Budyšin (SN/StP/mj). W lěćnym času so wjele ludźi do dowola poda, tak tež serbski zapósłanc CDU w Sakskim krajnym sejmje Marko Šiman. W tutym lěće je sej wosebity cil wupytał: Město Gorizia na sewjeru Italskeje, na mjezy k Słowjenskej.

Nimo Kamjenicy je namjezne město lětuša Europska kulturna stolica. Tuž njezadźiwa, zo nadeńdu tu wosebje zajimcy kultury mnoho atraktiwnych poskitkow. W Rafut-parku nadeńdu na přikład zwukowu instalaciju „Symphonic forest“. W projekće su mjez druhim Drježdźanscy sinfonikarjo sobu skutkowali. „Wobchody su składnostnje spožčenja titula ‚Kulturna stolica Europy‘ krasnje wupyšene a wuhotowane“, tak Marko Šiman powěda. Wón rozprawja dale wo njeličomnych zarjadowanjach w měsće, kotrež přićahuja wšitke generacije­: kinowe wječory, jazz- festiwal, open-air koncerty a wustajeńcy we wšelakich muzejach. Chłóšćenka w programje města je wysokoskok z hudźbu na wosebitym městnje, Europskim naměsće. Wot lěta 2004 wjedźe přez naměsto mjeza mjez Italskej a Słowjenskej. Wone je wuraz zhromadnosće europskich statow.