera na Budyske Žitne wiki wospjet syłu ludźi přiwabiło, a to wo tójšto wjace hač zašłe tydźenje. Mjez nimi bě tež zaso wulka ličba młodostnych. Na parcoursu jědźechu dźěći, młodostni a dorosćeni na skateboardach. Nazhonići trenarjo towarstwa „Bautzen rollt“ su jim triki přeradźili. Wo hudźbne wobrubjenje so DJ-duo, Carolina a Jakob Gruhlec kaž tež Jacob Čornak alias „Jacke Schwarz“, jemu poboku Willi Stoyan, starachu. Ze swójskimi, tež serbskimi spěwami wabjachu woni młodych wopytowarjow do rejowanja. Wotměli su so tež U18 wólby w ramiku projekta Pro Chance. Foto: Milenka Rječcyna

SC Großröhrsdorf – Sokoł Ralbicy/Hórki 1:1 (0:0)Zestawa hosći: Žur – An. Wałda (52. Materna), Rachela, Lulak, Hrjehor (59. Bejmak), Woko, Korjeńk, Rawš, Gloxyn, S. Bjeńš, ŠimanTute prašenje stajichu sebi Sokoljo po hrě, hač njeby snano wjace móžno było. Kaž nimale kóždy tydźeń změni so zestawa Sokołow a trenar Christoph Gloxyn zasadźi tež někotrych starych zajacow kaž Bosćija Lulaka abo Stefana Bjeńša. Tak wučinješe přerězna staroba startoweje jědnatki 29,3 lět.

Policija je wčera Amsterdamsku uniwersitu zawrěła, po tym zo běchu so studenća k demonstraciji na dobro Palestinjanow w Gazaskim pasmje zhromadźili. Nawodnistwo kubłanišća je dźensa a jutře wšě zarjadowanja a čitanja wotprajiło, dokelž ­njemóže tuchwilu „žanu zamołwitosć za wěstotu wosobow na uniwersiće přewzać“. Foto: pa/Anadolu/Mouneb Taim

Zaso na 581 metrow wysoku Wjelču horu w Čěskej pućowaćWjelča hora (ES/SN). Před něšto wjace hač dobrym lětom, dokładnje 4. apryla 2023, su w nócnych hodźinach wokoło napoł štyrjoch na wsach wokoło Wjelčeje hory (Vlči Hory/Wolfsberg) mjez Rumburkom a Šumporom (Krasna lipa) sireny rželi. Sapace płomjenja so palaceje bawdy na tamnišej Wjelčej horje běchu w nocy daloko do kraja widźeć. Dźakowano spěšnemu jednanju wohnjowych woborow z wokolnych wsow, bu 16 metrow wysoka wuhladna wěža zachowana – byrnjež ćežko wobškodźena była. Bawda w bjezposrědnjej bliskosći bu, runje tak kaž z wěžu zwjazany twar, dospołnje zničena. Wšitko so w płomjenjach sypny. Štóž horu a ležownosć znaje, wě sej předstajić, kak spomóžny wukon wohnjowych wobornikow to běše, w nocy wodu k hašenju w najkrótšim času na horu dóstać. Njeje předołho trało a wopytowarjo móžachu wěžu zaso wopytać. Zamołwići su ju tak ponowili, zo běše přistup wěsty. A wopytowarjo zapłaćichu za to zastupny pjenjez. ...

Kamjenej (SN/BŠe). Za ludźi z handicapom, staršich wobydlerjow abo swójby z dźěćacymi wozyčkami je stajnje wulke wužadanje bliskowobchadne srědki wužiwać. Předewšěm we wjesnych kónčinach je tajki wutwar na zastanišća bjez zadźěwkow bytostny. Wažne je, wšitkim zajimcam zmóžnić z busom jěć. Swobodny stat a zaměrowy wobchadny zwjazk (ZVON) tole wulkomyslnje spěchujetej. Bjez podpěry je přetwar busowych zastanišćow mjenujcy wulke wužadanje.

Petrovice (SN). Nutřkownaj ministraj Sakskeje a Čěskeje, Armin Schuster (CDU) a Vít Rakušan, staj so wčera w zhromadnym centrumje němsko-čěskeje policije w sewjeročěskich Petrovicach njedaloko Ústíja nad Labem zetkałoj. Temy běchu europska azylowa a migraciska politika, mjezu přesahowace policajske zhro­madne dźěło kaž tež zesylnjenje zhromadneho dźěła we wobłuku wohnjo- a katastrofoweho škita. Sakska policija je wot lěta 2007 w zhromadnym saksko-čěskim centrumje w Petrovicach prezentna. Nutřkowny minister Schuster chwaleše sej po zetkanju dobry niwow stykow w pozitiwne signale čěskeho nutřkowneho ministra. Wobstejace kontrole a zhromadne patrulje měli so dale wjesć.