Přićah swójbnych zadźeržeć
Berlin (dpa/SN). Zwjazkowy sejm je dźensa wo tym rozsudźił, zo swójbni tudy přebywacych ćěkancow hižo tohorunja do Němskeje přichadźeć njesmědźa. Tole je tuchwilu na tysac wosobow wob měsac wobmjezowane. Přichodnje smědźa swójbni ćěkancow, wosebje ze Syriskeje, jenož hišće we wuwzaćnych padach do Němskeje přińć. Nimo toho chcychu za derje integrowanych wukrajnikow móžnosć wotstronić, zo hižo po třoch lětach němske staćanstwo dóstanu.
Reichinnek so wobara
Berlin (dpa/SN). Předsydka frakcije Lěwicy w zwjazkowym sejmje Heidi Reichinnek po zwrěšćenych wólbach za kontrolny gremij tajnych słužbow njewuzamkuje, zo dalši kandidat z frakcije za zastojnstwo nastupi. Wona namołwja CDU/CSU k wotpowědnym rozmołwam. Reichinnek bě při wólbach tajneho gremija přepadnyła, runje tak kaž wobaj kandidataj AfD. Gremij dohladuje dźěło tajnych słužbow a ma přistup k tajnym a brizantnym dokumentam.
Němski wulkopósłanc skazany
Nimale wšědnje žadaja sej ludźo w Israelu, kaž w Tel Avivje, ...
SPD woli nowe nawodnistwo
Berlin (dpa/SN). SPD je dźensa tři dny trajacy zjězd w Berlinje zahajiła. Hnydom prěni dźeń stejachu nowowólby stronskeho nawodnistwa na dnjowym porjedźe. Něhdźe 600 delegatam staji so ministerka za dźěło Bärbel Bas k wólbam. Wona chce zhromadnje z dotalnym předsydu Larsom Klingbeilom stronu wotnětka nawjedować. Wobsahowje chcedźa so socialni demokraća zaso tradicionalnym jadrowym temam přiwobroćić.
Wobkedźbowarjo wočakuja pak tež rozestajenja. Tak je njedawna iniciatiwa někotrych wodźacych zastupnikow debatu wo wobchadźenju z Ruskej a z planami masiwneho wobrónjenja zbudźiła. Špatnych wólbnych wuslědkow dla knježi nimo toho njespokojnosć na bazy.
Słowakska sankcije blokuje
Brüssel (dpa/SN). Słowakska republika blokuje nowe sankcije EU přećiwo Ruskej. Słowakski ministerski prezident Robert Fico je na wjeršku EU w Brüsselu připowědźił, zo swój weto nałožuje, hdyž tam dźensa wo nowych chłostanskich naprawach wothłosuja. Fico žada sej wurunanje za straty, kotrež Słowakskej nastanu, hdyž EU swoje plany k dospołnemu skónčenju importa ruskeho zemskeho płuna zwoprawdźi. Słowakska dale ruski płun kupuje, dokelž je zastaranje wobydlerjow dospołnje na njón wusměrjeny.
EU chce z nowymi sankcijemi ruskemu financnemu sektorej zeškodźeć. Ruska z cyłej flotu łódźow dale zemski wolij do wšeho swěta wozy. Nimo toho chce Brüssel tomu zadźěwać, zo zničeny płunowód Nord Stream II hdy zaso wožiwja. Po tutym puću móhła Ruska zaso zemski płun předawać a z toho miliardy eurow wuzbytkować. Tole chcedźa na kóždežkuli móžne wašnje znjemóžnić.
EU namołwjak zdźeržliwosći
Bórze euro w Bołharskej
Zelena swěca ze stron Europskeje unije – protesty přećiwo eurej w Sofiji
Brüssel/Sofia (dpa/SN). Bołharska je wot statnych a knježerstwowych šefow tamnych čłonskich krajow EU zelenu swěcu za to dóstała, přewzać zhromadnu měnu euro jako nowu měnu swojeho kraja. Zwjazkowy kancler Friedrich Merz (CDU) a jeho kolegojo podpěrowachu wčera na wjerškowym zetkanju EU w Brüsselu namjet komisije EU, kotryž dowola zawjedźenje eura w balkanskim kraju wot 1. januara 2026.
Bołharska je wot lěta 2007 z čłonom Europskeje unije a by 21. kraj była, kiž euro wužiwa. Jako dotal posledni kraj běchu 2023 Chorwatsku do kruha euro-krajow přiwzali. Dalši kraj ze zhromadnej měnu wolóža wikowanje a pućowanje. Tež turisća maja z toho lěpšiny, dokelž njetrjebaja swoje pjenjezy wjace na lew změnić, štož je z přidatnymi kóštami zwjazane.
