Wulki projekt 1. serbskeje kulturneje brigady
Budyšin (hš/hh/SN). Tuchwilu probuje chór 1. serbskeje kulturneje brigady pilnje z pomocu internetoweho programa Jamulus, kaž zhonichu SN wot wuměłskeho nawody chóra Friedemanna Böhme. Program pak ma wysoke techniske naroki, čehoždla njeje wšitkim čłonam ćělesa móžno sej trěbne nastroje, kaž headset, wobstarać a instalować. Tak so jenož 20 z cyłkownje 65 sobustawow chóra na digitalnych probach wobdźěla. Nimo toho špatna internetna syć we Łužicy zwučowanja poćežuje. Po měnjenju dirigenta so proby přiwšěm wudanja, byrnjež lochko njebyło so wobstejnosćam přiměrić. Su pak tajke digitalne proby woprawdźe efektiwne? Tež Friedemann Böhme njeje sej toho cyle wěsty. Samozrozumliwje bychu brigadnicy swoje proby najradšo zaso w Serbskim gymnaziju přewjedowali. Tola tajke drje tele šulske lěto korony dla wjace njebudu.
Literarne dny so na puć podadźa
Zhorjelc (AK/SN). Pod hesłom „Travelling Wor(l)ds“ wotměja so wot 9. do 13. junija lětuše literarne dny nad Nysu digitalnje. Kulturna serwisowa towaršnosć Zhorjelc hromadźe z partnerami na nje přeproša.
„Runje nětko skići nam swět literatury bóle dyžli hewak składnosć, sej druhe kraje, rěče, kultury a samo swěty wotkrywać“, wabja Zhorjelscy zarjadowarjo za program, kotryž móža zajimcy lětsa bjezpłatnje přez livestream dožiwić. Na zahajenju 9. junija poda so awtor Hans-Christian Trepte hromadźe z pólskim awtorom knihi „Miedzianka“ Filipom Springerom a přełožerku Lisu Palmes na slědy mjenowaneje delnjošleskeje wsy, kotraž němsce Kupferberg rěkaše a dźensa wjace njeeksistuje. Po tym dunda na „Spoken Word Night“ pjeć wuměłcow z cellistku po swěće słowow.
Basnika jako čłowjeka zeznać
Šćežka Ćišinskeho přeproša na pućowanje po žiwjenju Jakuba Barta
Hižo stajnje móžeš so w Pančicach-Kukowje najlěpje ze žiwjenjom a skutkowanjom Jakuba Barta-Ćišinskeho zeznajomić. Tu su ródny dom, twarjenje, hdźež je do šule chodźił, pomnik w Lipju, hłowna dróha a šula z jeho mjenom, w šuli wopomnišćo a w susodnym Wotrowje jeho row. Wšitke tele městnosće zwjazuje wot njedawna Šćežka Ćišinskeho. Po njej kročo móža sej wšitke starobne skupiny jednoho z najsławnišich serbskich basnikow spřistupnić a jeho zdźěla cyle hinak dožiwić, hač běchu to snano w šuli nawuknyli.
Dwě nowej sobudźěłaćerce naraz
Łužica klinči
Podstupim (SN). Braniborske ministerstwo za wědomosć, slědźenje a kulturu přeproša wšitkich hudźacych na decentralny festiwal. Wot 27. do 29. awgusta chcedźa jón pod hesłom „Łužica klinči! Swjedźeń amaterskeje hudźby“ přewjesć. Ma to być decentralne zarjadowanje, kotrež podpěruja syćowe a spěchowanske programy za amaterske hudźbne ansamble.
Přeprošene su wšitke ansamble – wšojedne hač maja wjele abo mjenje hudźbnikow, hač su tradicionalne abo nowe cyłki, hač chóry abo skupiny, hač smyčkowe abo dujerske wobsadki – wšitke smědźa so we wobłuku festiwala prezentować. Wosebitosć je, zo wuměłski cyłk tam hudźi, hdźež to powšitkownje čini, to rěka doma. Program móže dźesać minutow abo tež dwě hodźinje trać, móže so wotměć z abo tež bjez publikuma, pod hołym njebjom abo w probowej rumnosći, na torhošću, pola wobydlerjow na dworje atd. Tak móža wšitcy fleksibelnje hudźić.
Přizjewić móža so ansamble na webstronje a tam potom krótke widejosekwency swojich poskićenjow zapodać. Tak pokazuje mjenowany festiwal čiłu mnohotnosć amaterskeje hudźby we Łužicy.
Haleluja – skónčnje zaso live hudźba
Anja Pöche (sopran), Friedrich Bracks (tenor), Manuel Helmeke (bas), Ludwig Böhme
(bariton) a Maria Kalmbach (alt, wotlěwa) su jako wokalny ansambl Calmus minjeny pjatk na koncerće w Budyskej Marje-Marćinej cyrkwi publikum zahorili. Šansu, sej po dołhim času lockdowna skónčnje zaso hudźbu live naposkać, přiwabi mnohich ludźi. Ličba připosłucharjow bě na sto wobmjezowana. Wokalisća z Lipska předstajichu swój nowy program „HALLELUJA HOCH DREI“, w kotrymž zwjazachu popspěwy Leonarda Cohena ze zdźěla mało znatymi kěrlušerja Paula Gerhardta a barokoweho komponista Salomona Rossija. Foto: SN/Hanka Šěnec
Trstenjaka hišće raz dožiwili
Myta wikow přepodali
Lipsk (SN). Iris Hanika, Heike Behrend a Timea Tankó su minjeny pjatk Myto Lipšćanskich knižnych wikow 2021 we wobłuku zarjadowanja „Lipsk čita ekstra“ dóstali. Sydomčłonska jury z předsydu Jensom Biskyjom wuznamjeni Iris Haniku w kategoriji beletristiki za twórbu „Echos Kammern“ a Heiku Behrend w kategoriji wěcna kniha/esejistika za knihu „Menschwerdung eines Affen. Eine Autobiografie der ethnografischen Forschung“. W kategoriji přełožk hódnoćichu Timeju Tankó za přełožk madźarskeho romana „Apropos Casanova – Das Brevier des Heiligen Orpheus“. Dohromady 389 twórbow bu za lětuše Myto Lipšćanskich knižnych wikow zapodatych.
Wčera zakónči so wosebite wudaće Europskeho najwjetšeho čitanskeho swjedźenja „Lipsk čita“. Wjace hač 400 zarjadowanjow na něhdźe 80 městnach w měsće wotmě so we wobłuku štyrjoch dnjow, kotrež móžachu zajimcy zwjetša online sćěhować. Něhdźe 100 zarjadowanjow je publikum direktnje na městnje čitanja awtorkow a awtorow dožiwił. Přichodne Lipšćanske knižne wiki maja so klětu wot 17. do 20. měrca wotměć.
