Spěwar JJ z Awstriskeje je ze swojim titulom „Wasted Love“ ...
Israel pomocza Gazu dopušći
Ruskej hroža nowe sankcije
London (dpa/SN). Bjezposrědnje do telefonata prezidenta USA Donalda Trumpa z ruskim prezidentom Wladimirom Putinom su Němska a dalši wažni zwjazkarjo Ukrainy ćišć na Rusku zwyšili. Statni a knježerstwowi šefojo Wulkeje Britaniskeje, USA, Němskeje, Francoskeje a Italskeje su w telefonaće „tež nowe móžne sankcije“ wobrěčeli, njedyrbjała-li Ruska chutnym rozmołwam wo přiměrje a měrowym jednanjam přizwolić“, zdźěli rěčnica britiskeho knježerstwa. Kotre sankcije kraje planuja, njeje dotal znate.
Trump bě wčera připowědźił, zo chce dźensa znowa z Putinom telefonować a z nim wo přiměrje w dlěje hač tři lěta trajacej wójnje rěčeć. Hłowny zaměr je, tak Trump, wójnu w Ukrainje skónčić.
EU gratuluje dobyćerjej w Rumunskej
Bukarest (dpa/SN). Wulke wjeselo mjez Parisom a Kijewom: Po wólbnym dobyću EU přichileneho rumunskeho politikarja Nicusora Dana we wólbach prezidenta su europscy načolni politikarjo wolóženi. Hišće wčera wječor gratulowachu ukrainski prezident Wolodymyr Zelenskyj, prezidentka komisije EU Ursula von der Leyen, francoski prezident Emmanuel Macron a moldawska prezidentka Maia Sandu 55lětnemu k wólbnemu dobyću. Dan bě so njewočakowano přećiwo prawicarskemu populistej Georgejej Simionej přesadźił. Po wuličenju nimale wšěch wólbnych lokalow je sej Dan 54 procentow hłosow wubědźił, Simion docpě něhdźe 46 procentow.
W prěnim wólbnym kole nawjedowaše Simion cyle jasnje ze 40,1 procentom. Dan ležeše z runje 21,1 procentom z wulkim wotstawkom za nim.
Simion je swoju wólbnu poražku mjeztym přiznał. Wón gratulowaše wólbnemu dobyćerjej a rěčeše wo hórkej poražce. Do toho bě sej Simion hišće dospołnje wěsty był, zo wólby dobudźe.
Rozsud hakle w druhim kole
Wólby prezidenta w Pólskej bjez jasneho dobyćerja wostali
Waršawa (dpa/SN). Prěnje koło prezidentskich wólbow w Pólskej njeje jasneho dobyćerja wunjesło. Minjenu nóc wozjewjene prognozy mějachu liberalneho konserwatiwneho kandidata knježerstwoweho lěhwa Rafała Trzaskowskeho ze 31,1 procentom hłosow za dobyćerja ze snadnym předskokom. Jemu sćěhuje kandidat narodneje konserwatiwneje strony PiS Karol Nawrocki ze 29,1 procentom. Dokelž nima žadyn z njeju trěbnu absolutnu wjetšinu, přewjedu 1. junija rozsudne koło prezidentskich wólbow.
Třeći bu Sławomir Mentzen wot prawicarskoekstremistiskeje strony Konfederacja ze 14,8 procentami. Na štwórte městno přińdźe tohorunja prawicarskoekstremistiski Grzegorz Braun ze 6,3 procentami. Wólbne wobdźělenje wučinješe 66,8 procentow. Wólbne prognozy kaž w Němskej njejsu w Pólskej z wašnjom. Hamtski wólbny wuslědk wočakuja najzašo dźensa wječor.
Pisany připlack
Mało dowěryw předewzaćach
Bad Saarow (dpa/SN). Předewzaća na wuchodźe Němskeje tak prawje njewěrja, zo ma nowe zwjazkowe knježerstwo CDU/CSU a SPD srědki za impulsy na dobro rozrosta hospodarstwa. Tole je wuslědk woprašowanja składnostnje wuchodneho Němskeho hospodarskeho foruma w braniborskim Bad Saarowje, kotryž zajutřišim, njedźelu zahaja. Hač do wutory chcedźa předewzaćeljo, zastupnicy hospodarskich zwjazkow a politiskich stron wo wupućach z napjateho hospodarskeho połoženja diskutować.
Nimale 60 procentow wšěch woprašowanych firmow dwělowaše, zo ma knježerstwo koncepty za hospodarski rozmach. Woprašeli běchu so 1 500 předewzaćow ze znajmjeńša dźesać sobudźěłaćerjemi we wšěch pjeć zwjazkowych krajach wuchodneje Němskeje .
Nimo běrokratije a wysokich płaćiznow energije předewzaćelow wosebje zaběra, kak móhli swojich sobudźěłaćerjow w zawodźe dźeržeć a nowych kmanych ludźi namakać. Tole rjekny 52 procentow firmownikow. Płaćizny energije stejachu ze 34 procentami na druhim městnje najwjetšich starosćow.
Akciski dźeń na dobro dźěći
Nadźijeja so lěpšeho wjedra
Drježdźany (dpa/SN). Sezona piwowych zahrodow je zahajena. Korčmarjo a hosćencarjo, kotřiž piwowe zahrody wobhospodarjeja, nadźijeja so wobstajneho dobreho wjedra. „Woni wjesela so na tute tydźenje. Lěćny čas je mnohim wažne žórło wobrota, runje lětsa“, rjekny Axel Klein, hłowny jednaćel zwjazka hotelownikow a hosćencarjow w Sakskej (Dehoga). „Trjebamy sezonu, po tym zo njebě prěni kwartal jara pozitiwny. Tole dyrbja woni nětko na někajke wašnje nachwatać.“
Klein je optimistiski, byrnjež sej sydom procentow nadhódnotoweho dawka prjedy přał. Nowe zwjazkowe knježerstwo bě so na to dojednało, nadhódnotowy dawk na jědźe w hosćencach wot tuchwilu 19 procentow wot 1. januara 2026 trajnje na sydom procentow znižić. Za čas koronakrizy běchu to hižo tak činili, ale jenož hač do kónca 2023.
Po wšej Sakskej je po informacijach Dehoga 179 piwowych zahrodow, najwjace z nich w Lipsku (26) a Drježdźanach (24). Nimo toho ma mnoho hosćencarjow tež terasy, druhe městna pod hołym njebjom a nadróžne kofejownje. Wosebje w městach to ludźo lubuja.
To a tamne (19.05.25)
Darmotnje zmjerzlinu rozdźělił je njeznaty muž w lodarni w badensko-württembergskim Pforzheimje. Starši muž bě do wobchoda přišoł, 180 eurow ze zaka wućahnyć a wo to prosył, ludźom za to lód wudać. Wjace hač sto kulkow lodu su na to w běhu třoch hodźin wopytowarjam darili, kotřiž běchu runje we wobchodźe. Mějićelej lodarnje njeznaty přeradźi, zo je runje infarkt wutroby přetrał a zo ma jeho dźowka narodniny.
Dźesać mjeńšin bjez pilota je pasažěrske lětadło Airbus wot Frankfurta do španiskeho Sevilla lećało. Jako bě kapitan wustupić, so kopilot na swojim stólcu sedźo zwjeze. Najebać to lětadło z pomocu awtopilota stabilnje dale lećeše. Nahrawanja rekordera połoženje dokumentuja. Hakle dźesać mjeńšin pozdźišo so pilotej poradźi, durje cockpita z nuzowym čisłom zaso wotewrěć.
