Wosebity wječor duchowneje hudźby je sobotu 1. serbska kulturna brigada w Chrósćicach wuhotowała. Z mnohimi twórbami serbskeje a mjezynarodneje hudźby postarachu so spěwarki a spěwarjo wo kulturne dožiwjenje njewšědneho razu.

Chrósćicy (RŠ/SN). Chwalbyhódny koncert dožiwi derje wobsadźena Chróšćanska cyrkej sobotu po wječornych kemšach. Cyłe wołtarnišćo wupjelnichu spěwarjo a spěwarki 1. serbskeje kulturneje brigady pod wuměłskim nawodom cyrkwinskeho direktora Friedemanna Böhmy. Chór, jón čućiwje přewodźowaca pianistka Gina Hentsch a młody, nadarjeny organist Michał Donat předstajichu naročny a jara derje zestajeny program duchowneje hudźby, z kotrymž podachu so dźensa, póndźelu, na wuprawu do pólskeje stolicy Waršawy. Tam wobrubja mjez druhim lětni swjedźeń w němskim pósłanstwje a wuhotuja swójski koncert w uniwersitnej cyrkwi swj. Hany.

Radwor (CRM/SN). Stajnje nowe ideje dyrbiš měć, chceš-li kóždolětny chórowy koncert pod hołym njebjom tematisce hinak zarjadować. Mejenjo njerozsudźichu so lětsa za wróćozhladowanje na 25 lět koncertowanja na historiskim městnje wosrjedź wsy. Michaelis Šusterowa zestaji program lóštneho razu, poskićeny wčera popołdnju zaso na zahrodźe při Starej cyrkwičce, tónkróć pod temu „Jank a Hanka“.