Lětadła wotleća do směra na juh
Lipsk/Halle/Drježdźany (dpa/SN). Ze spočatkom lěćnych prózdnin w Sakskej a Saksko-Anhaltskej poda so tež lětsa zaso wjele dowolnikow do słónčneho juha. Kónc tydźenja wotleći cyłkownje 81 pasažěrskich lětadłow do směra na juh: 55 mašinow z lětanišća Lipsk/Halle a 26 z Drježdźan. Dohromady wočakuja na woběmaj lětanišćomaj hač do 24 500 pasažěrow.
W Lipsku/Halle maja 32 dowolowych lětow planowanych, předewšěm do Antalyje, na Mallorcu, do Hurghady a Herakliona. Lětanska towaršnosć Marabu poskića 14 a z tym najwjace prózdninskich wotlětow. Dalše su Sun Express, Condor kaž tež Freebird Airlines. Přidatnje wobsteji z Lipska/Halle 13 linijowych zwiskow, mjez nimi dźesać do Frankfurta.
W Drježdźanach poskićeja dohromady dwanaće prózdninskich a 14 linijowych lětow. Najwjace ludźi poleći do Antalyje, na Mallorcu a na grjeksku kupu Rhodos. Lufthansa je w Drježdźanach najwoblubowaniša airline a zwjazuje město z Frankfurtom a Mnichowom. Wulkeho nawala dla doporučeja zamołwići, zo měli sej dowolnicy sčasom parkowanišćo při lětanišću skazać.
Dokumentuja wopyt Willija Stopha w kaolinowni 1981
Kamjenej (UM/SN). W kaolinowni w Kamjenej na sewjeru Budyskeho wokrjesa njejsu na wažny termin w stawiznach zawoda zabyli: 25. měrca 1981 mějachu tam wulki statny wopyt. Willi Stoph, tehdyši předsyda ministerskeje rady NDR, bě z wulkej delegaciju do zawoda přijěł, zo by zwoprawdźenje noweho „inwesticiskeho objekta“ sobu dožiwił, nimale dospołnje ponowjenu připrawu za transport a rjedźenje kaolina w zawodźe pola Rakec. Samo nowina Neues Deutschland bě na prěnjej stronje wo tym rozprawjała. „Tehdy knježeše tu nalada rozmacha“, rozłoži Mathias Haase. Wón dyrbi to wědźeć, wšako je wot lěta 1980 hač do 2024 w zawodźe dźěłał.
Twarske nadawki přepodali
Nowa Wjeska (SN/MiP). We wjesnym towarstwowym domje w Nowej Wjesce su so srjedu Worklečanscy gmejnscy radźićeljo zešli. Hłowny dypk na posedźenju běše diskusija a wothłosowanje wo přepodaću wjacorych twarskich nadawkow w zwisku z přetwarom Worklečanskeje Serbskeje wyšeje šule „Michał Hórnik“. Nadawk za wohnjoškit a za zatwar lifta we wobjimje 176 000 eurow su radźićeljo Łazowskej firmje Swanenberg přepodali. Nadawk za instalowanje elektroniki z cyłkownym wobjimom 418 000 eurow dóstanje firma Gerold Zieschang z Němcow a nadawk za zatwar tepjenskeje, sanitarneje a přewětrjenskeje techniki z wobjimom 518 000 eurow dadźa firmje HSKG z Kamjenca.
Nimo toho informowaše zastupjer energijoweho předewzaća Sachsen Energie přitomnych wo móžnosćach nadróžneho wobswětlenja w gmejnje. Po tym předstaji wjesnjanosta Clemens Poldrack (njestronjan) nowu internetnu stronu gmejny, kotruž je Nowosličan Tomaš Kutter zhotowił. Design noweje strony je přehladniši a atraktiwniši a wopytowar nadeńdźe tam nětko rubriku ze zjimanjemi wjesnjanosty wo najnowšich podawkach w gmejnje.
To a tamne (27.06.25)
Z pokradnjenym dźěćacym kolesom chcyše muž w hornjej Frankskej dener zapłaćić. Njeznaty bě wobsedźerjej wobchoda w Marktredwitzu rjekł, zo drje pjenjezy nima, zo pak by jemu za dener koleso přewostajił. Předawarjej bě to podhladne, zazwoni policiju. Prjed hač zastojnicy dojědźechu, bě so njeznaty zminył. Policisća pak zwěsćichu, zo bě paduch sto eurow drohe koleso w měsće pokradnył. Policija pyta nětko za swědkami.
Šefowka drogoweho wotrjada policije w francoskim Marseillu je podhladna, zo njeje swoje winowatosće spjelniła, jako so 400 kilogramow kokaina ze składa policije zhubi. Tež přećiwo jeje zastupjerjej nětko přepytuja. Dalšeju policistow, kotrajž staj přećiwo drogowym cwólbam slědźiłoj, su zajeli. Njeje wuzamknjene, zo su wobdźěleni kriminelnym pomhali, kokain ze składa pokradnyć.
