Basketballisća Serbskeho gymnazija Budyšin (SGB) su regionalne finale starobneje skupiny I – 11. a 12. lětnik – wurisanja „Młodźina trenuje za olympiju“ w Radworju sensacionelnje dobyli.
Kajki to minimalny, ale jara zwjeselacy wukónc za basketballistow SGB na regionalnym finalu w Radworju? Do tamnišeje sportoweje hale „Slavia“ dojědźechu sej hrajerjo třoch gymnazijow wuchodneje Sakskeje, zo bychu swojeho mištra w starobnej skupinje hólcow 11. a 12. lětnika postajili. A dokelž je kóžde mustwo jednu partiju dobyło a jednu přěhrało, by wo kónčnym zaměstnjenju najprjedy diferenca docpětych košow rozsudźiła. Wona bě pak pola našich hólcow (49:42) a šulerjow Zhorjelskeho gymnazija Augustum-Annen (51:44) ze sydom dypkami jenaka. Jako dalši kriterij wužiwa so w tutej bulosportowej družinje matematiska formula diferency wšěch wuhratych dypkow. Dokelž wučinješe to pola SGB 1,17 a pola Zhorjelca 1,16, dosahaše tutón mólički předskok jedneje dźesaćiny hólcam SGB za złoto. A woni so njesměrnje radowachu.