„Hdyž interpret so intensiwnje z twórbami zaběra a tak intelektualny přistup do jich intencije namaka, to připosłucharstwo słyši a začuwa“, tak zwurazni so komponist Jan Cyž zašłu njedźelu nawječor po koncerće na kulturnej zahrodźe Serbskeho ludoweho ansambla w Budyšinje. Młody gitarist Mateo Hórnik, kiž běše na hudźbnym gymnaziju Hród Belvedere we Weimaru před třomi tydźenjemi abiturował, prezentowaše šwarnej ličbje připosłucharjow, mjez nimi tež młodym jeho fanam, wobdźiwajomny solowy koncert. Mnozy wšak znaja jeho, kiž je w Měrkowje pola Radworja doma, hišće z jara wuspěšneho wubědźowanja młodych talentow w SLA abo z koncertowanja z Weimarskimi přećelemi w Serbskim muzeju. Nazymu nastupi wón swój studij na Weimarskej Wysokej šuli za hudźbu „Franz Liszt“. Znowa wopokaza so wón nětko jako jara talentowany a runje tak pilny wuměłc – a to cyle bjez alirow.
Budyšin (SN/bn). Bara „Sundowner“ je so w minjenych lětach přiběrajcy jako woblubowany etablissement wopokazała. Wot 30. junija wotewru ju na „najrjeńšim balkonje Budyšina“, kaž Tomas Kreibich-Nawka, intendant Serbskeho ludoweho ansambla jako mějićel ležownosće kaž tež wobhospodarjer Beno Brězan zahrodu pod Röhrscheidtowej baštu mjenujetej. Hač do 3. septembra změja hosćo składnosć, sej wot wutory do soboty čerstwe cocktaile, wuzwolene piwa a so wě tež wubrane njealkoholiske napoje kaž tež přikuski słodźeć dać.
Chrósćicy (SN/MG). Z wukóncom schadźowanja festiwalneho wuběrka wutoru wječor w Chrósćicach je čłonka wuběrka Katharina Jurkowa jara spokojom: „Staw planowanja a přihota je dobry. Wšitke nadawki su jasne.“ Na wčerawšim zetkanju wujasnjowachu pjatnaće wuběrkownicow a wuběrkownikow hišće poslednje detaile, kotrež maja so w zbywacymaj dwěmaj tydźenjomaj rozjasnić. Tak dyrbja w Chrósćicach samych na přikład hišće wšelakore mjeńše wěstotne a škitne naprawy zwoprawdźić. Dalši wulki čwak dźěła, kotryž su wčera doskónčnje zwoprawdźili, je tak mjenowany „režijny plan“. Tón wobsahuje časowe wotběhi a nadawki za kóždu skupinu a kóždeho dalšeho wobdźěleneho.
Z widom na wobdźělace so skupiny Jurkowa wobkrući, zo so po dotalnym stawje wšitkich dźesać přeprošenych skupin na festiwalu we Łužicy wobdźěla. W zetkanjach z moderatorami a přewodnikami skupin chcedźa přichodne dny tež wo programatisce poslednich dypkach rozsudźiće. „Wjeselimy so na festiwal“, wona na kóncu wjesoła přida.
Zo bě zběžk z demonstracijemi a stawkami za knježerstwo NDR a stronu SED njewočakowano 17. junija wudyrił, pak njetrjechi. Jeničce wulku njespokojnosć ludnosće běchu podhódnoćili. Hižo 16. junija dopołdnja bě minister za statnu bjezstrašnosć Wilhelm Zaisser dźesatki ludźi stasi w ciwilu na wuradźowanja twarcow do Stalinoweje aleje pósłał, kotřiž nadrobnje wo tym rozprawjachu. Zaisser z toho a z postupowanjow dopołdnja 17. junija spózna, zo njebě protest centralnje rjadowany a organizowany, ale spontany a bjez nawodnistwa. Njewočakowaše, zo so rozestajenja tež na republiku rozšěrja. Tohodla po nócnych wuradźowanjach Zaisser, jeho statny sekretar Erich Mielke, šef Ludoweje policije Karl Maron, rozkazowar Kaserněrowaneje ludoweje policije (KVP) Heinz Hoffmann rozsudźichu, zo so policajske jednotki z Lipska, Magdeburga a Podstupima hišće w nocy na 17. junij do Berlina podadźa. Bu kruće přikazane, zo njesmědźa direktnje na demonstrantow a stawkowacych třěleć, ale jenož do powětra, zo bychu so tući nastróžili a rozběželi.
Pančicy-Kukow (SN/MWj/bn). W 775. jubilejnym lěće wobstaća je klóšter Marijina hwězda w Pančicach-Kukowje kónc tydźenja (čitajće tež na 4. stronje) tři serbske wjerški dožiwił. Sobotu je chór 1. serbskeje kulturneje brigady w klóšterskej cyrkwi wurjadny koncert wuhotowała. Abatisa Gabriela Hesse je wopytowarjow w połnje wobsadźenej cyrkwi serbsce witała. Pod nawodom Friedemanna Böhme zanjesechu młode spěwarki a młodźi spěwarjo serbske a łaćonske twórby, mjez druhim wurězki z oratorija „Žně“ Korle Awgusta Kocora a Handrija Zejlerja kaž tež „Do pedalow stupamoj“ Měrćina Weclicha.
Demonstrowacy twarcy wobzamknychu, zo podadźa so srjedu, 17. junija, zaso k domje ministerstwow a zo budu stawkować. Tole zdźěli tež skupina twarcow popołdnju w Zapadnym Berlinje Rozhłosej w ameriskim sektorje (RIAS). Rozhłosownicy RIAS wozjewichu žadanja twarcow Stalinoweje aleje wo cofnjenju zwyšenych dźěłowych normow, lěpše ćělne zastaranje za nich a dalše socialne polěpšenja. Namołwu twarskich dźěłaćerjow jutře, 17. junija, z nimi zhromadnje w Berlinje a republice stawkować za tute žadanja, pak RIAS jenož jónu wozjewi, dokelž so ameriski poradźowar za rozhłós a jeho sobudźěłaćerjo bojachu, zo wospjetowanje namołwy sowjetske wojerske organy rozhorja a zo móhli so pola ameriskeje komandantury hóršić. Z toho móhło přiwótřenje mjez sowjetskej a ameriskej komandanturu nastać.
Donostia/ San Sebastian (SN/MG). Gabor Czimer je madźarski žurnalist, kotryž pisa za w Słowakskej wuchadźacu nowinu Uj Szó. Madźarska mjeńšina pak dyrbješe a dyrbi w poslednich lětach chětro hórke nazhonjenja zběrać. Tak spyta słowakske knježerstwo w aktualnym padźe na přikład mějićelam pódy, kotřiž madźarskej mjeńšinje přisłušeja, tutu bjez wotškódnjenja wotewzać. Tutu njeprawdu Czimer we wjace hač 30 artiklach dokumentowaše a dale dokumentuje. Za tute dźěło je jeho Europske zjednoćenstwo dźenikow w mjeńšinowych a regionalnych rěčach (MIDAS) minjeny pjatk z mytom organizacije počesćiło. Myto MIDAS spožča kóždolětnje nowinarjej, skutkowacemu za jedyn ze 27 čłonow-dźenikow zjednoćenstwa.