Knižne wiki znowa z wjace hosćemi – žadanja za wotstupom ministra

Lipsk (dpa/SN/bn). Lětuše Lipšćanske knižne wiki su so wčera z nowym wopytowarskim rekordom zakónčili. Dohromady zličichu na štyrjoch dnjach inkluziwnje po cyłym měsće wuhotowaneho festiwala „Lipsk čita“ něhdźe 313 000 hosći, to je dobrych 17 000 zajimcow wjace hač loni. Hoberskeho nawala dla bu předań zastupnych lisćikow za slědowace dny hižo minjeny štwórtk najprjedy wobmjezowana a potom dospołnje zastajena. Dźakowano nowemu konceptej, mjez druhim ze šěršimi chódbami, a „decentralnišemu zaměstnjenju po nazhonjenju najbóle frekwentowanych stejnišćow“ bě wopytowarjam přiwšěm móžno, bjez wjetšich zadźěwkow po wustajenišćach dundać.

Cyłkownje prezentowaše so na po swójskim podaću „najwažnišim nalětnim zarjadowanju branše“ 2 044 wustajerjow ze 54 krajow. Po słowach jednaćela wikow Martina Buhla-Wagnera su z tym tež nastupajo mjezynarodnych wobdźělnikow nowy rekord docpěli.