Rada załožby za serbski lud je wčera rodźenu­ Měrkowčanku Susann Šenkec za předsydku­ wuzwoliła. Nowe je, zo powołachu čłonku rady, kotraž skutkuje zwonka Łužicy. Wona bydli mjenujcy w sewjeroněmskim Flensburgu, da­loko­ za mjezami Łužicy, a dźěła tam jako ge­neralna sekretarka mjeńšinoweho zwjazka FUEN. Mam rozsud załožboweje rady za prawy a dobry, wšako njeje Susann Šenkec jako Serbowka jenož derje wo sta­wi­znach a aktualnym połoženju našeho ludu wobhonjena. Jako sobudźěłaćerka europskeho zwjazka mjeńšin ma tež wuběrny dohlad do połoženja dalšich mjeńšin po cyłej Europje. Nimo toho bydli we wjacerěčnej namjeznej kónčinje na sewjeru. Tak móže wobstejnosće z Łužicu při­runać a nazhonjenja z druhich ludow­ do swo­jeho skutkowanja zaplesć. Zdobom ma tróšku hinaši wid na serbskosć, štož móže spomóžne być. Janek Wowčer

Celovec (SN). Krajny hejtman Korutanskeje dr. Peter Kaiser je tele dny prezidenta Federalistiskeje unije europskich narodnych mjeńšin (FUEN) Loránta Vin­czu přeprosył, zo by na 27. kongresu etniskich mjeńšin wo zwiskach mjez etniskimi, narodnymi a europskimi identitami přednošował. Zarjadowanje bě korutanske knježerstwo w Celovecu (Klagen­- furt), stolicy regiona, organizowało. Wobdźělnicy diskutowachu tam wo tym, kak so globalizowanje a masowa imigracija w Europje na awtochtone mjeńšiny wuskutkujetej. Při tym stejachu Korutanscy Słowjency w srjedźišću.