Rozsud wokrjesneho sejmika jenož chwalbu a připóznaće nježněje

Budyšin (SN/MG). Kontrowersnje je wokrjesny sejmik wčera, póndźelu, diskutował a so naposledk rozsudźił, zo matej w serbskim sydlenskim rumje Budyskeho wokrjesa w přichodźe němska a serbska chorhoj stajnje před šulemi wisać, kiž su w nošerstwje wokrjesa. Wězo pak jenož tam, hdźež to techniske wobstejnosće dowola. Zwonka serbskeho sydlenskeho ruma matej němska a po móžnosći sakska chorhoj zmawować. Před zarjadnišćomaj wokrjesa w Budyšinje a Kamjencu maja w přichodźe europska, zwjazkowa, krajna a serbska chorhoj wisać.

Do posedźenja wčera běštej frakcija AfD a wokrjes sam dwaj namjetaj za wobzamknjenje předpołožiłoj. AfD bě sej jenož wupowěsnjenje němskeje chorhoje žadała a wokrjes chcyše, zo w serbskim sydlenskim rumje němska a serbska, zwonka njeho jenož němska wisa. Za to chcychu samo falowace sćežory za chorhoje natwarić, štož by po powobličenju wokrjesa nimale 80 000 eurow płaćiło. Tutoho namjeta dla bě frakcija AfD swójski namjet potom cofnyła.