Berlin (dpa/SN). Bywši předsyda frakcije SPD Rolf Mützenich je so za to wuprajił, Israelej hižo žane brónje njedodawać. „To móhł nětko zasadnje dobry rozsud być“, wón dźensa w interviewje ze sćelakom Deutschlandfunk zwurazni, předewšěm hladajo na tuchwilne postupowanje israelskeje armeje w Gazaskim pasmje. Zwjazkowe knježerstwo dyrbi z parlamentom wo tym wuradźować a na kóncu zwjazkowa wěstotna rada wo tym ­rozsudźi. Zwjazkowy kancler Friedrich Merz (CDU) je so wčera raznje přećiwo postupowanju Israela wuprajił. Na Europskim forumje sćelaka WDR w Berlinje wón wčera zwurazni, zo njerozumi, što israelske wójsko w Gazaskim pasmje čini. „Ja zaměr njezapřimnu. Ciwilna towaršnosć dale a bóle ćerpi, předewšěm minjene dny. To njehodźi so hižo z bojom přećiwo terorizmej wopodstatnić.“

Berlin (dpa/SN). Dźěłarnistwo IG Metall je hladajo na napjate hospodarske połoženje swoje dotalne žadanje za štyri dny trajacym dźěłowym tydźenjom spušćiło. „Štyri dny trajacy tydźeń z połnej mzdu njesteji aktualnje hižo na lisćinje žadanjow dźěłarnistwa“, rjekny předsydka dźěłarnistwa Christiane Benner nowinarjam. Přiwšěm wostanje tajke rjadowanje dźěłoweho časa zmysłapołne.

Hladajo na napjate hospodarske połoženje w mnohich wobłukach Benner na to pokaza, zo dźěłodawarjo sami dźěłowy čas přistajenych přikrótša – na kóšty přistajenych.

Při cyłoněmskim zawjedźenju štyri dny trajaceho tydźenja z połnej mzdu boja so předewzaća negatiwnych sćěhow za němske hospodarstwo. Při wopra­šowanju rjekny 94 procentow wšěch 823 woprašanych předewzaćow, zo bychu hospodarski potencial přisadźili. Nimale 70 procentow firmow rjekny, zo njebychu swoje nadawki spjelnić móhli a zo bychu mjezynarodnje zwisk k načolnym předewzaćam zhubili.

W rjadach SPD wobaraja so zběhnjenju wobmjezowanja němskich brónjow

Berlin (dpa/SN). Wot zwjazkoweho kanclera Friedricha Merza (CDU) připowědźene zběhnjenje wšěch wobmjezowanjow při zasadźenju němskich brónjow přećiwo Ruskej zbudźa kritiku SPD. Socialdemokratiski politikar za wonkowne naležnosće Ralf Stegner nima kročel Merza „za pomocliwu“. Nowinarjam wón rjekny: „Wšitko, štož wójnu rozšěrja, je ­wopačne. Lěpje by było, diplomatiske prócowanja zesylnjeć.“

Zastupowaca předsydka Zelenych ­Agnieszka Brugger porno tomu připowědź zwjazkoweho kanclera wita. „Wladimir Putin runje z nowej surowosću wšitke prócowanja wo měr a rozmołwy z bombami niči. By wulki zmylk był, tomu přihladować“, wona rjekny.

Merz bě wčera na Europskim forumje sćelaka WDR w Berlinje rjekł, zo za wot Němskeje dodawane brónje w Ukrainje hižo žane wobmjezowanja njepłaća, štož dalokosć zasahnjenja na ruskim teritoriju nastupa. To rěka, „zo móže so Ukraina nětko tež zakitować, z tym zo na přikład wojerske zepěranišća w Ruskej nadbě­huje. To wona dotal w tutej formje njemóžeše“, Merz rjekny.

„Hdyž njewěš, kak dale póńdźe, załož dźěłowe koło!“ Na tute hrónčko wězo njemyslu, hdyž wo nowym interministerielnym dźěłowym kruhu sakskeho knježerstwa za serbske naležnosće čitam. Sprawnje prajene je mi wšojedne, kak tam swoju internu strukturu organizuja. To słuša do suwerenity eksekutiwy. Wotmołwy knježerstwa na naše prašenja na to pokazuja, zo su sej něšto při swojim rozsudźe myslili. Na kóncu płaća wuslědki. Najwjetši nadawk wólbneje periody budźe aktualizowanje Serbskeho zakonja, wšako njejsu sej Serbja přezjedni (hlej na Domowinu a Serbski sejm) a nima knježerstwo wjetšinu w krajnym sejmje. We łoskoćiwej situaciji tči předsyda serbskeje rady, kiž je zdobom předsyda ­Domowiny – a najskerje profi dosć, zo to zmištruje. Ćim wažniše budźe pěstowanje politiskeho herbstwa něhdyšeje předsydki załožboweje rady Susann Šenkec: pra­widłowne wuradźowanja zastupjerjow wšěch serbskich gremijow, zo bychu so wothłosowali. Marcel Brauman