Před pjeć lětami bu serbsko-němska syć Łužycafilm jako informelny zwjazk wutworjena. We wobłuku wčerawšeje podijoweje rozmołwy zhladowaštaj załoženskaj čłonaj Cosima Stracke-Nawka a Rajner Nagel na dotalne skutkowanje cyłka a rozmyslowaštaj wo jeho přichodnych nadawkach.

Budyšin (SN/bn). „Na spočatku kóždeho filma steji ideja. Tajke myslički spěchować a je dale wuwiwać mam za jedyn z centralnych nadawkow syće. Dotal smy w tym nastupanju snano trochu naiwnje postupowali, předewšěm hladajo na awtorske prawa. Přiwšěm dóstawaš, swoje koncepty w tym kole předstajiwši, bjezposrědni a zdźěla brutalny wothłós. Dalši wažny nadawk syće je a wostanje, so w spěchowacych gremijach za serbske filmowstwo zasadźeć. Bjez praweho wucha na prawym městnje njehodźi so žadyn projekt zwoprawdźić. Zaměr dale je, publikumej skónčnje wječor pjelnjacy serbski hrajny film w kinje pokazać móc“, zjima Rajner Nagel.