Załožbowa rada wčera w Budyšinje wuradźowała

Budyšin (SN/BŠe). Rada Załožby za serbski lud je so na swojim wčerawšim posedźenju w Budyšinje předewšěm z pjenjezami zaběrała. Tak steješe wobzamknjenje etata za lěto 2026 na dnjowym porjedźe, kotremuž radźićeljo přihłosowachu. „Hladajo na financne zrěčenje su tuchwilu hišće finalne wothłosowanja. Financne zrěčenje klětu spočatk lěta podpisamy. Mamy tuchwilu redukowany plan. W meji chcemy radźe dodatny etat předpołožić“, direktor Załožby za serbski lud Jan Budar na konferency wuswětli.

Ćežišćo posedźenja bě Lawski areal. Załožba měješe nadawk, twarske kóšty za njón znižić, štož je so poradźiło. Tak budźetej žurla a wosebita wustajeńca trochu mjeńšej. Zaměr je, zo njesmě Lawski areal wjace hač 50 mio. eurow płaćić. „Planujemy z wěstej rezerwu we wobjimje 2,5 milionow eurow“, Jan Budar zwurazni. Dale w załožbje wo tym rozmysluja, hač tuchwilne sydło Serbskeho instituta w Budyšinje předadźa. To by něhdźe 900 000 eurow kapitala wunjesło. „Tuchwilu smy porno našemu planej połdra lěta w zastatku“, direktor wujasni.