Statna sekretarka Meyer: Wulkotnje, zo mamy serbske nakładnistwo

Lipsk (SN/MiR). Na lětušich Lipšćanskich knižnych wikach je so něhdźe 283 000 wopytowarjow wo najnowšich wudaćach nakładnistwow informowało. Do kruha w cyłku 2 085 wustajerjow ze 40 krajow słušeše Ludowe nakładnistwo Domowina. Při stejnišću LND w hali 2 je statna sekretarka w sakskim statnym ministerstwje za regionalne wuwiće Barbara Meyer z jednaćelom Symanom Pětrom Cyžom dlěje bjesadowała. Cyž předstaji sakskej načolnej zastojnicy aktualne wudaća nakładnistwa. Meyer zajimowaše so mjez druhim za literaturu Jurja Brězana. „Sym so cyle wědomje stejnišću LND wěnowała. Myslu sej, zo stej serbska rěč a kultura něšto cyle wažne, štož w Sakskej mamy. Tuž je wulkotne, zo mamy mjez wulkej ličbu nakładnistwow w Němskej tež serbske“, wona na naprašowanje SN rjekny. Za wosebje zajimawe ma wona serbske powěsće. Wona doda: „Bych rady wjace wo pokładźe serbskich powědkow kaž tež serbskich bajkow zhoniła.“