Berlin (dpa/SN). Po CSU a CDU su nětko tež čłonojo SPD z přemóžacej wjetšinu zrěčenju k wutworjenju koalicije CDU/CSU a SPD přihłosowali. Na wšěch 84,6 procentow čłonow je za zrěčenje hłosowało, kaž dźensa w Berlinje zdźělichu. Nětko móža koaliciske zrěčenje přichodnu póndźelu w Berlinje podpisać. Dźeń po tym je planowane, Friedricha Merza (CDU) za noweho zwjazkoweho kanclera Němskeje wuzwolić. Bjezposrědnje po tym spřisahaja w zwjazkowym sejmje ministrow noweho knježerstwa.

Tak derje kaž wěste je, zo wostanje ­Boris Pistorius zakitowanski minister. Předsyda SPD Lars Klingbeil budźe wicekancler. Wo přichodźe druheje předsydki SPD Saskie Esken njejsu pječa hišće rozsudźili, z kruhow SPD rěkaše.

Wot 15. apryla měješe 358 000 čłonow SPD składnosć, wo 144 stron wopřijacym koaliciskim zrěčenju „Zamołwitosć za Němsku“ rozsudźić. Cyłkownje 56 procentow čłonow je so wobdźěliło. Tak su trěbne minimalne wobdźělenje 20 procentow za płaćiwy wotum přetrjechili.

Zo nowozadołženje zwjazkoweho knježerstwa wobydlerjow w Budyskim wokrjesu zaběra, so wčera w Połčnicy pokaza. Rumnosć w hosćencu „Schützenhaus“ bě dospołnje wobsadźena, tak zo dyrbjachu organizatorojo stólcy přistajić. Jako hosća bě sej Budyski wokrjesny zwjazk CDU prof. dr. Georg Milbradt přeprosył. Bywši sakski ­ministerski prezident a hospodarski wědomostnik ludźom rozkładźe, kak stat swój dołh financuje. Nowozadołženje zwjazkoweho knježerstwa je wězo poćeženje, ale tež šansa. Za to pak su rozumne změny trěbne. Zajimawy dohlad to, z kotrymž měli so wobydlerjo rozestajeć. Woni wšak dyrbja za rozsudy zwjazkoweho knježerstwa zličbowanku zapłaćić. Wězo maja wšitcy – hač zapósłancy abo jednory lud – přeća. Wone pak dyrbja so financować móc. We wólbnym boju politikarjo wjele slubja. A wězo chcedźa tole ludźo tež ­słyšeć. Wšitkim pak ma wědome być, kak tołsta je móšnja abo konto tych, kotřiž dyrbja to zapłaćić. Bianka Šeferowa

Parada parnikow, kotruž Towaršnosć sakskeho parnikoweho łódźnistwa hižo přez lětdźesatki na Łobju zarjaduje, so tež lětsa zaso – najebać dźěłow na Carolinym mosće – 1. meje w Drježdźanach wotměje. Hižo dawno wuknihowanych 11 parnikow a motorskich łódźow zhromadźa so na zwučene wašnje na wotrězku Łobja w Drježdźanskim měšćanskim dźělu Johannstadt a zarjaduja so tam do staroznateje formacije. Wottam startuje parada na směr Pillnitz. Tam dojěwši so łódźe na wróćojězbu zawróća. Kaž přeco postaraja so najwšelakoriše hudźbne skupiny wo dobru naladu mjez pasažěrami. Foto: Jürgen Männel

Z wulkim apetitom a samo chětro wušiknje su so paduši do rěznistwa w Hohenstein-Ernstthalu zadobyli. Kaž policija zdźěli, pokradnychu njeznaći w nocy na wutoru rězniske wudźěłki w hódnoće 200 eurow. Při namócnym wotewrjenju elektriskich suwacych so duri načinichu pak jenož snadnu škodu dźesać eurow. Što su dokładnje spakosćili, policija hišće rjec njemóžeše, prosy pak swědkow – kiž su něšto widźeli – wo pomoc.

Maturitne pruwowanje w němčinje wospjetować dyrbja na gymnaziju w Uetersenje pola Hamburga. Wohnjowy alarm bě pruwowanja přetorhnył. Na to su kubłanišćo dospołnje ewakuowali. Paliło pak so njeje. Policija tuka na techniski defekt, kiž je alarm zbudźił. Po informacijach kubłanskeho ministerstwa dyrbja klawsuru nětko wospjetować, dokelž mějachu šulerjo składnosć, sej wuměnić.