Pozběhowace a hnujace předstajenje „Serbskeho rekwiema“
Ketlicy (CRM/SN). Kaž wočakowane, běše předstajenje „Serbskeho rekwiema“ Korle Awgusta Kocora wčera popołdnju w Ketlicach, na městnje jeho mnoholětneho skutkowanja, wulki podawk, kajkiž njebě wosada w swojim nadobnym barokowym Božim domje Swjateje Trojicy dotal dožiwiła. Wulke twórby załožerja artificielneje hudźby Serbow dźě běchu druhdźe předstajeli. Tola cyle zabyty wón wot swojeje smjerće 1904 w starym serbskim sydlišću blisko Lubija njeje.
