Berlin/Oranienburg (dpa/SN). Zwjazkowy sejm je dźensa miliony woporow nacionalsocializma wopominał. 75 lět po wuswobodźenju nacistiskeho zaničowanskeho lěhwa Auschwitz staj so zwjazkowy prezident Frank-Walter Steinmeier a israelski prezident Reuven Rivlin prěni króć zhromadnje na swjatočnosći wobdźěliłoj a k wobdźělenym porěčałoj. Na spočatku dopomni prezident zwjazkoweho sejma Wolfgang Schäuble (CDU) na wopory nacionalsocializma.

Steinmeier a Rivlin běštaj so minjeny tydźeń zhromadnje na zarjadowanju k wopominaju holocausta w israelskim wopomnišću Yad Vashem wobdźěliłoj. Tam smědźeše so Steinmeier jako prěni zwjazkowy prezident Němskeje słowa jimać.­ A je so w narěči jasnje k winje Němskeje na holocausće wuznał.

Serwisowy běrow za serbsku rěč we Wojerecach dobre štwórć lěta dźěła. Jako posłužbnik komunow w serbskim sydlenskim rumje Sakskeje wažny nadawk spjelnja. Wšako dźe wo to, w mnohich wosebje němsko-serbskich komunach našu maćeršćinu zaso zaměrnišo wužiwać. Dokelž nimaja tam hižo wobydlerjow-serbšćinarjow, je jim tale wěcywustojna rěčna podpěra jara spomóžna. Prawje je, zo financuje Swobodny stat Sakska běrow z hornca serbskeje komunalneje pawšale. Aktualny přikład pak da mje wo tym rozmyslować, što za „komunalnym“ tči: Wojerowski běrow njeje nadawk přiwzał, serbskorěčne přełožki za webstronu noweho lětnika Sakskeho fondsa „Čiń sobu!“ wobstarać, dokelž nima to za komunalnu naležnosć. Z toho wurosće prašenje, hač je jenož to komunalneho razu, štož gmejny, města abo wokrjesaj tam přełožować dadźa. Abo słuša tež to k tomu, štož ma z tamnišim žiwjenjom činić? Axel Arlt

Wuskidź (CK/SN). Na třělnej čarje čo. 8 wojerskeho zwučowanišća Hornja Łužica pola Wuskidźe bě minjene dny chětro wótře. Nadawk wojakow tankoweho bataljona 414 rěkaše: mechanizowane mocy přećiwnika zničić, bjeztoho zo swójski škit zanjechaja. Zwučowali su to ze štyrjomi tankami typa Leopard 2, w kóždym z nich bě wobsadka štyrjoch wojakow. Třěleli su na atrapy pozdatneho njepřećela, pak stejo pak jěducy. Nimo toho zwučowachu na druhich čarach z ručnymi brónjemi třěleć a škričkować.

Hakle před třomi lětami běchu dwunarodowy tankowy bataljon 414 nastajili. Projekt „Taurus“ je „dospołnje nowa dimensija zhromadneho dźěła we wobłuku NATO“, rozłožuje komandant, podpołkownik­ Hagen Ruppelt. Zaměr je zhromadne zwučowanje měšanych wobsadkow tankow. Wšitkim wobdźělenym je to „wšědnje nowe wužadanje“. Rozdźělne zakonske rjadowanja, dźěłoškitne předpisy, zakonje wo dźěłowych a wotpočnjenskich časach kaž tež wjele druheho ma so wobkedźbować. Jednotki hotuja so na swoje klětuše zasadźenje w Litawskej.

Z oficialnym protestom je so italske knježerstwo pola němskeho knježerstwa hóršiło, dokelž dyrbješe ministerski prezident Giuseppe Conte na skupinskim wobrazu wobdźělnikow konferency wo Libyskej w Berlinje w druhim rynku stać. „To bě zmylk němskeho protokola“, rjekny Conte wčera w italskej telewiziji. We wideju je widźeć, kak italski premier za městnom w prědnim rynku pyta, skónčnje pak dyrbi do druheho.

Wosrjedź kuchnje stejo wostało je awto w Eifeli, po tym zo bě murju domskeho přerazyło. 64lětny bě na nahłej dróze po puću a chcyše naprawo wotbočić. Z dotal njeznateje přičiny pak jědźeše runje dale, přełama płót, zjědźe do murje, přerazy ju a wosta w kuchni stejo. 69lětny wobsedźer domu, kiž tam runje w kuchni kofej warješe, so na zbožo jenož­ na noze zrani.