Berlin (dpa/SN). Zwjazkowy prezident Frank-Walter Steinmeier hladajo na wohroženje přez koronawirus namołwja, hišće bóle wot doma dźěłać. „Zmóžniće to swojim přistajenym“, apelowaše zwjaz­kowy prezident minjeny pjatk w Berlinje na dźěłodawarjow. Tež na dźěłowym městnje měli ličbu kontaktow pomjeńšić. „Mjenje je wjace, runje nětko.“

Přistajenych zwjazkowy prezident w zhromadnym apelu dźěłodawarjow a dźěłarnistwow napomina, wotpowědne poskitki domjaceho dźěła přiwzać. „Njechodźće do běrowa, hdyž to nuznje trjeba njeje.“ Štóž doma dźěła, škita tež swojich kolegow a swoje koleginy. Steinmeier potwjerdźi, zo je přeco hišće přewjele na koronawirus schorjenych. Ličba zemrětych jeho „rudźi a zluda“.

Drježdźany/Podstupim (dpa/SN). W Sakskej wot dźensnišeho žane terminy za šćěpjenje njerozdawaja, ani internetnje ani telefonisce, kaž Kai Kranich wot Němskeho čerwjeneho křiža powěsćerni dpa zdźěli. Hłowna přičina je dlijace so dodawanje šćěpiwa firmy Biontech-Pfizer. „Móžemy jenož telko terminow knihować, kelkož mamy šćěpiwa“, Kranich rjekny. Nětko dyrbja zamołwići najprjedy raz wočaknyć, kak so połoženje dale wuwije. Poprawom chcychu dźensa telefoniske knihowanje terminow šćěpjenja zahajić. Najebać problemy je zaručene, zo dóstanu wšitcy hižo šćěpjeni tež trěbnu druhu sykawu.

W Braniborskej tuchwilu tohorunja móžno njeje termin šćěpjenja dóstać, dokelž nimaja dosć seruma. Ministerka za strowotnistwo Ursula Nonnemacher (Zeleni) chcyše w běhu dnja wo nadrobnosćach informować. Jasne hižo je, zo w šćěpjenskich centrumach a w chorownjach mjenje ludźi šćěpja. Kak dołho dyrbja dalše šćěpjenja přestorčić, njeje znate. W starownjach pak dale šćěpja.

Reakcije na wuzwolenje noweho zwjazkoweho předsydy CDU

Berlin/Podstupim (dpa/SN). Po wuzwolenju sewjerorynsko-westfalskeho ministerskeho prezidenta Armina Lascheta za noweho předsydu CDU namołwjeja wjacori politikarjo křesćanskodemokratisku stronu k jednoće. Tak je bayerski ministerski prezident Markus Söder (CSU) namjetował, při wólbach podležaneho by­wšeho frakciskeho předsydu Friedricha Merza do nawodnistwa CDU wusko sobu zapřijeć. Delegaća CDU běchu sobotu na internetnym zjězdźe Armina Lascheta za nawodu strony wuzwolili. Nimo Friedricha Merza bě tež wonkowny politikar Norbert Röttgen za zastojnstwo kandidował. Po zakónčenju zjězda bě Merz iritacije zbudźił, jako so zwólniwy wupraji, do nětčišeho zwjazkoweho knježerstwa zastupić a hospodarske ministerstwo Petera Altmaira (CDU) přewzać. Zwjazkowa kanclerka Angela Merkel namjet hnydom wotpokaza.

Rozsud přećiwo namjetam europskeje wobydlerskeje iniciatiwy Minority SafePack (MSPI) je raznu kritiku zbudźił. A mam ju za woprawnjenu. Měnju, zo je to hotowy politiski skandal, a prašam so, što su podpisma wobydlerjow Europy kaž tež wotum zapósłancow Europskeho parlamenta scyła hišće hódne, hdyž wšak je komisija Europskeje unije skónčnje zańč nima a prosće ignoruje. Ameriske wobstejnosće, kaž smy je pod prezidentstwom Donalda Trumpa tam stajnje zaso dožiwjeli, nje­trjebamy. Tak žane ćeže njerozrisamy. Na Europsku komisiju z jeje předsydku Ursulu von der Leyen dyrbja nětko ćišć wukonjeć, a to nic jeno ze stron narodnych mjeńšin Europy, ale runje tak ze stron sobustawskich krajow kaž tež wot wolenych čłonow Europskeho parlamenta. Wšako wjac hač 1,1 milion podpismow za MSPI jasnu rěč rěči. Njech so tež němske knježerstwo jasnje wupraji. Wšako je zwjazkowy sejm wobydlerskej iniciatiwje podpěru přilubił. Janek Wowčer