Sport (30.06.23)
Wohnjowoborny sport
Kameradki a kameradojo dobrowólnych a dalšich wohnjowych woborow z cyłeje Sakskeje wubědźuja so 1. julija w Trjebinje wo Sakski cup. Zarjadowar budźe Krajny woborny zwjazk Sakskeje, wuhotowar Trjebinska dobrowólna wohnjowa wobora. Dorost, žony a mužojo wubědźuja so wot 10 hodź. na sportowym arealu w hašenju, skupinska stafeta, łaženje po rěblu a běh přez zadźěwki.
Dźensa jubilejny turněr
W Ralbicach swjeći sportowe towarstwo Sokoł Ralbicy/Hórki wot dźensnišeho do 2. julija „100 lět sport w Delanach“. Dźensa wot 18 hodź. kopa stara garda Sokoła Ralbicy/Hórki, ST Marijineje hwězdy, ST Radwor a SJ Njebjelčicy. Mjenowane cyłki su so za jubilejny 25. turněr starych knjezow wo pokal Serbskeho Sokoła přizjewili. Sobotu a njedźelu w Ralbicach potom přez cyły dźeń sportuja.
Dynamo w měsće
Prěnje koparske mustwo Dynama Drježdźany hraje jutře, sobotu na Budyskej Młynkec łuce přećiwo prěnjemu koparskemu zastupnistwu Budissy Budyšin. Sudnik přihotowanskeje partije, kotraž započnje so w 16 hodź., budźe serbski referee Michał Neter z Njeswačidła.
Ministrantska kopańca
Z hosćom we Wulkej Dubrawje
Minjeny kónc tydźenja bě tak daloko, zastupjerjo z Pólskeje partnerskeje gmejny Nowogrodziec wopytachu gmejnu Wulku Dubrawu we wobłuku sportoweho swjedźenja, ale tež 25lětne partnerstwo swjećachu.
Delegacija z Nowogrodziec bě pjatk popołdnju přijěła. Cyłkownje štyri awta dojědźechu sej na swjedźenski teren Sportoweho towarstwa Wulka Dubrawa. Wjesnjanosta Robert Relich z mandźelskej je konwoj nawjedował
Prěni wjeršk za hosći bě wobdźělenje na koparskim turněrje starych knjezow. Robert Relich kaž tež wjesnjanosta Hardy Glausch běštaj mjez aktiwnymi hrajerjemi. Po tym zo wuhrachu wšitke hry jara přećelske, je wjesnjanosta dobyćerjow mytował. Tołmačer je wšitko přełožił, tak zo tež hosćo wšitke informacije dóstachu. Při stejnišćach ze zastaranjom witachmy hosći z pólskimi a němskimi družinami jědźe a napojemi, tak zo wječor přijomnje wuklinča. Hosćo so jara derje přiwzate čujachu. Na kóncu wječora podaštej so dwě awće zaso do domizny, wosom hosći přebywaše přez nóc we Wulkej Dubrawje.
Wuslědki (29.06.23)
Kopańca, krajna liga
Drježdź. Strěžin – Radebeul 0:2 (0:2)
Pirna-Copitz – Marienberg 5:3 (2:2)
FC Lößnitz – FSV Wódrjeńca 0:6 (0:6)
Rapid Kamjenica – SG Taucha 0:1 (0:1)
Drježdź. Laubeg. – Markranstädt 0:0 (0:0)
1. SSV Markranstädt 30 64 : 16 66
2. Großenhainski FV 30 56 : 21 65
3. SG Taucha 30 69 : 25 64
4. FSV Motor Marienberg 30 67 : 45 58
5. VfB Empor Glauchau 30 65 : 37 54
6. SG Rjemj. Rabenstein 30 59 : 43 49
7. VfB Fortuna Kamjenica 30 64 : 49 49
8. Radebeulski BC 30 54 : 59 46
9. Drježdźany Laubegast 30 61 : 45 45
10. Radefelder SV 30 49 : 60 36
11. FC Lößnitz 30 49 : 54 35
12. VfL Pirna-Copitz 30 36 : 66 29
13. BSC Rapid Kamjenica 30 38 : 67 27
14. FSV Wódrjeńca 30 54 : 88 27
15. FC Módro-běli Lipsk 30 23 : 74 20
16. SZ Drježdźany Strěžin 30 27 : 86 7
Satkula bičwolejbulowa tura
Šulu wuběrnje zastupowali – finale misnyli
Skupina šulerjow Serbskeje zakładneje šule „Michał Hórnik“ Worklecy je so na wubědźowanju „Młodźina trenuje za olympiju“ w Kinsporku wobdźěliła. Hólcy 3. a 4. lětnika pod nawodom trenarja Tadeja Cyža docpěchu w regionalnym finalu jara dobre 3. městno. Cyłkownje wosom šulow je so na turněrje wobdźěliło. Mustwo z Worklec zestaji so z wrotarjom a 7 pólnych hrajerjow.
