Wjetšina přinoškow 144. schadźowanki Serbski sejm wobjednała
Budyšin (SN/bn). Na kopatej połnej hłownej žurli Budyskeho Němsko-Serbskeho ludoweho dźiwadła je sej zawčerawšim wjace hač 400 wopytowarjow program 144. schadźowanki wobhladało. NSLDź bě prěni raz z hosćićelom kóždolětneho zetkanja serbskich studentow, absolwentow a gymnaziastow. Režiseraj Jakub Wowčer a Maximilian Kral rozłožištaj w uwertirje po wašnju duwa komediantow Ulan & Bator w němym dialogu z pomocu na wulkich listnach napisaneho teksta přičiny toho, čehoždla bě nowe hrajnišćo trěbne. Mjez druhim bě čitać – abo tež nic –, zo „wopytowarjo na tunich městnach cyle zady pismiki wjace njespóznaja“.