Lěwica žada sej wotstup ministra Ulbiga
Drježdźany (SN). Lěwica w Sakskim krajnym sejmje je hladajo na najnowšu rozprawu fachowcow w padźe terorizma podhladneho Al-Bakra sakskeho nutřkowneho ministra Markusa Ulbiga (CDU) namołwjała wotstupić. Nimo toho dyrbjało knježerstwo šefa krajneho kriminalneho zarjada Jörga Michaelisa pušćić. Lěwica ma za dopokazane, zo je šef kriminalneho zarjada hłownje za misnjenja w zwisku ze spočatnje zwrěšćenym zajećom Al-Bakra a jeho pozdźišim sebjemordarstwom w jastwje zamołwity. Ulbig jako zamołwity minister pak měł politisku zamołwitosć přewzać a ze swojim wotstupom naslědnikej puć runać, rjekny nutřkopolitiski rěčnik frakcije Lěwicy Enrico Stange na dźensnišim posedźenju krajneho sejma.
Bojow dla tež ludnosć ćerpi
To a tamne (01.02.17)
Do paslow zalězł je sej paduch w Germeringu pola Mnichowa, jako chcyše drasty z kontejnera za staru drastu kradnyć. Při tym zhubi runowahu a suny so přez škałbu do kontejnera, policija zdźěli. 35lětny podarmo spytaše so ze sudobja zaso wudrapać. Hakle jako pěšk spodźiwne zwuki z kontejnera słyšeše a nuzowe čisło zawoła, přińdźe pomoc. Wohnjowi wobornicy zamk při kontejneru přerězachu a jateho wuswobodźichu.
Wjace hač tysac ludźi je so wčera w kostimach něhdyšich wikingow w šotiskim Lerwicku na kóždolětnym festiwalu „Up Helly Aa“ wobdźěliło. Z rjećazowymi košlemi, nahłownikami a brónjemi wuhotowani ćehnjechu wobdźělnicy po městačku hłowneje ze Shetlandskich kupow. Festiwal zarjaduja tam wot lěta 1880 w tradiciji historiskich nowolětnych a swětłowych swjedźenjow.
Kritizuja personal Trumpa
Washington (B/SN). Narodna cyrkwinska rada USA je wažne personelne rozsudy noweho prezidenta Donalda Trumpa kritizowała. Zastupjerjo 38 protestantskich a ortodoksnych cyrkwjow wumjetuja pomjenowanym wosobam Jeffej Sessioej (minister justicy), Stephenej Bannonej (šefstratega) a Michaelej Flynnej (poradźowar wěstoty), zo podpěruja woni „rasizm, antisemitizm, běłe předprawo, hidu cuzym napřećo a antimuslimske ideologije“. Trump bě Bannona za swojeho wosobinskeho poradźowarja powołał a za to druhich wažnych zamołwitych z najwušeho kruha wuzamknył.
Woblubowane předmjeno
Vatikan (B/SN). Wot spočatka pontifikata bamža Franciskusa je předmjeno Francesco na prěnim městnje najwoblubowanišich italskich hólčich mjenow, wězo tež we Vatikanje. Před tydźenjomaj, na swjatym dnju křćeńcy Knjeza, wukřći bamž 28 dźěći vatikanskich přistajenych. Mjez nimi běchu hnydom štyrjo mali Francesco, štož je italska wersija za Franciskusa.
Tež křesćanow wuswobodźili
Woškrota dla wjele zražkow
Mnichow/Rostock (dpa/K/SN). Woškrot je we wuchodnej Němskej šoferam njemałe starosće načinił. Lodojtych pućow dla je k mnohim njezbožam dóšło. W delnjej Bayerskej měješe policija w nocy 40 zražkow registrować. A 4 do směra na Regensburg je połdra hodźiny zawrjena była. W mnohich šulach wupadny wučba. W Mecklenburgsko-Předpomorskej je 29 njezbožow było. Třo ludźo poćerpichu lóše zranjenja. K zražkam dóńdźe tež w Durinskej a Sakskej.
Železnica trjeba nowy kurs
Düsseldorf (dpa/K/SN). Načolna kandidatka Zelenych Katrin Göring-Eckardt sej po překwapjacym wotstupje šefa Němskeje železnicy Rüdigera Gruby žada, zo změni koncern swój kurs. Naslědnik dyrbjał „być woprawdźity eksperta ze železniskeje branše“. Nastupajo změnu strategije wona naležnje rjekny: „Město nje- trjebawšich prestižnych projektow abo dwělomnych inwesticijow za morjom měła so železnica na solidne jadrowe předewzaća koncentrować.“
Zaso ptača gripa
Kanclerka kuražnje na Trumpa
Powětr špatny
To a tamne (31.01.17)
Na třoch kolesach dale jěła je 82lětna wodźerka wosoboweho awta w Badensko-Württembergskej, po tym zo bě koleso zhubiła. Bjezposrědnje do toho bě wona njedaloko Pforzheima z dróhi zjěła a do skłoniny zrazyła. Při tym so wobruč pušći a do napřećo přijěduceho awta zrazy. Najebać to staruška dale jědźeše. Druhim šoferam so poradźi, žonu zadźeržeć. Woni běchu před njej jěducy borzdźili.
Z nakładnym awtom na zamjerznjeny jězor zajěł je 32lětny muž njedaloko badensko-württembergskeho Knittlingena. Kaž policija zdźěli, běchu so durje na boku šofera wočinili. Přez to njekedźbliwy zajědźe muž z jězdnje, přełama wobhrodźenje a wosta hakle na zamjerznjenym jězoru stejo. Zmjerzk minjenych dnjow pak bě jeho zbožo: Móžeše so na dosć tołstym lodźe wuchować. Wohnjowi wobornicy awto z jězora na brjóh sćahnychu.
Rada starostow – gremij w zmysle kulojteho blida
Ze swjatočnej ceremoniju je iniciatiwa Serbski sejm čłonki a čłonow Rady starostow powołała. Starosća pochadźeja z Delnjeje, srjedźneje a Hornjeje Łužicy.
Wojerecy (SN/at). 19 wosobow z nimale wšěch kónčin dwurěčneje Łužicy Radźe starostow přisłuša. Jich je iniciatiwa Serbski sejm na zjawnym zarjadowanju sobotu we wěrowanskej rumnosći Wojerowskeho hroda powołała.
Petry wuzwolena
Klipphausen (dpa/SN). Sakska AfD poćehnje z Frauke Petry na čole do wólbneho boja za zwjazkowy sejm. Delegaća su zwjazkowu a krajnu předsydku strony wčera w Klipphausenje pola Mišnja na prěnje městno krajneje lisćiny wuzwolili. Druhe městno wobsadźi Drježdźanski sudnik Jens Maier. Petry, kotraž njeměješe přećiwneho kandidata, dósta 79,1 procent hłosow. Z nastajenjom kandidatow chcedźa 4. měrca pokročować.
Turkowska namołwja Němsku
Istanbul (dpa/SN). Do wopyta zwjazkoweje kanclerki Angele Merkel (CDU) štwórtk w Ankarje je Turkowska Němsku namołwjała, próstwy turkowskich wojakow wo azyl w Němskej wotpokazać. Dyrbjała-li Němska próstwam wojakow přizwolić, by tole „jara chutne konsek- wency“ měło, zdźěli turkowski zakitowanski minister Fikri Işik sćelakej CNN. Něhdźe 40 wojakow, kotřiž we wšelakich institucijach NATO dźěłaja, su wo azyl prosyli, dokelž so doma represalijow zwrěšćeneho wojerskeho puča dla boja.
Wobaraja so amnestiji
