Z hesłom „No Space for Bezos“ – žane městno za Bezosa – ...
Iranske rakety Israel docpěli
Tel Aviv (dpa/SN). Masiwny raketowy nadpad Irana na Israel je po informacijach medijow chorownju na juhu Israela trjechił. Iranska raketa je do twarjenja w měsće Beerscheva zrazyła a wulke škody zawostajiła. Iran twjerdźi, zo je israelske wojerske zepěranišćo nadběhował. Tež w druhich městach Israela su salwy iranskich raketow wulke škody naparali. Potrjechene bě pječa tež israelske zakitowanske ministerstwo a centrala tajneje słužby mossad. Israel tomu dotalnje njewupraja.
Po informacijach medijow zasadźuje Iran rakety noweje generacije, kotrež su přewšo spěšnje po puću. Israelski powětrowy zakitowanski system Irondome móže je přeco hubjeńšo wottřělić.
Zeleni kritizuja wahanje koalicije
Putin zwólniwy so z Merzom zetkać
Pětrohród (dpa/SN). Ruski prezident Wladimir Putin je zasadnje zwólniwy, so ze zwjazkowym kanclerom Friedrichom Merzom (CDU) na rozmołwu zetkać – jeli tón jeho wo to prosy. „Smy stajnje za to wotewrjeni“, rjekny Putin na prašenje powěsćernje dpa na mjezynarodnej nowinarskej konferency w Pětrohrodźe. Zdobom warnowaše ruski prezident před „jara ćežkej škodu“ za rusko-němske poćahi, dyrbjało-li zwjazkowe knježerstwo Ukrainje němsku raketu typa Taurus přewostajić. Ju móža jenož oficěrojo zwjazkoweje wobory posłužować, toho je sej Putin wěsty. „Potajkim bychu wojacy zwjazkoweje wobory z němskimi brónjemi přećiwo Ruskeje wojowali“, prezident zjima.
Najebać to njeby Taurus wotběh wójny změnił, tak Putin. Wón doda: „Ruske wójsko je na wšitkich wotrězkach fronty wuspěšne a ma strategisku iniciatiwu.“
Zo móhła Němska we wójnje w Ukrainje rólu posrědnika přewzać, njemóže sej Putin předstajić. „Němska njeje neutralna. Wona dodawa Ukrainje tanki a je tak na wójnje wobdźělena“, wón měni.
Sakska žada sej solidaritu
Bój přećiwo afriskej swinjacej mrětwje druhe kraje lědma stara
Drježdźany (dpa/SN). Sakska žada sej wot zwjazkoweho knježerstwa a wot druhich zwjazkowych krajow solidaritu w boju přećiwo zwěrjećim mrětwam. „Tole njemóže jenož naležnosć jednotliwych zwjazkowych krajow być. Situacija afriskeje swinjaceje mrětwy nam tole najlěpje pokazuje, wšako stej nětko tež Hessenska a Sewjerorynsko-Westfalska potrjechenej“, rjekny ministerka za strowotnistwo Petra Köpping (SPD). Sakska je za bój přećiwo swinjacej mrětwje 50 milionow eurow wudała a steji z tutymi kóštami nětko sama – byrnjež škitne naprawy strach rozšěrjenja mrětwy tež w druhich zwjazkowych krajach znižili.
Sportej zdar!
Žony lěpje hospodarja
Berlin/Mnichow (dpa/SN). Žony w Němskej su krizu stupacych kóštow za žiwjenje minjene štyri lěta lěpje zmištrowali hač mužojo. Tole je přepytowanje datow wunjesło, kotrež je banka N26 přewjedła. Institut Ifo a Mnichowska techniska uniwersita stej při wuhódnoćenju datow pomhałoj.
Přepytowanje kontowych podłožkow 20 000 připadnje wuzwolenych kupcow banki pokazaja, zo su mužojo mjez 2021 a 2024 wjace pjenjez zasłužili hač žony. Jich dochody přiběrachu wo 27,4 procenty, pola žonow běchu to 24,4 procenty. Žony pak tole ze swojimi wudawkami lěpje wurunachu. Woni bjerjechu nimo toho 34 procentow mjenje dispokreditow hač mužojo.
Fachowcy zwěsća, zo su žony najebać niše dochody krizu wyšich wudawkow za žiwjenje derje zmištrowali. Tole pokaza na to, zo woni wědomišo z financami wobchadźeja.
Z analyzy wučitamy, zo su wudawki ludźi wo 23,8 procentow přiběrali, dochody pak jenož wo 20,3 procenty. Mnozy su tuž nowe kredity brali. Nalutowanki na kontach pak su woteběrali.
Mały tapir wobradźa wjele wjesela
Wuchod so poněčim zhraba
Drježdźany (dpa/SN). Hospodarstwo wuchodneje Němskeje so po měnjenju Drježdźanskeho instituta Ifo poněčim zaso zhraba. We wobłuku swojeje prognozy srjedź lěta su sej wědomostnicy wěsći, zo su najniši dypk konjunkturneje krizy přewinyli. Za wuchodnu Němsku wočakuja lětsa hospodarski rozrost 0,3 procenty, přichodne lěto samo 1,3 procenty.
Nowy impuls je za slědźerjow Ifo wuslědk planowanych pjenježnych naprawow zwjazkoweho knježerstwa, byrnjež te na wuchodźe strukturnych wosebitosćow dla snadniše byli hač na zapadźe. Tak drje změja planowane wudawki za brónjenje skerje w zapadnych zwjazkowych krajach wliw.
Planowane wudawki za infrastrukturu so porno tomu na wuchodźe pozitiwnje wuskutkuja. „Hladajo na wulke časowe planowanske wužadanja a pobrachowace dźěłowe mocy pak wuchodne hospodarstwo najprjedy raz wjele z toho njezměje“, rjekny Robert Lehmann z Mnichowskeho instituta Ifo. Hakle w běhu lěta 2026 so wuwiće polěpši. To płaći tež za wšu Němsku. Po wšěm kraju wočakuja potom hospodarski rozmach 1,5 procentow.
To a tamne (19.06.25)
Chabłaca přichilnosć mjez partneromaj je normalna. Tole je wuslědk psychologiskeho přepytowanja pod nawodom uniwersity w Mainzu, kotruž su w fachowym časopisu Journal of Personality a Social Psychology wozjewili. Potajkim je bjeze wšeho móžne, zo so sympatija za druheho w běhu dnjow abo samo jeničkeho dnja widźomnje změni. Poriki dyrbjeli wědźeć, zo su tajke změny sympatije normalne a nic hnydom znamjo wulkeje krizy.
Pozdatny puma při Geiseltalskim jězorje pola hessenskeho Braunsbedra bě jenož kóčka. Tole je nětko fachowc za wuslědźenje zwěrjećich stopow wobkrućił. Widejo, kotrež pokaza wjetše rubježne zwěrjo, je wočiwidnje skomolene. Kóčka sedźeše před ćernikom na nahłej skłoninje a skutkowaše tak wo wjele wjetša hač je. Za pozdatnym puma su wulce pytali.
