Rada za serbske naležnosće Braniborskeje je w Choćebuskim „centrumje załožerjow“ zastupjerjow Delnich Serbow w załožbowej radźe za 2023 do 2027 woliła – porno Sakskej bjez problemow.

Choćebuz (SN/mb). Žurnalistka Diana Susanne Šejcowa a wučerka Angela Šurmanowa stej w nowej wólbnej periodźe rjadnej serbskej zastupjerce z Braniborskeje: Braniborska rada je jej z 4 resp. 3 hłosami woliła, jedna čłonka gremija njemóžeše so chorosće dla wobdźělić. Wonej naslědujetej Marcusa Końcarja a Franka Kosyka. Zastupjerjej budźetaj jednaćel Domowiny Marcus Końcaŕ a zapósłanc CDU w braniborskim krajnym sejmje Julian Brüning, kotrajž staj w druhim kole wólbow tež 4 resp. 3 hłosy dóstałoj. Dalši kandidat běše Torsten Mak.