Wšitke městna w poměrnje wulkej putniskej cyrkwi wobsadźene – to rěči za woblubowanosć hodowneho koncertowanja chóra Lipa mjez hodami a Nowym lětom w Róžeńće, a to loni 28. raz. Chór pod nawodom Jadwigi Kaulfürstoweje běše sej tónraz wurjadnych hosći přeprosył, mjenujcy šolu sotrow klóštra Marijineje hwězdy z Pančic-Kukowa. Hudźichu smyčkowy kwartet z Judith Škodźinej, Jurjom Hantušom, Katju Thomasec a Martu Hantušec. Jan Brězan přewza přewod zhromadneju kěrlušow na pišćelach kaž tež partije na klawěrje. Na saksofonje hraješe Kristin Herfurthowa.