Mjezynarodnu konferencu wo cyrkwinskich stawiznach zahajili

Budyšin (SN/bn). Pod hesłom „Budyšin – Praha – Rom. Splećenja a interakcije w cyrkwinskich stawiznach centralneje Europy“ wuhotujetej Serbski institut (SI) a Praska Karlova unwersita hač do jutřišeje soboty mjezynarodnu wědomostnu konferencu w Budyskim Serbskim domje. Friedrich Pollack, kiž zarjadowanje ze stron SI organizuje, powita na wčerawšim zahajenju něhdźe 40 wobdźělnikow wuzběhujo, zo „su cyrkwinske stawizny wjace hač jenož teologija, wšako wotbłyšćuja runje tak politiske a towaršnostne wobstejnosće.“ Hłowne zaměry konferency su „spěchować interdisciplinarne a mjezy přesahowace slědźenje, wutworić nowe syće a šěrić zhromadnu wědu“. Tematisce jasny fokus na Łužicu je wuslědk „skerje rědkeho zjawa, zo bě stajnje region transfera – mjez rěčemi runje tak kaž mjez konfesijemi. A wužijmy składnosć, so na žórła złožować móc, kotrež rozdźělne perspektiwy zmóžnjeja, dokelž je drje lědma kónčiny w Europje, kotraž bu wobstajnje w štyrjoch rěčach wopisowana.“