W předkole nastupichu Worklečenjo přećiwo šulam z Großnaundorfa, Wachauwa a Ottendorfa-Okrille. Přesadźichu so jasnje z dźewjeć dypkami a wrotowym poměrom 8:0 a so za połfinale kwalifikowachu.
W połfinalu bě zakładna šula Radeberg-juh wočakowany sylny kontrahent. Worklečenjo běchu wot započatka sem trochu hektiscy a tuž so šulerjo z Radeberga w optisce wurunanej hrě na kóncu jasnje z 4:1 přesadźichu. Po krótkim přesłapjenju pak so serbscy koparjo zaso na hru wo 3. městno koncentrowachu, wšako chcychu sebi na kóždy pad bronzowu medalju wudobyć.
Jeničke wrota finale rozsudźili
Sokoł Ralbicy/Hórki –
Biskopičanske KT II 0:1 (0:0)
Zestawa domjacych: Chr. Gloxyn – An. Wałda, Al. Wałda, Schultz, M. Matka, Šewc, D. Gloxyn, D. Šołta, Rachela (89. Kř. Matka), Korjeńk (78. Šiman), Domaška (78. Bejmak)
Najlěpše wuměnjenja wočakowachu koparjow Sokoła Ralbicy/Hórki a druheho zastupnistwa z Biskopic sobotu nawječor w Rakecach, jako wojowachu tam w finalu wo wokrjesny pokal. Zo njebudźe to lochka naležnosć, bě wšitkim jasne, wšako běchu Biskopičenjo do hry faworit na titul. Trenar Tomaš Henčl njebě přitomny, dokelž bě hižo dołho lěćny dowol planował. Za njeho přewza kotrenar Matijas Šnajder při liniji.
Radworčenjo pokal zakitowali
Třeći wolejbulowy turněr serbskich wólnočasnych mustwow w tutym lěće skónči so w sportowni SŠZC Budyšin z dobyćom cyłka ST Radwor 1922 před pedagogami tamnišeho Serbskeho gymnazija.
Třeća stacija wólnočasnych wolejbulowych turněrow serije „top-šěsć“ lěta 2023 wotměwa so spočatk junija w sportowni Serbskeho šulskeho a zetkawanskeho centruma (SŠZC) Budyšin, hdźež hrajachu sydom cyłkow 11. raz wo pokal Spěchowanskeho towarstwa Serbskeho gymnazija Budyšin (SGB). Mustwje z Kulowa a Worklec sčasom wotprajištej a tak zaskočichu wučerjo z Ralbic a dwanatkarjo SGB.
Wubranka w Ralbicach hrała
Z dobyćom do přestawki
SJ Chrósćicy –
VfB Běła Woda 4:2 (3:0)
Zestawa domjacych: Králíček (46. Škoda) – Mark, M. Zahrodnik, Kreuz, Matješk (60. Rätze), L. Zahrodnik, Młynk (46. Wencl), G. Zahrodnik, Matik (46. Mützner), Bogusz, Krawc
Poslednju hru sezony wuhrachu Chróšćenjo na domjacym trawniku přećiwo cyłkej z Běłeje Wody. Wobě koparskej zastupnistwje móžeštej sej hižo dočasnje zdźerženje krajneje klasy zaručić. Přiwšěm pak chcychu so domjacy po štyrjoch poražkach z dobrym rezultatom do přestawki rozžohnować.
Hra za SJC wuběrnje startowaše. Hižo w druhej mjeńšinje ležeše bul prěni króć w saku hosći. Třělwa Michała Młynka z 25 metrow padny wyše wrotarja do klětki. Domjacy po tym na dalše wrota tłóčachu. Tola Pawl Krawc njezamó třělwu we wrotach zaměstnić. Dołho pak přiwisnicy SJC na dalše wrota nječakachu. Po tym, zo bě so Krawc přez prawe křidło derje přesadźił, posłuži nadběhowanskeho partnera Jana Bogusza. Tón z krótkeje distancy k 2:0 zwyši (20.). W 30. min. padnje 3:0. Po přihrawce Klemensa Marka so Krawc do šěsnatki předrě a lesćiwje kulowatu kožu do klětki suny. Wot hosći njebě w prěnjej połojcy hry wjele widźeć.
