Prezentacija noweje tačele skupiny Jankahanka z euforiskimi reakcijemi
Budyšin (SN/bn). Juskacy fanojo w prědnich rynkach, wote wšeho spočatka sobu spěwacy a wšitke předstajomne formy reje praktikowacy publikum a wočiwidnje zbožowni hudźbnicy – tak mjenowana record release party, z kotrejž skupina Jankahanka předwčerawšim swoju nowu tačel „Wokomiki“ w Budyskim Kamjentnym domje předstaji, bě furiozny wuspěch.
Zhromadnje z něhdźe 250 wopytowarjemi woswjeći band wozjewjenje swojeho druheho zynkonošaka z koncertom, wo kotrymž budźe přichodnje zawěsće wjace ludźi twjerdźić, zo bě přitomnych, hač to rumnostna kapacita zarjadnišća poprawom dowola. „Spočatnje běchmy hladajo na wulke wočakowanja trochu nerwozni, ale wokomiknje směm rjec, zo buchu naše wočakowanja přetrjechene“, zjima gitarist-spěwar Józef Brězan-Hrjehor krótko po wustupje a doda, zo su wšitcy čłonojo kapały z poradźenej premjeru přewšo spokojom.
